ਕੋਰੋਨਾ ਵਾਇਰਸ ਲੌਕਡਾਊਨ ਦੇ ਚਲਦਿਆਂ ਸਾਰੀਆਂ ਅੰਤਰਾਸ਼ਟਰੀ ਅਤੇ ਘਰੇਲੂ ਉਡਾਨਾਂ ਰੱਦ ਹਨ।
ਨਵੀਂ ਦਿੱਲੀ: ਕੋਰੋਨਾ ਵਾਇਰਸ ਲੌਕਡਾਊਨ ਦੇ ਚਲਦਿਆਂ ਸਾਰੀਆਂ ਅੰਤਰਾਸ਼ਟਰੀ ਅਤੇ ਘਰੇਲੂ ਉਡਾਨਾਂ ਰੱਦ ਹਨ। ਇਸ ਦੌਰਾਨ ਇਕ ਫੋਟੋ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਹੈ। ਇਸ ਵਿਚ ਭਾਜਪਾ ਸੰਸਦ ਮੈਂਬਰ ਦੀ ਪਤਨੀ ਸਪਾਈਸਜੈੱਟ ਦੀ ਉਡਾਨ ਵਿਚ ਬੈਠੀ ਦਿਖਾਈ ਦੇ ਰਹੀ ਹੈ।
ਪੋਸਟ ਜ਼ਰੀਏ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਜਿੱਥੇ ਇਕ ਪਾਸੇ ਲੱਖਾਂ ਪਰਵਾਸੀ ਮਜ਼ਦੂਰ ਹਜ਼ਾਰਾਂ ਮੀਲ ਪੈਦਲ ਅਪਣੇ ਗ੍ਰਹਿ ਰਾਜਾਂ ਨੂੰ ਜਾ ਰਹੇ ਹਨ ਤਾਂ ਦੂਜੇ ਪਾਸੇ ਪੱਛਮੀ ਬੰਗਾਲ ਦੇ ਬਿਸ਼ਨਪੁਰ ਤੋਂ ਭਾਜਪਾ ਦੇ ਲੋਕ ਸਭਾ ਮੈਂਬਰ, ਸੌਮਿੱਤਰਾ ਖਾਨ ਦੀ ਪਤਨੀ ਲੌਕਡਾਊਨ ਦੌਰਾਨ ਸਪਾਈਸਜੈੱਟ ਦੀ ਉਡਾਣ 'ਤੇ ਕੋਲਕਾਤਾ ਲਈ ਰਵਾਨਾ ਹੋਈ।
ਨਿਊਜ਼ ਚੈਨਲ ਦੇ ਐਂਟੀ ਫੈਕ ਨਿਊਜ਼ ਵਾਰ ਰੂਮ ਨੇ ਪਾਇਆ ਕਿ ਇਹ ਪੋਸਟ ਗਲਤ ਹੈ। ਦਰਅਸਲ ਭਾਜਪਾ ਸੰਸਦ ਮੈਂਬਰ ਦੀ ਪਤਨੀ ਸੁਜਾਤਾ ਮੰਡਾਲ ਖਾਨ ਨੇ ਫਲਾਈਟ ਦੀਆਂ ਕੁਝ ਪੁਰਾਣੀਆਂ ਫੋਟੋਆਂ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੀਆਂ ਸਨ। ਲੌਕਡਾਊਨ ਦੌਰਾਨ ਸਪਾਈਸਜੈੱਟ ਵੱਲੋਂ ਕੋਈ ਵੀ ਯਾਤਰੀ ਉਡਾਣ ਸੰਚਾਲਿਤ ਨਹੀਂ ਕੀਤੀ ਗਈ।
ਦਾਅਵਾ
22 ਅਪ੍ਰੈਲ ਨੂੰ ਸੁਜਾਰਾ ਮੰਡਾਲ ਖਾਨ ਨੇ ਸਪਾਈਸਜੈੱਟ ਦੀ ਉਡਾਨ ਵਿਚ ਮਾਸਕ ਪਾ ਕੇ ਕੁਝ ਸੈਲਫੀਆਂ ਅਪਲੋਡ ਕੀਤੀਆਂ ਸੀ। ਇਸ ਨਾਲ ਬੰਗਾਲੀ ਵਿਚ ਕੈਪਸ਼ਨ ਵੀ ਦਿੱਤਾ ਗਿਆ ਸੀ, ਜਿਸ ਦਾ ਅਨੁਵਾਦ ਹੈ ਕਿ, 'ਜਦੋਂ ਤੁਸੀਂ ਘਰ ਵਾਪਸ ਆਉਂਦੇ ਹੋ ਤਾਂ ਇਹ ਇਕ ਵੱਖਰੀ ਕਿਸਮ ਦੀ ਖ਼ੁਸ਼ੀ ਹੁੰਦੀ ਹੈ। ਕੋਲਕਾਤਾ 'ਖ਼ੁਸ਼ੀ ਦਾ ਸ਼ਹਿਰ' ਅਤੇ ਦਿੱਲੀ 'ਦਿਲਵਾਲੋ ਕੀ'।
ਇਸ ਤੋਂ ਤੁਰੰਤ ਬਾਅਦ ਕੁਝ ਲੋਕ ਪਰਵਾਸੀ ਮਜ਼ਦੂਰਾਂ ਦੀਆਂ ਫੋਟੋਆਂ ਸ਼ੇਅਰ ਕਰਨ ਲੱਗੇ ਤੇ ਦਾਅਵਾ ਕੀਤਾ ਜਾਣ ਲੱਗਿਆ ਕਿ 'ਇਕ ਪਾਸੇ ਪਰਵਾਸੀ ਮਜ਼ਦੂਰ ਪੈਦਲ ਅਪਣੇ ਰਾਜਾਂ ਨੂੰ ਜਾ ਰਹੇ ਹਨ ਅਤੇ ਲੌਕਡਾਊਨ ਦੌਰਾਨ ਭਾਜਪਾ ਆਗੂ ਦੀ ਪਤਨੀ ਸਪਾਈਸਜੈੱਟ ਦੀ ਫਲਾਈਟ ਵਿਚ ਕੋਲਕਾਤਾ ਪਹੁੰਚੀ ਹੈ'। ਇਸ ਦੇ ਨਾਲ ਹੀ ਲਿਖਿਆ ਸੀ ਕਿ, 'ਸਭ ਕੁਝ ਯਾਦ ਰੱਖਿਆ ਜਾਵੇਗਾ'। ਇਹ ਪੋਸਟ ਫੇਸਬੁੱਕ ਅਤੇ ਟਵਿਟਰ `ਤੇ ਸ਼ੇਅਰ ਕੀਤੀ ਗਈ ਸੀ।
ਸਪਾਈਸਜੈੱਟ ਦਾ ਦਾਅਵਾ
ਜਦੋਂ ਇਸ ਸਬੰਧੀ ਸਪਾਈਸਜੈੱਟ ਦੇ ਬੁਲਾਰੇ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ , 'ਸਪਾਈਸਜੈੱਟ ਨੇ ਸਰਕਾਰ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਲੌਕਡਾਊਨ ਦੌਰਾਨ ਯਾਤਰੀ ਉਡਾਨਾਂ ਦੇ ਸੰਚਾਲਨ ਨੂੰ ਮੁਅੱਤਲ ਕੀਤਾ ਗਿਆ ਹੈ। ਇਸ ਦੌਰਾਨ ਕੋਈ ਵੀ ਯਾਤਰੀ ਉਡਾਨ ਨਹੀਂ ਚਲਾਈ ਗਈ'। ਇਸ ਦੀ ਪੁਸ਼ਟੀ ਸਪਾਈਸਜੈੱਟ ਵੱਲੋਂ ਅਪਣੇ ਟਵਿਟਰ ਹੈਂਡਲ 'ਤੇ ਵੀ ਦਿੱਤੀ ਗਈ।
ਐਮਪੀ ਦੀ ਪਤਨੀ ਦਾ ਬਿਆਨ
ਇਸ ਸਬੰਧੀ ਸੁਜਾਤਾ ਮੰਡਾਲ ਖਾਨ ਨੇ ਕਿਹਾ ਕਿ ਉਹਨਾਂ ਨੇ 23 ਮਾਰਤ 2020 ਨੂੰ 10.40 ਵਜੇ ਨਵੀਂ ਦਿੱਲੀ ਤੋਂ ਕੋਲਕਾਤਾ ਲਈ ਉਡਾਨ ਲਈ ਸੀ। ਉਹਨਾਂ ਨੇ ਬੋਰਡਿੰਗ ਪਾਸ ਦੀ ਫੋਟੋ ਵੀ ਸਾਂਝੀ ਕੀਤੀ। ਉਹਨਾਂ ਕਿਹਾ ਕਿ ਉਹ ਹੁਣ ਅਪਣੀ ਰਿਹਾਇਸ਼ ਵਿਚ ਰਹਿ ਰਹੀ ਹੈ ਤੇ ਇਸ ਦੌਰਾਨ ਉਹਨਾਂ ਨੇ ਅਪਣੀਆਂ ਪੁਰਾਣੀਆਂ ਫੋਟੋਆਂ ਨੂੰ ਸੋਸ਼ਲ ਮੀਡੀਆ ਜ਼ਰੀਏ ਸ਼ੇਅਰ ਕੀਤਾ। ਉਹਨਾ ਕਿਹਾ ਕਿ ਤ੍ਰਿਣਮੂਲ ਕਾਂਗਰਸ ਵਲੋਂ ਉਹਨਾਂ ਦਾ ਅਕਸ ਖਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਇਸ ਤੋਂ ਸਾਬਿਤ ਹੁੰਦਾ ਹੈ ਕਿ ਵਾਇਰਲ ਹੋ ਰਹੀ ਪੋਸਟ ਬਿਲਕੁਲ ਗਲਤ ਹੈ।
ਫੈਕਟ ਚੈੱਕ
ਦਾਅਵਾ- ਭਾਜਪਾ ਦੇ ਬੰਗਾਲ ਤੋਂ ਸੰਸਦ ਮੈਂਬਰ ਸੌਮਿੱਤਰਾ ਖਾਨ ਦੀ ਪਤਨੀ ਲੌਕਡਾਊਨ ਦੌਰਾਨ ਸਪਾਈਸਜੈੱਟ ਦੀ ਉਡਾਨ ਰਾਹੀਂ ਕੋਲਕਾਤਾ ਗਈ।
ਸੱਚ- ਸੌਮਿੱਤਰਾ ਖਾਨ ਦੀ ਪਤਨੀ ਵੱਲੋਂ ਕੁਝ ਪੁਰਾਣੀਆਂ ਫੋਟੋਆਂ ਸ਼ੇਅਰ ਕੀਤੀਆਂ ਗਈਆਂ ਸਨ। ਲੌਕਡਾਊਨ ਦੌਰਾਨ ਸਾਰੀਆਂ ਅੰਤਰਰਾਸ਼ਟਰੀ ਅਤੇ ਘਰੇਲੂ ਉਡਾਨਾਂ ਬੰਦ ਹਨ।