ਕੰਪਨੀ ਅਮਰੀਕਾ ਤੋਂ ਬਾਹਰੋਂ ਸਸਤੇ ਕਰਮਚਾਰੀ ਰੱਖੇਗੀ

Google layoffs:  ਨਵੀਂ ਦਿੱਲੀ - ਤਕਨੀਕੀ ਕੰਪਨੀ ਗੂਗਲ ਨੇ ਪਿਛਲੇ ਕੁਝ ਹਫ਼ਤਿਆਂ ਵਿਚ ਆਪਣੀ ਪੂਰੀ ਪਾਈਥਨ ਟੀਮ ਨੂੰ ਬਰਖ਼ਾਸਤ ਕਰ ਦਿੱਤਾ ਹੈ। ਕੰਪਨੀ ਨੇ ਇਹ ਫ਼ੈਸਲਾ ਸਸਤੀ ਲੇਬਰ ਰੱਖਣ ਅਤੇ ਖਰਚੇ ਘਟਾਉਣ ਲਈ ਲਿਆ ਹੈ। ਫਰੀ ਪ੍ਰੈਸ ਜਰਨਲ ਦੀ ਰਿਪੋਰਟ ਵਿਚ ਇਹ ਖੁਲਾਸਾ ਹੋਇਆ ਹੈ। ਰਿਪੋਰਟ ਮੁਤਾਬਕ, ਗੂਗਲ ਲਾਗਤ 'ਚ ਕਟੌਤੀ ਲਈ ਅਮਰੀਕਾ ਦੇ ਬਾਹਰੋਂ ਸਸਤੇ ਕਰਮਚਾਰੀਆਂ ਨੂੰ ਨਿਯੁਕਤ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਪਾਈਥਨ ਇੱਕ ਬਹੁਤ ਹੀ ਵਧੀਆ, ਆਮ ਮਕਸਦ ਪ੍ਰੋਗਰਾਮਿੰਗ ਭਾਸ਼ਾ ਹੈ। ਗੂਗਲ ਦੀ ਇਸ ਟੀਮ 'ਚ ਕਰੀਬ 10 ਲੋਕ ਕੰਮ ਕਰ ਰਹੇ ਸਨ। 

ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਗੂਗਲ ਮਿਊਨਿਖ, ਜਰਮਨੀ ਵਿਚ ਸ਼ੁਰੂ ਤੋਂ ਇੱਕ ਨਵੀਂ ਟੀਮ ਬਣਾ ਰਿਹਾ ਹੈ। ਇਸ ਤੋਂ ਪਹਿਲਾਂ ਇਸ ਟੀਮ ਦੇ 10 ਤੋਂ ਵੀ ਘੱਟ ਲੋਕ ਪਾਈਥਨ ਦਾ ਪੂਰਾ ਈਕੋਸਿਸਟਮ ਚਲਾ ਰਹੇ ਸਨ। ਗੂਗਲ 'ਤੇ ਇਹ ਟੀਮ ਪਾਈਥਨ ਦੇ ਸਥਿਰ ਸੰਸਕਰਣ ਨੂੰ ਬਣਾਈ ਰੱਖਣ, ਹਜ਼ਾਰਾਂ ਥਰਡ ਪਾਰਟੀ ਪੈਕੇਜਾਂ ਨੂੰ ਅਪਡੇਟ ਕਰਨ ਅਤੇ ਟਾਈਪ-ਚੈਕਰ ਨੂੰ ਵਿਕਸਤ ਕਰਨ ਵਿਚ ਰੁੱਝੀ ਹੋਈ ਸੀ। 

ਹਾਲ ਹੀ ਵਿਚ ਕੰਪਨੀ ਨੇ 28 ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ। ਇਹ ਸਾਰੇ ਕਰਮਚਾਰੀ ਇਜ਼ਰਾਇਲੀ ਸਰਕਾਰ ਅਤੇ ਫੌਜ ਨੂੰ ਕਲਾਊਡ ਸੇਵਾਵਾਂ ਪ੍ਰਦਾਨ ਕਰਨ ਦੇ ਇੱਕ ਪ੍ਰੋਜੈਕਟ ਦਾ ਵਿਰੋਧ ਕਰ ਰਹੇ ਸਨ। ਇਸ ਤੋਂ ਬਾਅਦ ਕੰਪਨੀ ਦੇ ਸੀਈਓ ਸੁੰਦਰ ਪਿਚਾਈ ਨੇ ਆਪਣੇ ਇੱਕ ਬਲਾਗ ਪੋਸਟ ਵਿੱਚ ਕਰਮਚਾਰੀਆਂ ਨੂੰ ਕੰਮ ਵਾਲੀ ਥਾਂ (ਦਫ਼ਤਰ) ਤੋਂ ਰਾਜਨੀਤੀ ਨੂੰ ਦੂਰ ਰੱਖਣ ਲਈ ਕਿਹਾ ਸੀ। 

ਇਸ 'ਚ ਉਨ੍ਹਾਂ ਨੇ ਇਕ ਤਰ੍ਹਾਂ ਨਾਲ ਕਰਮਚਾਰੀਆਂ ਨੂੰ ਦਫ਼ਤਰ 'ਚ ਆ ਕੇ ਆਪਣਾ ਕੰਮ ਕਰਨ ਅਤੇ ਰਾਜਨੀਤੀ 'ਚ ਨਾ ਆਉਣ ਦਾ ਆਦੇਸ਼ ਦਿੱਤਾ। 'ਮਿਸ਼ਨ ਫਸਟ' ਸਿਰਲੇਖ ਵਾਲੇ ਆਪਣੇ ਨੋਟ 'ਚ ਪਿਚਾਈ ਨੇ ਕਿਹਾ- ਕੰਪਨੀ ਦੀ ਨੀਤੀ ਅਤੇ ਉਮੀਦਾਂ ਸਪੱਸ਼ਟ ਹਨ। ਅਹੁਦੇ 'ਤੇ ਰਾਜਨੀਤੀ ਲਈ ਕੋਈ ਥਾਂ ਨਹੀਂ ਹੈ।