E-cigarette use kills 18

ਅਮਰੀਕਾ: ਅਮਰੀਕਾ ‘ਚ ਈ-ਸਿਗਰਟ ਦੀ ਵਰਤੋਂ ਕਾਰਨ ਹੁਣ ਤੱਕ 18 ਲੋਕਾਂ ਦੀ ਮੌਤ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਅਮਰੀਕੀ ਸਿਹਤ ਅਧਿਕਾਰੀਆਂ ਮੁਤਾਬਿਕ ਫੇਫੜਿਆਂ ਦੀ ਬੀਮਾਰੀ ਨਾਲ ਪੀੜਤ ਮਰੀਜ਼ਾਂ ਦੀ ਗਿਣਤੀ ਵੱਧ ਕੇ 1,080 ਹੋ ਗਈ ਹੈ।

'ਸੈਂਟਰਸ ਫੌਰ ਡਿਜੀਜ਼ ਕੰਟਰੋਲ ਐਂਡ ਪ੍ਰੀਵੈਨਸ਼ਨ' ਦੇ ਮੁੱਖੀ ਰੌਬਰਟ ਰੈੱਡਫੀਲਡ ਨੇ ਕਿਹਾ ਹੈ ਕਿ ,''ਬਦਕਿਸਮਤੀ ਨਾਲ ਇਸ ਬੀਮਾਰੀ ਨੂੰ ਅਮਰੀਕੀ ਲੋਕਾਂ, ਖਾਸ ਕਰ ਕੇ ਨੌਜਵਾਨਾਂ 'ਤੇ ਪੈਣ ਵਾਲੇ ਸਿਹਤ ਸੰਬੰਧੀ ਖਤਰਿਆਂ ਦੇ ਵਧਣ ਦੇ ਲਿਹਾਜ ਨਾਲ ਦੇਖੀਏ ਤਾਂ ਇਹ ਇਕ ਭਿਆਨਕ ਸਮੱਸਿਆ ਦਾ ਸਿਰਫ ਛੋਟਾ ਜਿਹਾ ਹਿੱਸਾ ਹੋ ਸਕਦਾ ਹੈ।'' ਉੱਥੇ ਹੀ ਏਜੰਸੀ ਨੇ ਦੱਸਿਆ ਕਿ ਪਿਛਲੇ ਹਫਤੇ 275 ਮਾਮਲੇ ਸਾਹਮਣੇ ਆਏ ਹਨ।

ਇੰਨਾ ਹੀ ਨਹੀਂ ਏਜੰਸੀ ਮੁਤਾਬਿਕ ਪੁਰਾਣੇ ਮਰੀਜ਼ਾਂ ਵਿਚ ਫਿਰ ਤੋਂ ਬੀਮਾਰੀ ਦੇ ਲੱਛਣ ਨਜ਼ਰ ਆਉਣ ਦੀ ਸ਼ਿਕਾਇਤ ਹੈ। ਕਾਬਲੇਗੌਰ ਹੈ ਕਿ ਮਰੀਜ਼ਾਂ ਨੇ ਕਿਹੜੇ-ਕਿਹੜੇ ਪਦਾਰਥਾਂ ਦੀ ਵਰਤੋਂ ਕੀਤੀ ਹੈ ਇਸ ਸੰਬੰਧ ਵਿਚ 578 ਮਰੀਜ਼ਾਂ ਤੋਂ ਪੁੱਛੇ ਗਏ ਸਵਾਲ ਵਿਚ ਸਾਹਮਣੇ ਆਇਆ ਕਿ 78 ਫੀਸਦੀ ਨੇ ਨਿਕੋਟੀਨ ਵਾਲੇ ਟੀ.ਐੱਚ.ਸੀ. ਉਤਪਾਦਾਂ ਦੀ ਵਰਤੋਂ ਕੀਤੀ, 37 ਫੀਸਦੀ ਨੇ ਸਿਰਫ ਟੀ.ਐੱਚ.ਸੀ. ਅਤੇ 17 ਫੀਸਦੀ ਨੇ ਨਿਕੋਟੀਨ ਯੁਕਤ ਉਤਪਾਦਾਂ ਦੀ ਵਰਤੋਂ ਕੀਤੀ ਸੀ।

ਜ਼ਿਕਰਯੋਗ ਹੈ ਕਿ ਟੀ.ਐੱਚ.ਸੀ. ਗਾਂਜੇ ਦਾ ਮੁੱਖ ਨਸ਼ੀਲਾ ਪਦਾਰਥ ਹੈ ਜੋ ਵਿਅਕਤੀ ਦੇ ਮਿਜਾਜ਼ ਅਤੇ ਹੋਰ ਦਿਮਾਗੀ ਪ੍ਰਕਿਰਿਆਵਾਂ ਨੂੰ ਪ੍ਰਭਾਵਿਤ ਕਰਦਾ ਹੈ। ਇਨ੍ਹਾਂ ਮਰੀਜ਼ਾਂ ਵਿਚ 70 ਫੀਸਦੀ ਪੁਰਸ਼ ਅਤੇ 80 ਫੀਸਦੀ ਔਰਤਾਂ ਦੀ ਉਮਰ 35 ਸਾਲ ਤੋਂ ਘੱਟ ਹੈ। ਇਸ ਮਾਮਲੇ ‘ਚ ਸੀਡੀਸੀ ਦੀ ਪ੍ਰਮੁੱਖ ਡਿਪਟੀ ਡਾਇਰੈਕਟਰ ਐਨੀ ਸ਼ੁਚੈਟ ਦਾ ਕਹਿਣਾ ਹੈ ਕਿ ਈ-ਸਿਗਰਟ ਕਾਰਨ ਬੀਮਾਰ ਹੋਏ ਲੋਕਾਂ ਦੀ ਤੁਲਨਾ ਵਿਚ ਔਰਤਾਂ ਦੀਆ ਮੌਤਾਂ ਜ਼ਿਆਦਾ ਹੋਈਆ ਹਨ।

ਦੱਸ ਦਈਏ ਕਿ ਅਮਰੀਕਾ ਦੇ ਕੁਝ ਰਾਜਾਂ ਵਿਚ ਈ-ਸਿਗਰਟ 'ਤੇ ਪਾਬੰਦੀ ਲਗਾਈ ਗਈ ਹੈ ਅਤੇ ਅਮਰੀਕੀ ਸਿਹਤ ਅਧਿਕਾਰੀਆਂ ਵੱਲੋਂ ਈ-ਸਿਗਰਟ ਕਾਰਨ ਬੀਮਾਰ ਹੋਏ ਹੋਰ ਮਰੀਜ਼ਾਂ ਬਾਰੇ ਜਾਂਚ ਕੀਤੀ ਜਾ ਰਹੀ ਹੈ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook ਤੇ ਲਾਈਕ Twitter  ਤੇ follow ਕਰੋ।