Ranil Wickremesinghe becomes new president of Sri Lanka

ਸ੍ਰੀਲੰਕਾ : ਸ੍ਰੀਲੰਕਾ ਵਿੱਚ ਅੱਜ ਹੋਈਆਂ ਰਾਸ਼ਟਰਪਤੀ ਚੋਣਾਂ ਵਿੱਚ ਕਾਰਜਕਾਰੀ ਰਾਸ਼ਟਰਪਤੀ ਰਾਨਿਲ ਵਿਕਰਾਮਸਿੰਘੇ  ਨੂੰ ਨਵਾਂ ਰਾਸ਼ਟਰਪਤੀ ਚੁਣ ਲਿਆ ਗਿਆ ਹੈ। ਉਸ ਨੇ ਤਿਕੋਣਾ ਮੁਕਾਬਲਾ ਜਿੱਤਿਆ। ਸੰਸਦ ਮੈਂਬਰਾਂ ਨੇ ਮੰਗਲਵਾਰ ਨੂੰ ਕਾਰਜਕਾਰੀ ਰਾਸ਼ਟਰਪਤੀ ਰਾਨਿਲ ਵਿਕਰਾਮਸਿੰਘੇ ਸਮੇਤ ਤਿੰਨ ਨਾਮ ਉਮੀਦਵਾਰਾਂ ਦੇ ਤੌਰ 'ਤੇ ਪ੍ਰਸਤਾਵਿਤ ਕੀਤੇ।

ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਵਿਕਰਮਾਸਿੰਘੇ ਸਾਬਕਾ ਰਾਸ਼ਟਰਪਤੀ ਰਾਜਪਕਸ਼ੇ ਦੇ ਬਾਕੀ ਬਚੇ ਕਾਰਜਕਾਲ ਲਈ ਨਵੰਬਰ 2024 ਤੱਕ ਸੇਵਾ ਕਰਨਗੇ। ਰਾਸ਼ਟਰਪਤੀ ਦੇ ਅਹੁਦੇ ਲਈ ਪ੍ਰਸਤਾਵਿਤ ਤਿੰਨ ਨਾਵਾਂ ਵਿੱਚ ਰਾਨਿਲ ਵਿਕਰਮਸਿੰਘੇ (73), ਦੁੱਲਾਸ ਅਲਹਾਪੇਰੁਮਾ (63) ਅਤੇ ਅਨੁਰਾ ਕੁਮਾਰਾ ਦਿਸਾਨਾਇਕ (53) ਸਨ। ਅਲਹਾਪੇਰੁਮਾ ਇੱਕ ਕੱਟੜ ਸਿੰਹਲੀ ਬੋਧੀ ਰਾਸ਼ਟਰਵਾਦੀ ਹਨ ਅਤੇ ਸੱਤਾਧਾਰੀ ਸ੍ਰੀਲੰਕਾ ਪੋਦੁਜਾਨਾ ਪੇਰਾਮੁਨਾ (SLPP) ਪਾਰਟੀ ਦੇ ਮੈਂਬਰ ਹਨ। ਮੁੱਖ ਵਿਰੋਧੀ ਧਿਰ ਦੇ ਨੇਤਾ ਐਸ ਪ੍ਰੇਮਦਾਸਾ ਨੇ ਸਮਰਥਨ ਦੇ ਕੇ ਆਪਣਾ ਨਾਂ ਵਾਪਸ ਲੈ ਲਿਆ ਹੈ। ਦੂਜੇ ਪਾਸੇ ਦਿਸਾਨਾਇਕ ਖੱਬੇਪੱਖੀ ਜਨਤਾ ਵਿਮੁਕਤੀ ਪੇਰਾਮੁਨਾ (ਜੇਵੀਪੀ) ਦਾ ਪ੍ਰਮੁੱਖ ਮੈਂਬਰ ਹੈ। 

ਇਸ ਤੋਂ ਪਹਿਲਾਂ ਵਿਕਰਾਮਸਿੰਘੇ ਅਤੇ ਵਿਰੋਧੀ ਧਿਰ ਦੇ ਨੇਤਾ ਸਜੀਥ ਪ੍ਰੇਮਦਾਸਾ ਸਮੇਤ ਕਈ ਨੇਤਾ ਸੰਸਦ ਪਹੁੰਚੇ ਅਤੇ ਵੋਟ ਪਾਈ। ਪ੍ਰੇਮਦਾਸ ਨੇ ਟਵੀਟ ਕਰ ਕਿਹਾ, ''ਅਸੀਂ ਭ੍ਰਿਸ਼ਟਾਚਾਰ ਵਿਰੋਧੀ, ਸਾਰਿਆਂ ਲਈ ਖੁਸ਼ਹਾਲੀ, ਭਰੋਸੇਮੰਦ ਅਤੇ ਪਾਰਦਰਸ਼ੀ ਸਰਕਾਰ ਦਾ ਸਮਰਥਨ ਕਰਾਂਗੇ।'' ਪ੍ਰੇਮਦਾਸਾ ਨੇ ਕੱਲ੍ਹ ਰਾਸ਼ਟਰਪਤੀ ਅਹੁਦੇ ਲਈ ਆਪਣੀ ਉਮੀਦਵਾਰੀ ਵਾਪਸ ਲੈ ਲਈ ਸੀ। ਉਧਰ ਆਰਥਿਕ ਮੰਦਹਾਲੀ ਅਤੇ ਮੌਜੂਦਾ ਹਾਲਾਤ ਦੇ ਮੱਦੇਨਜ਼ਰ ਲੋਕਾਂ ਵਲੋਂ ਰਾਸ਼ਟਰਪਤੀ ਭਵਨ ਦੇ ਬਾਹਰ ਇਕੱਠੇ ਹੋ ਕੇ ਉਨ੍ਹਾਂ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ।