ਕੀ ਤੁਸੀਂ ਜਾਣਦੇ ਹੋ ਕਿ ਕਿਵੇਂ ਠੱਗ ਮਦਦ ਮੰਗਣ ਦੇ ਬਹਾਨੇ ਤੁਹਾਡੇ ਖਾਤੇ ਨੂੰ ਖਾਲੀ ਕਰ ਸਕਦੇ ਹਨ?
OTP Scam: ਲੋਕਾਂ ਨੂੰ ਅਪਣੇ ਜਾਲ ਵਿਚ ਫਸਾਉਣ ਲਈ ਠੱਗਾਂ ਵਲੋਂ ਆਏ ਦਿਨ ਨਵੀਆਂ ਤਰਕੀਬਾਂ ਲਗਾਈਆਂ ਜਾਂਦੀਆਂ ਹਨ, ਜਿਨ੍ਹਾਂ ਵਿਚੋਂ ਇਕ ਹੈ OTP ਸਕੈਮ। ਤੁਸੀਂ OTP ਸਕੈਮ ਬਾਰੇ ਬਹੁਤ ਸੁਣਿਆ ਹੋਵੇਗਾ, ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਕਿਵੇਂ ਠੱਗ ਮਦਦ ਮੰਗਣ ਦੇ ਬਹਾਨੇ ਤੁਹਾਡੇ ਖਾਤੇ ਨੂੰ ਖਾਲੀ ਕਰ ਸਕਦੇ ਹਨ?
ਇਸ ਦੌਰਾਨ ਠੱਗ ਪਹਿਲਾਂ ਮਦਦ ਲਈ ਤੁਹਾਡਾ ਫ਼ੋਨ ਮੰਗਣਗੇ। ਇਸ ਦੇ ਲਈ ਉਹ ਫੋਨ ਦੀ ‘ਬੈਟਰੀ ਖਤਮ ਹੋ ਗਈ’ ਆਦਿ ਦਾ ਬਹਾਨਾ ਲਗਾ ਸਕਦੇ ਹਨ। ਇਸ ਲਈ ਜੇਕਰ ਕੋਈ ਅਣਜਾਣ ਵਿਅਕਤੀ ਰਾਹ ਵਿਚ ਤੁਹਾਡੇ ਕੋਲੋਂ ਤੁਹਾਡਾ ਫੋਨ ਮੰਗੇ ਤਾਂ ਸਾਵਧਾਨ ਰਹਿਣ ਦੀ ਲੋੜ ਹੈ।
ਹਾਲਾਂਕਿ ਜ਼ਰੂਰੀ ਨਹੀਂ ਕਿ ਹਰ ਵਿਅਕਤੀ ਇਹੋ-ਜਿਹਾ ਹੋਵੇ। ਅਜਿਹੀ ਸਥਿਤੀ ਵਿਚ, ਇਹ ਹੋ ਸਕਦਾ ਹੈ ਕਿ ਕੋਈ ਵਿਅਕਤੀ ਅਸਲ ਵਿਚ ਮੁਸੀਬਤ ਵਿਚ ਹੈ ਅਤੇ ਇਕ ਜ਼ਰੂਰੀ ਕਾਲ ਕਰਨ ਲਈ ਤੁਹਾਡਾ ਫੋਨ ਮੰਗ ਰਿਹਾ ਹੈ, ਪਰ ਦੂਜੇ ਪਾਸੇ, ਇਹ ਵੀ ਹੋ ਸਕਦਾ ਹੈ ਕਿ ਕੋਈ ਧੋਖੇਬਾਜ਼ ਤੁਹਾਡਾ ਫੋਨ ਲੈ ਕੇ ਤੁਹਾਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।
ਇੰਝ ਕਰਦੇ ਨੇ ਧੋਖਾਧੜੀ
ਧੋਖਾਧੜੀ ਕਰਨ ਵਾਲੇ ਪਹਿਲਾਂ ਤੁਹਾਨੂੰ ਤੁਹਾਡੇ ਫੋਨ ਤੋਂ ਕਾਲ ਕਰਨ ਲਈ ਕਹਿਣਗੇ, ਜਿਵੇਂ ਹੀ ਤੁਸੀਂ ਅਪਣਾ ਉਸ ਨੂੰ ਫੋਨ ਦਿੰਦੇ ਹੋ, ਉਹ ਤੁਹਾਡੇ ਨੰਬਰ ਤੋਂ ਅਪਣੇ ਸਾਥੀ ਨੂੰ ਫੋਨ ਕਰੇਗਾ। ਅਜਿਹਾ ਕਰਨ ਦੇ ਨਾਲ ਹੀ ਤੁਹਾਡਾ ਨੰਬਰ ਉਸ ਦੇ ਸਾਥੀ ਕੋਲ ਚਲਾ ਜਾਵੇਗਾ ਅਤੇ ਤੁਹਾਡੇ ਫੋਨ ਉਤੇ ਇਕ ਓਟੀਪੀ ਭੇਜੇਗਾ। ਜੋ ਵਿਅਕਤੀ ਤੁਹਾਡੇ ਫੋਨ 'ਤੇ ਗੱਲ ਕਰ ਰਿਹਾ ਹੈ, ਉਹ ਬਹੁਤ ਚਲਾਕੀ ਨਾਲ OTP ਨੂੰ ਦੇਖੇਗਾ ਅਤੇ ਇਸ ਤਰ੍ਹਾਂ ਦਿਖਾਈ ਦੇਵੇਗਾ ਜਿਵੇਂ ਦੂਜਾ ਵਿਅਕਤੀ ਪੁੱਛ ਰਿਹਾ ਹੈ ਕਿ ਤੁਸੀਂ ਕਿਸ ਸਮੇਂ ਪਹੁੰਚੇ ਹੋ।
ਉਦਾਹਰਨ ਵਜੋਂ, ਜੇਕਰ ਸਾਹਮਣੇ ਵਾਲਾ ਵਿਅਕਤੀ ਪੁੱਛਦਾ ਹੈ ਕਿ ਤੁਸੀਂ ਕਿੰਨੇ ਸਮੇਂ 'ਤੇ ਪਹੁੰਚ ਗਏ ਹੋ ਅਤੇ OTP 1055 ਹੈ, ਤਾਂ ਤੁਹਾਡੇ ਫ਼ੋਨ 'ਤੇ ਗੱਲ ਕਰਨ ਵਾਲਾ ਵਿਅਕਤੀ ਬੜੀ ਚਲਾਕੀ ਨਾਲ 10:55 'ਤੇ ਕਹੇਗਾ। ਅਜਿਹੀ ਸਥਿਤੀ ਵਿਚ ਤੁਹਾਡਾ ਬੈਂਕ ਖਾਤਾ ਖਾਲੀ ਹੋ ਸਕਦਾ ਹੈ। ਇਸ ਲਈ ਤੁਹਾਡੀ ਇਕ ਛੋਟੀ ਜਿਹੀ ਗਲਤੀ ਤੁਹਾਨੂੰ ਵੱਡਾ ਨੁਕਸਾਨ ਪਹੁੰਚਾ ਸਕਦੀ ਹੈ।
