File Photo

ਅੰਮ੍ਰਿਤਸਰ : ਪਾਕਿਸਤਾਨ ਦੇ ਗੁਰਦਆਰਾ ਸ੍ਰੀ ਨਨਕਾਣਾ ਸਾਹਿਬ ਵਿਚ ਬੀਤੇ ਕਲ ਵਾਪਰੀ ਮੰਦਭਾਗੀ ਘਟਨਾ ਦਾ ਅਸਲ ਸੱਚ ਸਾਹਮਣੇ ਆ ਗਿਆ ਹੈ। ਜਾਣਕਾਰੀ ਮੁਤਾਬਕ ਜਗਜੀਤ ਕੌਰ ਨਾਮਕ ਜਿਸ ਲੜਕੀ ਨੇ ਇਸਲਾਮ ਕਬੂਲ ਕਰ ਕੇ ਇਕ ਮੁਸਲਿਮ ਲੜਕੇ ਨਾਲ ਨਿਕਾਹ ਕਰਵਾ ਲਿਆ ਸੀ, ਦਾ ਮਾਮਲਾ ਪੰਜਾਬ ਹਾਈ ਕੋਰਟ ਲਾਹੌਰ ਵਿਚ ਹੈ ਤੇ 8 ਜਨਵਰੀ ਨੂੰ ਕੋਰਟ ਵਿਚ ਲੜਕੀ ਦਾ ਪੱਖ ਪੇਸ਼ ਕੀਤਾ ਜਾਣਾ ਹੈ ਜਿਸ ਤੋਂ ਬਾਅਦ ਮੰਨਿਆ ਜਾ ਰਿਹਾ ਹੈ ਕਿ ਅਦਾਲਤ ਇਸ ਲੜਕੀ ਨੂੰ ਵਾਪਸ ਉਸ ਦੇ ਘਰ ਭੇਜ ਦੇਵੇਗੀ।

ਇਸ ਮਾਮਲੇ 'ਤੇ ਅਪਣਾ ਦਬਾਅ ਬਣਾਉਣ ਲਈ ਸ਼ਰਾਰਤਪੂਰਨ ਕਾਰਵਾਈ ਕਰ ਕੇ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਕਿ ਲੜਕੀ ਇਸਲਾਮ ਨਹੀਂ ਛਡਣਾ ਚਾਹੁੰਦੀ 'ਤੇ ਮੁਸਲਿਮ ਭਾਈਚਾਰਾ ਅਜਿਹਾ ਹੋਣ ਵੀ ਨਹੀਂ ਦੇਵੇਗਾ।ਰਾਣਾ ਮਨਸੂਰ ਨਾਮਕ ਇਕ ਵਿਅਕਤੀ ਜਿਸ ਨੇ ਬੀਤੇ ਦਿਨ ਨਨਕਾਣਾ ਸਾਹਿਬ ਵਿਚ ਕੁੱਝ ਸ਼ਰਾਰਤੀ ਵਿਅਕਤੀਆਂ ਨੂੰ ਲੈ ਕੇ ਇਹ ਹਰਕਤ ਕੀਤੀ ਸੀ, ਬਾਰੇ ਪਤਾ ਲੱਗਾ ਹੈ ਕਿ ਉਸ ਦਾ ਕਿਸੇ ਪੁਲਿਸ ਵਾਲੇ ਨਾਲ ਝਗੜਾ ਹੋ ਗਿਆ ਸੀ।

ਪੁਲਿਸ ਵਾਲਿਆਂ ਨੇ ਰਾਣਾ ਮਨਸੂਰ ਦਾ ਪੂਰੀ ਤਸੱਲੀ ਨਾਲ ਕੁਟਾਪਾ ਚਾੜ੍ਹਿਆ ਸੀ। ਅਪਣੀ ਹੋਈ ਇਸ ਬੇਇੱਜ਼ਤੀ ਦਾ ਬਦਲਾ ਲੈਣ ਲਈ ਉਸ ਨੇ ਇਹ ਸਾਰਾ ਡਰਾਮਾ ਰਚਿਆ।ਰਾਣਾ ਮਨਸੂਰ ਜਗਜੀਤ ਕੌਰ ਉਰਫ਼ ਆਇਸ਼ਾ ਦੇ ਪਤੀ ਮੁਹੰਮਦ ਅਹਿਸਨ ਦਾ ਰਿਸ਼ਤੇਦਾਰ ਹੈ। ਉਸ ਨੇ ਇਸ ਮਾਮਲੇ ਨੂੰ ਧਾਰਮਕ ਰੰਗਤ ਦੇ ਕੇ ਇਹ ਨਾਟਕ ਕੀਤਾ। ਰਾਣਾ ਮਨਸੂਰ ਦੀ ਇਸ ਹਰਕਤ ਤੋਂ ਬਾਅਦ ਹਰ ਮੁਸਲਮਾਨ ਖ਼ਾਸਕਰ ਨਨਕਾਣਾ ਸਾਹਿਬ ਦੇ ਵਸਨੀਕ ਉਸ 'ਤੇ ਥੂ-ਥੂ ਕਰ ਰਹੇ ਹਨ।

ਇਸ ਮਾਮਲੇ 'ਤੇ ਹੋਰ ਮਿਲੀ ਜਾਣਕਾਰੀ ਮੁਤਾਬਕ ਰਾਣਾ ਮਨਸੂਰ ਦੀ ਅਗਵਾਈ ਵਿਚ ਕਰੀਬ 100 ਵਿਅਕਤੀਆਂ ਨੇ ਪਹਿਲਾਂ ਜੁੰਮੇ ਦੀ ਨਮਾਜ਼ ਅਦਾ ਕੀਤੀ 'ਤੇ ਫਿਰ ਇਹ ਸਾਰੇ ਸ਼ਾਮ ਕਰੀਬ 5 ਵਜੇ ਗੁਰਦਆਰਾ ਜਨਮ ਅਸਥਾਨ ਦੇ ਸਾਹਮਣੇ ਇੱਕਠੇ ਹੋ ਗਏ ਜਿਥੇ ਰਾਣਾ ਮਨਸੂਰ ਅਪਣੀ ਗੰਧਲੀ ਖੇਡ ਖੇਡਣ ਲੱਗਾ।

ਉਸ ਨੇ ਪਹਿਲਾਂ ਸਿੱਖਾਂ ਵਿਰੁਧ ਜੰਮ ਕੇ ਬਕਵਾਸਬਾਜ਼ੀ ਕੀਤੀ 'ਤੇ ਫਿਰ ਹਜੂਮ ਨੇ ਗੁਰਦਵਾਰਾ ਸਾਹਿਬ ਦੇ ਆਸ-ਪਾਸ ਵਸਦੇ ਸਿੱਖਾਂ ਦੇ ਘਰਾਂ 'ਤੇ ਪੱਥਰਬਾਜ਼ੀ ਕੀਤੀ। ਇਹ ਲੋਕ ਧਰਨਾ ਲਗਾ ਕੇ ਬੈਠ ਗਏ। ਪੁਲਿਸ ਨੇ ਕਰੀਬ 7 ਵਜੇ ਇਨ੍ਹਾਂ ਸਾਰਿਆਂ ਨੂੰ ਖਦੇੜ ਦਿਤਾ ਸੀ। ਤਾਜ਼ਾ ਹਾਸਲ ਜਾਣਕਾਰੀ ਮੁਤਾਬਕ ਪੁਲਿਸ ਨੇ ਇਨ੍ਹਾਂ ਵਿਚੋਂ ਰਾਣਾ ਮਨਸੂਰ ਅਤੇ ਉਸ ਦੇ ਕਰੀਬ 50 ਸਾਥੀਆਂ ਦੀ ਪਹਿਚਾਣ ਕਰ ਲਈ ਹੈ। ਇਨ੍ਹਾਂ ਸਾਰਿਆਂ ਵਿਰੁਧ ਸਖ਼ਤ ਕਰਵਾਈ ਕੀਤੀ ਜਾ ਰਹੀ ਹੈ।