Astrophotographer snaps his 'clearest ever photo of the SUN

ਕੈਲੀਫੋਰਨੀਆ: ਪੁਲਾੜ ਵਿਗਿਆਨੀਆਂ ਲਈ ਸੂਰਜ ਹਮੇਸ਼ਾਂ ਹੀ ਉਤਸੁਕਤਾ ਦਾ ਕੇਂਦਰ ਰਿਹਾ ਹੈ। ਦੁਨੀਆ ਭਰ ਦੀਆਂ ਪੁਲਾੜ ਏਜੰਸੀਆਂ ਵੀ ਸੂਰਜ ਦੀ ਜਾਂਚ ਲਈ ਲਗਾਤਾਰ ਮਿਸ਼ਨ ਭੇਜ ਰਹੀਆਂ ਹਨ। ਹੁਣ ਅਮਰੀਕਾ ਦੇ ਇਕ ਖਗੋਲ ਫੋਟੋਗ੍ਰਾਫ਼ਰ ਐਂਡਰਿਊ ਮੈਕਕਾਰਥੀ ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਸੂਰਜ ਦੀ ਹੁਣ ਤੱਕ ਦੀ ਸਭ ਤੋਂ ਸਾਫ਼ ਤਸਵੀਰ ਨੂੰ ਅਪਣੇ ਕੈਮਰੇ ਵਿਚ ਕੈਦ ਕੀਤਾ ਹੈ। ਸੋਲਰ ਸਿਸਟਮ ਦੇ ਸਭ ਤੋਂ ਵੱਡੇ ਤਾਰੇ ਦੀ ਇਸ ਤਸਵੀਰ ਨੂੰ ਬਣਾਉਣ ਲਈ ਐਂਡਰਿਊ ਨੇ 150,000 ਤੋਂ ਵੱਧ ਵੱਖ-ਵੱਖ ਤਸਵੀਰਾਂ ਦੀ ਵਰਤੋਂ ਕੀਤੀ ਹੈ।

ਇਹਨਾਂ ਸਾਰੀਆਂ ਤਸਵੀਰਾਂ ਨੂੰ 300 ਮੈਗਾਪਿਕਸਲ ਦੀ ਫਾਈਨਲ ਤਸਵੀਰ 'ਚ ਦੇਖਿਆ ਜਾ ਸਕਦਾ ਹੈ। ਇਹ ਸਾਧਾਰਨ 10 ਮੈਗਾਪਿਕਸਲ ਕੈਮਰੇ ਦੀ ਤਸਵੀਰ ਨਾਲੋਂ 30 ਗੁਣਾ ਵੱਡਾ ਹੈ। ਇਸ ਵਿਚ ਰਹੱਸਮਈ ਹਨੇਰੇ ਸਨਸਪਾਟ ਨੂੰ ਸਭ ਤੋਂ ਨਜ਼ਦੀਕੀ ਦ੍ਰਿਸ਼ ਵਿਚ ਦੇਖਿਆ ਜਾ ਸਕਦਾ ਹੈ। ਅੱਜ ਤੋਂ ਪਹਿਲਾਂ ਸੂਰਜ ਦੀਆਂ ਸਿਰਫ਼ ਚੋਣਵੀਆਂ ਤਸਵੀਰਾਂ ਹੀ ਅਜਿਹੀਆਂ ਹਨ, ਜਿਨ੍ਹਾਂ ਵਿਚ ਇਸ ਦੀ ਸਤਹ ਦੇ ਕਾਲੇ ਧੱਬੇ ਅਤੇ ਅੱਗ ਦੀਆਂ ਲਪਟਾਂ ਦਿਖਾਈ ਦਿੰਦੀਆਂ ਹਨ।

ਸੂਰਜ ਦੀ ਸਤਹ 'ਤੇ ਦਿਖਾਈ ਦੇਣ ਵਾਲੇ ਇਹ ਕਾਲੇ ਧੱਬੇ ਅਸਲ ਵਿਚ ਕਾਲੇ ਨਹੀਂ ਹਨ। ਇਹਨਾਂ ਥਾਵਾਂ ਤੋਂ ਬਹੁਤ ਸ਼ਕਤੀਸ਼ਾਲੀ ਕਿਰਨਾਂ ਨਿਕਲਦੀਆਂ ਹਨ, ਫੋਟੋਗ੍ਰਾਫਿਕ ਪ੍ਰਕਿਰਿਆ ਦੁਆਰਾ ਇਹ ਧੱਬੇ ਕਾਲੇ ਦਿਖਾਈ ਦਿੰਦੇ ਹਨ। ਸੂਰਜ ਦੀ ਅਜਿਹੀ ਤਸਵੀਰ ਲੈਣ ਦੀ ਪ੍ਰਕਿਰਿਆ ਬਹੁਤ ਔਖੀ ਹੈ। ਫੋਟੋਗ੍ਰਾਫਰ ਨੂੰ ਸੂਰਜ ਦੀਆਂ ਤੇਜ਼ ਕਿਰਨਾਂ ਨਾਲ ਅੰਨ੍ਹੇ ਹੋਣ ਤੋਂ ਬਚਾਉਣ ਲਈ ਦੋ ਫਿਲਟਰਾਂ ਵਾਲੀ ਵਿਸ਼ੇਸ਼ ਦੂਰਬੀਨ ਦੀ ਵਰਤੋਂ ਕੀਤੀ ਗਈ ਹੈ।

ਐਂਡਰਿਊ ਨੇ ਕਿਹਾ ਕਿ ਉਹ ਹਮੇਸ਼ਾ ਸੂਰਜ ਦੀਆਂ ਤਸਵੀਰਾਂ ਖਿੱਚਣ ਲਈ ਉਤਸ਼ਾਹਿਤ ਰਹਿੰਦੇ ਹਨ, ਇਹ ਸੱਚਮੁੱਚ ਦਿਲਚਸਪ ਹੈ ਕਿਉਂਕਿ ਇਹ ਹਮੇਸ਼ਾ ਪਹਿਲਾਂ ਨਾਲੋਂ ਵੱਖਰਾ ਹੁੰਦਾ ਹੈ। ਜਦਕਿ ਚੰਦਰਮਾ ਦੀ ਤਸਵੀਰ ਇਸ ਗੱਲ 'ਤੇ ਨਿਰਭਰ ਕਰਦੀ ਹੈ ਕਿ ਅਸਮਾਨ ਕਿੰਨਾ ਸਾਫ ਹੈ। ਉਹਨਾਂ ਕਿਹਾ ਕਿ ਸੂਰਜ ਕਦੀ ਬੋਰਿੰਗ ਨਹੀਂ ਹੁੰਦਾ ਅਤੇ ਉਸ ਦਿਨ ਕਾਫੀ ਸਾਫ ਤਸਵੀਰ ਮਿਲੀ।