ਭਾਰਤ ਸਰਕਾਰ ਨੇ 1178 ਅਕਾਊਂਟਸ ਹਟਾਉਣ ਲਈ ਭੇਜਿਆ ਸੀ ਨੋਟਿਸ
ਨਵੀਂ ਦਿੱਲੀ: ਸੋਸ਼ਲ ਮੀਡੀਆ ਪਲੇਟਫਾਰਮ ਟਵਿਟਰ ਨੇ ਦੱਸਿਆ ਕਿ ਉਸ ਨੇ ਭਾਰਤ ਸਰਕਾਰ ਵੱਲੋਂ ਦੱਸੇ ਗਏ ਕੁਝ ਟਵਿਟਰ ਅਕਾਊਂਟਸ ‘ਤੇ ਰੋਕ ਲਗਾ ਦਿੱਤੀ ਹੈ। ਨਿਊਜ਼ ਏਜੰਸੀ ਨੇ ਸੂਤਰਾਂ ਦੇ ਹਵਾਲੇ ਤੋਂ ਦੱਸਿਆ ਸੀ ਕਿ ਸਰਕਾਰ ਨੇ ਟਵਿਟਰ ਤੋਂ ਅਜਿਹੇ 1178 ਅਕਾਊਂਟਸ ਨੂੰ ਹਟਾਉਣ ਲਈ ਕਿਹਾ ਸੀ, ਜੋ ਕਥਿਤ ਤੌਰ ‘ਤੇ ਕਿਸਾਨੀ ਅੰਦੋਲਨ ਨੂੰ ਲੈ ਕੇ ਗਲਤ ਸੂਚਨਾਵਾਂ ਅਤੇ ਭੜਕਾਊ ਸਮੱਗਰੀ ਫੈਲਾ ਰਹੇ ਸੀ।
Twitter
ਟਵਿਟਰ ਨੇ ਕਿਹਾ, ‘ਪਾਰਦਰਸ਼ਤਾ ਜਨਤਕ ਗੱਲਬਾਤ ਨੂੰ ਉਤਸ਼ਾਹਤ ਕਰਨ ਦੀ ਬੁਨਿਆਦ ਦੀ ਤਰ੍ਹਾਂ ਹੁੰਦੀ ਹੈ। ਹਾਲ ਹੀ ਦੇ ਹਫਤਿਆਂ ਵਿਚ ਹੋਈ ਹਿੰਸਾ ਦੀਆ ਖ਼ਬਰਾਂ ਤੋਂ ਬਾਅਦ, ਅਸੀਂ ਅਪਣੇ ਨਿਯਮਾਂ ਨੂੰ ਲਾਗੂ ਕਰਨ ਅਤੇ ਭਾਰਤ ਵਿਚ ਅਪਣੇ ਸਿਧਾਂਤਾਂ ਦੀ ਰਾਖੀ ਲਈ ਸਰਗਰਮ ਯਤਨਾਂ ਬਾਰੇ ਇਕ ਅਪਡੇਟ ਸਾਂਝੀ ਕਰ ਰਹੇ ਹਾਂ। ‘
ਟਵਿਟਰ ਨੇ ਦੱਸਿਆ, ‘ਅਸੀਂ ਭਾਰਤ ਵਿਚ ਇਕ ਪਾਲਿਸੀ ਤਹਿਤ (Country Withheld Policy) ਬਲਾਕਿੰਗ ਆਰਡਰਸ ਵਿਚ ਪਛਾਣੇ ਗਏ ਕੁਝ ਅਕਾਊਂਟ ‘ਤੇ ਰੋਕ ਲਗਾ ਦਿੱਤੀ ਹੈ। ਇਹ ਅਕਾਊਂਟ ਭਾਰਤ ਤੋਂ ਬਾਹਰ ਉਪਲਬਧ ਰਹਿਣਗੇ’।
Photo
ਟਵਿਟਰ ਦਾ ਕਹਿਣਾ ਹੈ ਕਿ ਅਸੀਂ ਉਹਨਾਂ ਅਕਾਊਂਟਸ ‘ਤੇ ਕੋਈ ਕਾਰਵਾਈ ਨਹੀਂ ਕੀਤੀ ਹੈ, ਜਿਨ੍ਹਾਂ ਵਿਚ ਨਿਊਜ਼ ਮੀਡੀਆ ਸੰਸਥਾਵਾਂ ਪੱਤਰਕਾਰ ਕਾਰਕੁਨ ਅਤੇ ਰਾਜਨੇਤਾ ਸ਼ਾਮਲ ਹਨ। ਅਸੀਂ ਆਜ਼ਾਦ ਪ੍ਰਗਟਾਵੇ ਦੇ ਅਧਿਕਾਰ ਦੀ ਵਕਾਲਤ ਕਰਨਾ ਜਾਰੀ ਰੱਖਾਂਗੇ ਅਤੇ ਭਾਰਤੀ ਕਾਨੂੰਨ ਤਹਿਤ ਵਿਕਲਪ ਦੀ ਤਲਾਸ਼ ਕਰ ਰਹੇ ਹਾਂ। ਖ਼ਬਰਾਂ ਮੁਤਾਬਕ ਸਰਕਾਰ ਨੇ ਟਵਿਟਰ ਨੂੰ ਕਰੀਬ 1200 ਟਵਿਟਰ ਅਕਾਊਂਟਸ ਦੀ ਸੂਚੀ ਭੇਜੀ ਸੀ, ਜਿਨ੍ਹਾਂ ਨੂੰ ਭਾਰਤ ਵਿਚ ਬਲਾਕ ਕਰਨ ਲਈ ਕਿਹਾ ਗਿਆ ਸੀ।
Ministry of Electronics and Information Technology
ਨੋਟਿਸ ਵਿਚ ਕਿਹਾ ਗਿਆ ਕਿ ਸੁਰੱਖਿਆ ਏਜੰਸੀਆਂ ਨੇ ਇਹਨਾਂ ਅਕਾਊਂਟਸ ਦੀ ਪਛਾਣ ਗਰਮ ਖਿਆਲੀਆਂ ਦਾ ਸਮਰਥਨ ਕਰਨ ਵਾਲੇ ਅਤੇ ਪਾਕਿਸਤਾਨੀ ਸਮਰਥਨ ਹਾਸਲ ਕਰਨ ਵਾਲੇ ਅਕਾਊਂਟਸ ਦੇ ਤੌਰ ‘ਤੇ ਕੀਤੀ ਸੀ। ਟਵਿਟਰ ਨੇ ਕਿਹਾ ਹੈ ਕਿ ਉਸ ਨੂੰ ਸੂਚਨਾ ਤਕਨਾਲੋਜੀ ਐਕਟ ਦੀ ਧਾਰਾ 69A ਦੇ ਤਹਿਤ ਇਲੈਕਟ੍ਰਾਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰਾਲੇ ਨੇ ਕਈ ਬਲਾਕਿੰਗ ਆਰਡਰ ਭੇਜੇ ਸੀ।
