ਐਂਡਰਸਨ-ਤੇਂਦੁਲਕਰ ਟਰਾਫ਼ੀ : ਇੰਗਲੈਂਡ ਵਿਰੁਧ ਪਹਿਲਾ ਟੈਸਟ ਮੈਚ ਹਾਰਿਆ ਭਾਰਤ

ਲੀਡਜ਼ : ਇੰਗਲੈਂਡ ਦੇ ਹੈਡਿੰਗਲੇ ’ਚ ਹੋ ਰਹੇ ਪੰਜ ਟੈਸਟ ਮੈਚਾਂ ਦੀ ਲੜੀ ਦੇ ਪਹਿਲੇ ਮੈਚ ’ਚ ਇੰਗਲੈਂਡ ਨੇ ਭਾਰਤ ਨੂੰ 5 ਵਿਕਟਾਂ ਨਾਲ ਹਰਾ ਦਿਤਾ। ਮੀਂਹ ਨਾਲ ਪ੍ਰਭਾਵਤ ਮੈਚ ’ਚ ਬੇਨ ਡਕੇਟ ਦੀ 149 ਦੌੜਾਂ ਦੀ ਪਾਰੀ ਬਦੌਲਤ ਇੰਗਲੈਂਡ ਨੇ ਸਫ਼ਲਤਾ ਹਾਸਲ ਕੀਤੀ, ਜੋ ‘ਪਲੇਅਰ ਆਫ਼ ਦ ਮੈਚ’ ਵੀ ਰਹੇ। ਭਾਰਤੀ ਟੀਮ ਨੂੰ ਮੈਚ ’ਚ 9 ਕੈਚ ਛੱਡਣਾ ਸਭ ਤੋਂ ਮਹਿੰਗਾ ਪਿਆ। 

ਦਿਨ ਦਾ ਪਹਿਲਾ ਸੈਸ਼ਨ ਪੂਰੀ ਤਰ੍ਹਾਂ ਇੰਗਲੈਂਡ ਦੇ ਨਾਂ ਰਿਹਾ। ਡਕੇਟ ਨੇ ਜੈਕ ਕਰਾਅਲੀ (65 ਦੌੜਾਂ) ਨਾਲ ਮਿਲ ਕੇ ਪਹਿਲੇ ਵਿਕੇਟ ਲਈ 188 ਦੌੜਾਂ ਦੀ ਸਾਂਝੇਦਾਰੀ ਨਾਲ ਇੰਗਲੈਂਡ ਦੀ ਜਿੱਤ ਦੀ ਮਜ਼ਬੂਤ ਨੀਂਹ ਰੱਖੀ। 

ਹਾਲਾਂਕਿ ਭਾਰਤ ਨੇ ਦੂਜੇ ਸੈਸ਼ਨ ’ਚ ਚਾਰ ਵਿਕਟਾਂ ਲੈ ਕੇ ਇੰਗਲੈਂਡ ਦੀ ਰਫ਼ਤਾਰ ਉਤੇ ਰੋਕ ਲਗਾ ਦਿਤੀ। ਦੂਜੇ ਸੈਸ਼ਨ ’ਚ ਮੀਂਹ ਕਾਰਨ ਵੀ ਮੈਚ ਅੱਧੇ ਘੰਟੇ ਤਕ ਖੇਡ ਰੁਕਿਆ ਰਿਹਾ। ਸ਼ਾਰਦੁਲ ਠਾਕੁਰ ਨੇ ਖਤਰਨਾਕ ਬੇਨ ਡਕੇਟ (149) ਅਤੇ ਹੈਰੀ ਬਰੂਕ (0) ਨੂੰ ਆਊਟ ਕਰ ਕੇ ਭਾਰਤ ਦੇ ਹਮਲੇ ਦੀ ਅਗਵਾਈ ਕੀਤੀ, ਜਦਕਿ ਪ੍ਰਸਿੱਧ ਕ੍ਰਿਸ਼ਨਾ ਨੇ ਮੀਂਹ ਕਾਰਨ ਰੁਕੇ ਦੂਜੇ ਸੈਸ਼ਨ ਵਿਚ ਸ਼ੁਰੂਆਤੀ ਦੋ ਵਿਕਟਾਂ ਲਈਆਂ। ਕ੍ਰਿਸ਼ਨਾ ਨੇ ਜ਼ੈਕ ਕ੍ਰਾਉਲੀ (65) ਅਤੇ ਓਲੀ ਪੋਪ (8) ਦਾ ਵਿਕਟ ਲਿਆ। ਹਾਲਾਂਕਿ ਉਹ ਸਭ ਤੋਂ ਮਹਿੰਗੇ ਸਾਬਤ ਹੋਏ ਅਤੇ 6.10 ਦੀ ਔਸਤ ਨਾਲ ਦੌੜਾਂ ਦਿਤੀਆਂ। ਰਵਿੰਦਰ ਜਡੇਜਾ ਨੇ ਕਪਤਾਨ ਬੇਨ ਸਟੋਕਸ (33 ਦੌੜਾਂ) ਦਾ ਵਿਕਟ ਲਿਆ। ਹਾਲਾਂਕਿ ਇਸ ਤੋਂ ਬਾਅਦ ਭਾਰਤ ਨੂੰ ਕੋਈ ਸਫ਼ਲਤਾ ਨਹੀਂ ਮਿਲੀ ਅਤੇ ਜੋਅ ਰੂਟ (53 ਦੌੜਾਂ) ਤੇ ਜੈਮੀ ਸਮਿੱਥ (44 ਦੌੜਾਂ) ਇੰਗਲੈਂਡ ਨੂੰ ਜਿੱਤ ਤਕ ਲੈ ਗਏ। 

ਇਸ ਮੁਕਾਬਲੇ ’ਚ ਪਹਿਲੀ ਪਾਰੀ ਦੌਰਾਨ ਭਾਰਤੀ ਟੀਮ 471 ਦੌੜਾਂ ਬਣਾਉਣ ’ਚ ਸਫ਼ਲ ਹੋਈ ਸੀ। ਇਸ ਦੇ ਜਵਾਬ ’ਚ ਇੰਗਲੈਂਡ ਨੇ 465 ਦੌੜਾਂ ਬਣਾਈਆਂ। ਦੂਜੀ ਪਾਰੀ ’ਚ ਭਾਰਤੀ ਟੀਮ ਨੇ 364 ਦੌੜਾਂ ਬਣਾਈਆਂ ਸਨ। ਭਾਰਤ ਲਈ ਪਹਿਲੀ ਵਾਰੀ ’ਚ ਯਸ਼ਸਵੀ ਜੈਸਵਾਲ, ਸ਼ੁਭਮਨ ਗਿੱਲ ਅਤੇ ਰਿਸ਼ਭ ਪੰਤ ਨੇ ਸੈਂਕੜੇ ਲਗਾਏ ਸਨ। ਜਦਕਿ ਦੂਜੀ ਪਾਰੀ ’ਚ ਕੇ.ਐਲ. ਰਾਹੁਲ ਅਤੇ ਰਿਸ਼ਭ ਪੰਤ ਨੇ ਸੈਂਕੜੇ ਲਗਾਏ। ਬੁਮਰਾਹ ਨੇ ਪਹਿਲੀ ਪਾਰੀ ’ਚ ਪੰਜ ਬੱਲੇਬਾਜ਼ੀ ਨੂੰ ਆਊਟ ਕੀਤਾ ਸੀ ਪਰ ਦੂਜੀ ਪਾਰੀ ’ਚ ਕੋਈ ਵਿਕਟ ਨਹੀਂ ਲੈ ਸਕੇ। 

ਮੈਚ ਦੀ ਦਿਲਚਸਪ ਗੱਲ ਇਹ ਰਹੀ ਕਿ ਇਹ 1948 ਤੋਂ ਬਾਅਦ ਪਹਿਲਾ ਟੈਸਟ ਮੈਚ ਹੈ ਜਿਸ ਦੀਆਂ ਚਾਰੇ ਪਾਰੀਆਂ ’ਚ 350 ਤੋਂ ਵੱਧ ਦੌੜਾਂ ਬਣਾਈਆਂ ਗਈਆਂ। ਹੈਡਿੰਗਲੇ ’ਚ ਹੀ ਇੰਗਲੈਂਡ ਅਤੇ ਆਸਟ੍ਰੇਲੀਆ ਦੇ ਮੈਚ ਦੌਰਾਨ ਇੰਗਲੈਂਡ ਨੇ 496 ਅਤੇ 365 ਅਤੇ ਆਸਟ੍ਰੇਲੀਆ ਨੇ 458 ਅਤੇ 404 ਦੌੜਾਂ ਬਣਾਈਆਂ ਸਨ।