Bhai Ranjit Singh Ji Dhadrianwale

ਪਟਿਆਲਾ: ਸਿੱਖ ਪ੍ਰਚਾਰਕ ਭਾਈ ਰਣਜੀਤ ਸਿੰਘ ਢੱਡਰੀਆਂ ਵਾਲੇ ਨੇ ਇਕ ਵਾਰ ਫਿਰ ਤੋਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ 'ਤੇ ਤਿੱਖਾ ਨਿਸ਼ਾਨਾ ਸਾਧਦਿਆਂ ਉਨ੍ਹਾਂ ਵੱਲੋਂ ਕੀਤੀ ਗਈ ਇਕ ਕਥਾ 'ਤੇ ਸਵਾਲ ਖੜ੍ਹੇ ਕੀਤੇ ਹਨ। ਉਹਨਾਂ ਨੇ ਸਵਾਲ ਕੀਤਾ ਕਿ ਜਥੇਦਾਰ ਦੀ ਪੀਐਚਡੀ ਕਿੱਥੇ ਗਈ ਜੋ ਦਰਬਾਰ ਸਾਹਿਬ ਤੋਂ ਕਥਾ ਕਰਕੇ ਇਹ ਆਖਦੇ ਹਨ ਕਿ ਧਰਤੀ ਰਾਖਸ਼ਾਂ ਦੀ ਮਿੱਝ ਤੋਂ ਬਣੀ ਸੀ।

ਭਾਈ ਰਣਜੀਤ ਸਿੰਘ ਢੱਡਰੀਆਂ ਵਾਲੇ ਨੇ ਕਿਹਾ ਕਿ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਜੋ ਮਰਜ਼ੀ ਬੋਲੀ ਜਾਣ ਕਿਸੇ ਦੀ ਜ਼ੁਬਾਨ ਨਹੀਂ ਖੁੱਲ਼੍ਹਦੀ। ਉਹਨਾਂ ਕਿਹਾ ਕਿ ‘ਜਥੇਦਾਰ ਨੇ ਮੂੰਹ ‘ਚ ਘੁੰਗਣੀਆਂ ਪਾ ਲਈਆਂ ਹਨ। ਜੇਕਰ ਉਹਨਾਂ ਨੇ ਕਿਹਾ ਕਿ ਇਕਬਾਲ ਸਿੰਘ ਨੇ ਗਲਤ ਕਿਹਾ ਹੈ ਤਾਂ ਇਕਬਾਲ ਸਿੰਘ ਉਹਨਾਂ ਅੱਗੇ ਗ੍ਰੰਥ ਖੋਲ੍ਹ ਕੇ ਰੱਖ ਦੇਣਗੇ ਤੇ ਫਿਰ ਢੱਡਰੀਆਂ ਵਾਲਾ ਸੱਚਾ ਹੋ ਜਾਵੇਗਾ, ਕਿਉਂਕਿ ਉਹ ਤਾਂ ਪਹਿਲਾਂ ਤੋਂ ਹੀ ਕਹਿ ਰਿਹਾ ਹੈ ਕਿ ਗ੍ਰੰਥਾਂ ਵਿਚ ਗਲਤ ਲਿਖਿਆ ਹੈ ਤੇ ਮਿਲਾਵਟ ਹੈ, ਇਸ ਲਈ ਉਹ ਚੁੱਪ ਹੀ ਕਰ ਗਏ’।  

ਭਾਈ ਰਣਜੀਤ ਸਿੰਘ ਨੇ ਕਿਹਾ ਕਿ ਜਦੋਂ ਉਹਨਾਂ ਨੇ ਦਰਬਾਰ ਸਾਹਿਬ ਤੋਂ ਜਥੇਦਾਰ ਦੀ ਕਥਾ ਸੁਣੀ ਤਾਂ ਉਹ ਹੈਰਾਨ ਹੋ ਗਏ। ਉਹਨਾਂ ਨੇ ਕਥਾ ਦੌਰਾਨ ਕਿਹਾ ਕਿ ਧਰਤੀ ਰਾਖਸ਼ਾਂ ਦੀ ਮਿੱਝ ਤੋਂ ਬਣੀ ਹੈ। ਭਾਈ ਢੱਡਰੀਆਂਵਾਲੇ ਨੇ ਕਿਹਾ ਕਿ ਜਦੋਂ ਸਾਡੇ ਬੱਚੇ ਵਿਦੇਸ਼ਾਂ ਵਿਚ ਜਾਣਗੇ ਤਾਂ ਜੇਕਰ ਉਹ ਉੱਥੇ ਦੱਸਣਗੇ ਧਰਤੀ ਰਾਖਸ਼ਾਂ ਦੀ ਮਿੱਝ ਤੋਂ ਬਣੀ ਹੈ ਤਾਂ ਲੋਕ ਹੱਸਣਗੇ ਤੇ ਉਹਨਾਂ ਕਿਹਾ ਕਿ ਜਥੇਦਾਰ ਸਾਹਿਬ ਨੇ ਪੀਐਚਡੀ ਕੀਤੀ ਹੈ।

ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਵੀ ਭਾਈ ਰਣਜੀਤ ਸਿੰਘ ਢੱਡਰੀਆਂ ਵਾਲੇ ਗਿਆਨੀ ਹਰਪ੍ਰੀਤ ਸਿੰਘ 'ਤੇ ਕਈ ਵਾਰ ਨਿਸ਼ਾਨਾ ਸਾਧ ਚੁੱਕੇ ਹਨ। ਉਹਨਾਂ ਨੇ ਮੋਦੀ ਅਤੇ ਇਕਬਾਲ ਸਿੰਘ ਵੱਲੋਂ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਸਬੰਧੀ ਦਿੱਤੇ ਗਏ ਬਿਆਨ ਨੂੰ ਲੈ ਕੇ ਜਥੇਦਾਰ ਦੀ ਚੁੱਪੀ 'ਤੇ ਵੀ ਸਵਾਲ ਉਠਾਏ ਸਨ।