ਹਾਂਗਕਾਂਗ:  ਹਾਲ ਹੀ ਵਿਚ ਹਾਂਗਕਾਂਗ ’ਚ 15.81 ਕੈਰੇਟ ਦਾ ਪਰਪਲ ਪਿੰਕ ਹੀਰਾ ਨਿਲਾਮ ਹੋਇਆ ਹੈ, ਇਸ ਦੀ ਵਿਕਰੀ 29.3 ਮਿਲੀਅਨ ਡਾਲਰ (ਕਰੀਬ 213 ਕਰੋੜ ਰੁਪਏ) ਵਿਚ ਹੋਈ ਹੈ। ਹੀਰੇ ਦਾ ਨਾਂਅ ‘ਦ ਸਾਕੁਰਾ’ ਰੱਖਿਆ ਗਿਆ ਹੈ ਜੋ ਕਿ ਇਕ ਜਪਾਨੀ ਸ਼ਬਦ ਹੈ। ਇਸ ਦਾ ਮਤਲਬ ਹੁੰਦਾ ਹੈ ਚੇਰੀ ਬਲੌਸਮ (Cherry blossom)।

ਇਸ ਹੀਰੇ ਦੀ ਖ਼ਾਸੀਅਤ ਇਹ ਹੈ ਕਿ ਉਹ ਨਿਲਾਮੀ ਵਿਚ ਪ੍ਰਦਰਸ਼ਿਤ ਕੀਤਾ ਗਿਆ ਹੁਣ ਤੱਕ ਦਾ ਸਭ ਤੋਂ ਵੱਡਾ ਪਰਪਲ ਪਿੰਕ ਹੀਰਾ (Purple Pink Diamond) ਹੈ। ਇਸ ਦੇ ਨਾਲ ਹੀ ਇਹ ਸਭ ਤੋਂ ਜ਼ਿਆਦਾ ਕੀਮਤ ’ਤੇ ਵਿਕਣ ਵਾਲਾ ਪਰਪਲ ਪਿੰਕ ਹੀਰਾ ਵੀ ਬਣ ਗਿਆ ਹੈ। ਹੀਰੇ ਨੂੰ ਪਲੈਟੀਨਮ ਦੀ ਇਕ ਅੰਗੂਠੀ ਵਿਚ ਜੜ ਕਰਕੇ ਨਿਲਾਮ ਕੀਤਾ ਗਿਆ। ਇਸ ਦੀ ਸਫ਼ਲ ਬੋਲੀ ਇਕ ਏਸ਼ੀਆਈ ਨਿੱਜੀ ਖਰੀਦਦਾਰ ਨੇ ਲਗਾਈ ਹੈ।

ਨਿਲਾਮੀ ਤੋਂ ਪਹਿਲਾਂ ਉਮੀਦ ਜਤਾਈ ਜਾ ਰਹੀ ਸੀ ਕਿ ਹੀਰੇ ਦੀ ਬੋਲੀ 279 ਕਰੋੜ ਰੁਪਏ ਤੱਕ ਲੱਗ ਸਕਦੀ ਹੈ। ਇਸ ਤੋਂ ਪਹਿਲਾਂ ਪਰਪਲ ਪਿੰਕ ਰੰਗ ਦਾ 14.8 ਕੈਰੇਟ ਦਾ ਹੀਰਾ ਬੀਤੇ ਸਾਲ 196 ਕਰੋੜ ਰੁਪਏ ਵਿਚ ਨਿਲਾਮ ਹੋਇਆ ਸੀ। ਸਾਕੁਰਾ ਨੇ ਇਸ ਦਾ ਰਿਕਾਰਡ ਵੀ ਤੋੜ ਦਿੱਤਾ ਹੈ।