Photo

ਨਵੀਂ ਦਿੱਲੀ: ਸੋਸ਼ਲ ਮੀਡੀਆ 'ਤੇ ਨਾਰਥ ਕੋਰੀਆ ਦੇ 36 ਸਾਲ ਦੇ ਸ਼ਾਸਕ ਕਿਮ ਜੋਂਗ ਓਨ ਨੂੰ ਲੈ ਕੇ ਕਈ ਤਰ੍ਹਾਂ ਦੀਆਂ ਅਫ਼ਵਾਹਾਂ ਫੈਲ ਰਹੀਆਂ ਹਨ। ਸਿਰਫ ਇਹੀ ਨਹੀਂ ਕੁੱਝ ਅੰਤਰਰਾਸ਼ਟਰੀ ਮੀਡੀਆ ਨੇ ਵੀ ਕਿਮ ਦੀ ਸਿਹਤ ਨਾਲ ਜੁੜੀਆਂ ਖ਼ਬਰਾਂ ਛਾਪੀਆਂ ਹਨ। ਇਹਨਾਂ ਖ਼ਬਰਾਂ ਵਿਚ ਵੱਖ-ਵੱਖ ਗੱਲਾਂ ਕਹੀਆਂ ਗਈਆਂ ਹਨ।

ਕਿਮ ਨੂੰ 11 ਅਪ੍ਰੈਲ ਤੋਂ ਬਾਅਦ ਦੇਸ਼ ਦੇ ਕਿਸੇ ਵੀ ਜਨਤਕ ਸਮਾਰੋਹ ਵਿਚ ਨਹੀਂ ਦੇਖਿਆ ਗਿਆ ਹੈ। ਇਸ ਤੋਂ ਬਾਅਦ ਉਹਨਾਂ ਦੀ ਸਿਹਤ ਨੂੰ ਲੈ ਕੇ ਕਈ ਤਰ੍ਹਾਂ ਦੇ ਕਿਆਸ ਲਗਾਏ ਜਾਣ ਲੱਗੇ। ਕਿਮ ਜੋਂਗ 15 ਅਪ੍ਰੈਲ ਨੂੰ ਅਪਣੇ ਦਾਦਾ ਦੇ ਜਨਮ ਸਮਾਰੋਹ 'ਤੇ ਆਯੋਜਿਤ ਕੀਤੇ ਗਏ ਪ੍ਰੋਗਰਾਮ ਵਿਚ ਵੀ ਸ਼ਾਮਿਲ ਨਹੀਂ ਹੋਏ ਜਦਕਿ ਨਾਰਥ ਕੋਰੀਆ ਦੇ ਜਨਕ ਕਿਮ ਸੰਗ ਦੇ ਜਨਮ ਦਿਨ ਨੂੰ ਵੱਡੇ ਪੱਧਰ 'ਤੇ ਮਨਾਇਆ ਜਾਂਦਾ ਹੈ ਅਤੇ ਇਸ ਦੌਰਾਨ ਦੇਸ਼ ਵਿਚ ਛੁੱਟੀਆਂ ਵੀ ਹੁੰਦੀਆਂ ਹਨ।

ਕਿਮ ਦੀ ਸਿਹਤ ਨੂੰ ਲੈ ਕੇ ਨਾਰਥ ਕੋਰੀਆ ਦੀ ਸਰਕਾਰ ਵੱਲੋਂ ਕੋਈ ਬਿਆਨ ਨਹੀਂ ਜਾਰੀ ਕੀਤਾ ਗਿਆ ਪਰ ਸਾਊਥ ਕੋਰੀਆ ਦੀ ਸਰਕਾਰ ਨੇ ਕਿਮ ਦੀ ਖ਼ਰਾਬ ਸਿਹਤ ਨਾਲ ਜੁੜੀਆਂ ਰਿਪੋਰਟਾਂ ਨੂੰ ਖਾਰਜ ਕਰ ਦਿੱਤਾ ਹੈ। ਕਿਮ ਜੋਂਗ ਦੀ ਸਿਹਤ ਨਾਲ ਜੁੜੀਆਂ ਖ਼ਬਰਾਂ ਨੂੰ ਲੈ ਕੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੀ ਕਿਹਾ ਸੀ ਕਿ ਅਮਰੀਕਾ ਦੇ ਕੋਲ ਇਸ ਬਾਰੇ ਭਰੋਸੇਯੋਗ ਜਾਣਕਾਰੀ ਨਹੀਂ ਹੈ। 

ਸੀਐਨਐਨ ਮੁਤਾਬਕ ਸਾਊਥ ਕੋਰੀਆ ਦੇ ਰੱਖਿਆ ਮੰਤਰਾਲੇ ਨੇ ਇਸ ਮਾਮਲੇ 'ਤੇ 'ਨੋ ਕੁਮੈਂਟ' ਕਿਹਾ ਸੀ। ਨਿਊਜ਼ ਏਜੰਸੀ ਰਾਇਟਰਸ ਨੇ ਸ਼ੁੱਕਰਵਾਰ ਨੂੰ ਅਪਣੀ ਰਿਪੋਰਟ ਵਿਚ ਦੱਸਿਆ ਕਿ ਚੀਨ ਨੇ ਮੈਡੀਕਲ ਮਾਹਰਾਂ ਦੀ ਇਕ ਟੀਮ ਨੂੰ ਨਾਰਥ ਕੋਰੀਆ ਭੇਜਿਆ ਹੈ। ਇਹ ਟੀਮ ਕਿਮ ਦੀ ਸਿਹਤ ਨੂੰ ਲੈ ਕੇ ਸਲਾਹ ਦੇਵੇਗੀ।

ਹਾਲਾਂਕਿ ਰਾਇਟਰਸ ਦੀ ਰਿਪੋਰਟ ਵਿਚ ਇਹ ਵੀ ਕਿਹਾ ਗਿਆ ਹੈ ਕਿ ਚੀਨ ਤੋਂ ਮੈਡੀਕਲ ਮਾਹਰ ਭੇਜੇ ਜਾਣ ਦੀ ਸੂਚਨਾ ਦੇ ਬਾਵਜੂਦ ਇਹ ਨਹੀਂ ਪਤਾ ਕੀਤਾ ਜਾ ਸਕਦਾ ਕਿ ਕਿਮ ਦੀ ਸਿਹਤ ਕਿਵੇਂ ਹੈ। ਮੀਡੀਆ ਅਨੁਸਾਰ ਨਾਰਥ ਕੋਰੀਆ ਵਿਚ ਸਰਕਾਰ ਨਾਲ ਸਬੰਧਿਤ ਸੂਚਨਾਵਾਂ ਬੇਹੱਦ ਗੁਪਤ ਰੱਖੀਆਂ ਜਾਂਦੀਆਂ ਹਨ। ਨਾਰਥ ਕੋਰੀਆ ਦਾ ਸਰਕਾਰੀ ਮੀਡੀਆ ਇਸ ਪੂਰੇ ਮਾਮਲੇ 'ਤੇ ਫਿਲਹਾਲ ਚੁੱਪ ਹੈ।