ਅਮਰੀਕੀ ਫ਼ੌਜ ਨੇ ਬੈਨ ਕੀਤਾ Tik Tok, ਵਜ੍ਹਾ ਜਾਣ ਕੇ ਰਹਿ ਜਾਵੋਗੇ ਹੈਰਾਨ !
ਇਕ ਵਾਰ ਭਾਰਤ ਵਿਚ ਵੀ ਬੈਨ ਹੋ ਚੁੱਕਿਆ ਹੈ Tik Tok
ਨਵੀਂ ਦਿੱਲੀ : ਚੀਨੀ ਕੰਪਨੀ ਦਾ ਮਸ਼ਹੂਰ ਟਿਕ ਟੋਕ ਐਪ ਹੁਣ ਅਮਰੀਕੀ ਫੌਜ ਨੇ ਬੈਨ ਕਰ ਦਿੱਤਾ ਹੈ। ਅਮਰੀਕਾ ਫੌਜ ਦੇ ਜਵਾਨ ਇਸ ਵੀਡੀਓ ਐਪ ਦੀ ਵਰਤੋਂ ਨਹੀਂ ਕਰ ਸਕਣਗੇ। ਇਸ ਐਪ 'ਤੇ ਬੈਨ ਲਗਾਉਣ ਦਾ ਕਾਰਨ ਵੀ ਹੈਰਾਨ ਕਰਨ ਵਾਲਾ ਹੈ। ਅਮਰੀਕੀ ਫ਼ੌਜ ਦਾ ਮੰਨਣਾ ਹੈ ਕਿ ਚੀਨੀ ਵੀਡੀਓ ਐਪ ਨੈਸ਼ਨਲ ਸਿਕਊਰਿਟੀ ਭਾਵ ਰਾਸ਼ਟਰੀ ਸੁਰੱਖਿਆ ਲਈ ਖਤਰਾ ਹੈ।
ਸੋਸ਼ਲ ਮੀਡੀਆ 'ਤੇ ਧਮਾਲ ਮਚਾਉਣ ਅਤੇ ਕਈਆਂ ਨੂੰ ਫਰਸ਼ ਤੋਂ ਅਰਸ਼ ਤੱਕ ਪਹੁੰਚਾਉਣ ਵਾਲਾ ਟਿਕ ਟੋਕ ਐਪ ਇਕ ਵਾਰ ਫਿਰ ਤੋਂ ਸਵਾਲਾਂ ਦੇ ਘੇਰੇ ਵਿਚ ਹੈ। ਮੀਡੀਆ ਰਿਪੋਰਟਾ ਅਨੁਸਾਰ ਅਮਰੀਕੀ ਫੋਜ ਦੇ ਇਕ ਬੁਲਾਰੇ ਨੇ ਦੱਸਿਆ ਹੈ ਕਿ ਟਿਕ ਟਾਕ ਇਕ ਸਾਇਬਰ ਥਰੈਟ ਦੀ ਤਰ੍ਹਾਂ ਹੈ। ਫੌਜ ਦਾ ਮੰਨਣਾ ਹੈ ਕਿ ਬਾਈਟ ਡਾਂਸ ਦਾ ਇਹ ਐਪ ਅਮਰੀਕਾ ਦੀ ਜਾਸੂਸੀ ਲਈ ਵਰਤਿਆ ਜਾ ਸਕਦਾ ਹੈ।
ਪਿਛਲੇ ਦਿਨਾਂ ਵਿਚ ਵੀ ਅਮਰੀਕੀ ਨੇਵੀ ਨੇ ਆਪਣੇ ਮੈਂਬਰਾ ਤੋਂ ਟਿਕ ਟੋਕ ਐਪ ਨੂੰ ਸਰਕਾਰ ਵੱਲੋਂ ਦਿੱਤੇ ਗਏ ਡਿਵਾਇਸਾ 'ਚੋਂ ਡਿਲੀਟ ਕਰਾ ਦਿੱਤਾ ਸੀ। ਰਿਪੋਰਟ ਮੁਤਾਬਕ ਰੱਖਿਆ ਵਿਭਾਗ ਨੇ ਆਪਣੇ ਕਰਮਚਾਰੀਆਂ ਨੂੰ ਕਿਹਾ ਕਿ ਕਿਸੇ ਵੀ ਐਪ ਨੂੰ ਡਾਊਨਲੋਡ ਕਰਨ ਤੋਂ ਪਹਿਲਾਂ ਸਾਵਧਾਨੀ ਵਰਤੋ। ਜ਼ਿਕਰਯੋਗ ਹੈ ਕਿ ਅਮਰੀਕਾ ਵਿਚ ਟਿਕ ਟਾਕ ਦੀ ਜਾਂਚ ਚੱਲ ਰਹੀ ਹੈ।
ਅਕਤੂਬਰ ਵਿਚ ਕੁੱਝ ਲੀਡਰਾਂ ਨੇ ਇਸ ਐਪ ਦੀ ਸਿਕਊਰਿਟੀ 'ਤੇ ਸਵਾਲ ਚੁੱਕੇ ਸਨ ਜਿਸ ਤੋਂ ਬਾਅਦ ਜਾਂਚ ਸ਼ੁਰੂ ਕੀਤੀ ਗਈ ਹੈ। ਜਾਂਚ ਦਾ ਮੁੱਖ ਵਿਸ਼ਾ ਇਹ ਹੈ ਕਿ ਕੀ ਚੀਨੀ ਐਪ ਯੂਜ਼ਰਾ ਦਾ ਡਾਟਾ ਇਕੱਠਾ ਕਰ ਰਿਹਾ ਹੈ ਜਾਂ ਨਹੀਂ।ਦੱਸ ਦਈਏ ਕਿ ਟਿਕ ਟੋਕ ਇਕ ਵਾਰ ਭਾਰਤ ਵਿਚ ਵੀ ਬੈਨ ਕੀਤਾ ਜਾ ਚੁੱਕਾ ਹੈ। ਹਾਲਾਕਿ ਭਾਰਤ ਵਿਚ ਬੈਨ ਹੋਣ ਦਾ ਕਾਰਨ ਇਸ 'ਚ ਦਿਖਾਇਆ ਜਾ ਰਿਹਾ ਕੰਟੈਂਟ ਸੀ। ਮਦਰਾਸ ਹਾਈ ਕੋਰਟ ਨੇ ਇਸ ਨੂੰ ਬੈਨ ਕਰਨ ਦਾ ਫੈਸਲਾ ਸੁਣਾਇਆ ਸੀ ਅਤੇ ਅਸ਼ਲੀਲਤਾ ਨੂੰ ਵਧਾਉਣਾ ਇਸ ਦਾ ਕਾਰਨ ਦੱਸਿਆ ਗਿਆ ਸੀ।