ਕੇਂਦਰੀ ਮਹਿਲਾ ਅਤੇ ਬਾਲ ਵਿਕਾਸ ਮੰਤਰੀ ਮੇਨਕਾ ਗਾਂਧੀ ਨੇ ਰਾਜ ਸਰਕਾਰਾਂ ਨੂੰ ਨਿਰਦੇਸ਼ ਦਿਤਾ ਹੈ ਕਿ ਦੇਸ਼ ਭਰ ਵਿਚ 'ਮਿਸ਼ੀਗਨ ਆਫ਼ ਚੈਰਿਟੀ' ਦੁਆਰਾ ਚਲਾਏ ਜਾਣ ...
ਨਵੀਂ ਦਿੱਲੀ : ਕੇਂਦਰੀ ਮਹਿਲਾ ਅਤੇ ਬਾਲ ਵਿਕਾਸ ਮੰਤਰੀ ਮੇਨਕਾ ਗਾਂਧੀ ਨੇ ਰਾਜ ਸਰਕਾਰਾਂ ਨੂੰ ਨਿਰਦੇਸ਼ ਦਿਤਾ ਹੈ ਕਿ ਦੇਸ਼ ਭਰ ਵਿਚ 'ਮਿਸ਼ੀਗਨ ਆਫ਼ ਚੈਰਿਟੀ' ਦੁਆਰਾ ਚਲਾਏ ਜਾਣ ਵਾਲੇ ਬਾਲ ਸੁਵਿਧਾ ਗ੍ਰਹਾਂ ਦੀ ਤੁਰਤ ਜਾਂਚ ਕੀਤੀ ਜਾਵੇ। ਝਾਰਖੰਡ ਵਿਚ ਮਿਸ਼ੀਗਨ ਆਫ਼ ਚੈਰਿਟੀ ਨਾਲ ਜੁੜੀ ਇਕ ਸੰਸਥਾ ਵਲੋਂ ਬੱਚਿਆਂ ਨੂੰ ਕਥਿਤ ਤੌਰ 'ਤੇ ਵੇਚੇ ਜਾਣ ਦੀ ਘਟਨਾ ਸਾਹਮਣੇ ਆਉਣ ਦੇ ਪਿਛੋਕੜ ਵਿਚ ਮੇਨਕਾ ਨੇ ਇਹ ਨਿਰਦੇਸ਼ ਜਾਰੀ ਕੀਤਾ ਹੈ। ਮੰਤਰੀ ਨੇ ਸਾਰੇ ਬਾਲ ਆਸ਼ਰਮਾਂ (ਚਾਈਲਡ ਕੇਅਰ ਇੰਸਟੀਚਿਊਸ਼ਨ) ਦੀ ਰਜਿਸਟ੍ਰੇਸ਼ਨ ਯਕੀਨੀ ਕਰਨ ਲਈ ਆਖਿਆ ਹੈ ਅਤੇ ਅਗਲੇ ਇਕ ਮਹੀਨੇ ਦੇ ਅੰਦਰ ਉਨ੍ਹਾਂ ਨੂੰ ਕੇਂਦਰੀ ਅਦਾਰਿਆਂ ਨਾਲ ਜੋੜਿਆ ਜਾਵੇ।
ਮੰਤਰਾਲਾ ਅਨੁਸਾਰ ਮੇਨਕਾ ਨੇ ਰਾਜਾਂ ਨੂੰ ਇਹ ਯਕੀਨੀ ਕਰਨ ਦਾ ਨਿਰਦੇਸ਼ ਦਿਤਾ ਹੈ ਕਿ ਸਾਰੀਆਂ ਬੱਚੀਆਂ ਦੀ ਦੇਖਭਾਲ ਦੀਆਂ ਸੰਸਥਾਵਾਂ ਰਜਿਟ੍ਰਡ ਹੋਣ ਅਤੇ ਮਹੀਨੇ ਦੇ ਅੰਦਰ ਕੇਂਦਰੀ ਸੰਸਥਾਵਾਂ ਨਾਲ ਜੋੜੀਆਂ ਜਾਣ। ਬਾਲ ਦੇਖਭਾਲ ਅਤੇ ਸੁਰੱਖਿਆ ਕਾਨੂੰਨ 2015 ਦੇ ਤਹਿਤ ਸੀਸੀਆਈ ਵਿਚ ਰਜਿਸਟ੍ਰੇਸ਼ਨ ਅਤੇ ਕਾਰਾ ਨਾਲ ਜੋੜੇ ਜਾਣ ਦੀ ਲੋੜ ਹੈ। ਇਹ ਕਾਨੂੰਨ ਦੋ ਸਾਲ ਪਹਿਲਾਂ ਲਾਗੂ ਕੀਤਾ ਗਿਆ ਸੀ ਪਰ ਕੁੱਝ ਅਨਾਥ ਆਸ਼ਰਮ ਇਸ ਨੂੰ ਚੁਣੌਤੀ ਦਿੰਦੇ ਹਨ। ਸੁਪਰੀਮ ਕੋਰਟ ਨੇ ਚੁਣੌਤੀ ਦੇਣ ਦੇ ਮਾਮਲੇ ਵਿਚ ਅਰਜ਼ੀਆਂ ਨੂੰ ਖ਼ਾਰਜ ਕਰ ਦਿਤਾ ਹੈ ਅਤੇ 2015 ਦੇ ਕਾਨੂੰਨ ਨੂੰ ਅਪਣੇ ਦਸੰਬਰ 2017 ਦੇ ਆਦੇਸ਼ ਵਿਚ ਕਾਇਮ ਰਖਿਆ ਹੈ।
ਇਸ ਦੇ ਬਾਅਦ ਤੋਂ ਕਰੀਬ 2300 ਸੀਸੀਆਈ ਨੂੰ ਕਾਰਾ ਨਾਲ ਜੋੜਿਆ ਗਿਆ ਹੈ ਅਤੇ ਕਰੀਬ 4000 ਅਜੇ ਵੀ ਜੋੜੇ ਜਾਣ ਲਈ ਲਟਕ ਰਹੇ ਹਨ। ਕੇਂਦਰੀ ਮੰਤਰੀ ਨੇ ਕਾਰਾ ਨਾਲ ਜੁੜੇ 2300 ਸੰਸਥਾਨਾਂ 'ਤੇ ਵੀ ਨਾਰਾਜ਼ਗੀ ਜਤਾਈ ਹੈ ਕਿਉਂਕਿ ਬੱਚਿਆਂ ਨੂੰ ਅਜੇ ਵੀ ਗੋਦ ਲੈਣ ਦੀ ਪ੍ਰਣਾਲੀ ਵਿਚ ਨਹੀਂ ਲਿਆਂਦਾ ਗਿਆ ਹੈ। ਇਕ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਮੰਤਰੀ ਦੇ ਇਸ ਮੁੱਦੇ ਨੂੰ ਰਾਜਾਂ ਦੇ ਡਬਲਯੂਸੀਡੀ ਮੰਤਰੀਆਂ ਦੀ ਮੀਟਿੰਗ ਵਿਚ ਸਖ਼ਤੀ ਦਿਖਾਉਣ ਦੀ ਉਮੀਦ ਹੈ। ਇਹ ਮੀਟਿੰਗ 17 ਜੁਲਾਈ ਨੂੰ ਹੋਣੀ ਹੈ। ਰਾਸ਼ਟਰੀ ਬਾਲ ਅਧਿਕਾਰ ਸੰਭਾਲ ਕਮਿਸ਼ਨ (ਐਨਸੀਪੀਸੀਆਰ) ਦੇ 11 ਜੁਲਾਈ 2018 ਤਕ ਦੇ ਅੰਕੜਿਆਂ ਦੇ ਹਵਾਲੇ ਨਾਲ ਖ਼ਬਰ ਦਿਤੀ ਸੀ ਕਿ ਦੇਸ਼ ਭਰ ਵਿਚ 1339 ਬਾਲ ਗ੍ਰਹਿ ਬਿਨਾਂ ਰਜਿਸਟ੍ਰੇਸ਼ਨ ਦੇ ਚੱਲ ਰਹੇ ਹਨ।
ਬੱਚਿਆਂ ਦੀ ਦੇਖਭਾਲ ਅਤੇ ਸੰਭਾਲ ਕਾਨੂੰਨ 2015 ਤਹਿਤ ਬਾਲ ਸੰਭਾਲ ਨਾਲ ਜੁੜੀ ਹਰ ਸੰਸਥਾ ਦਾ ਰਜਿਸਟ੍ਰੇਸ਼ਨ ਕਰਵਾਉਣਾ ਜ਼ਰੂਰੀ ਹੈ। ਇਹ ਸੋਧਿਆ ਹੋਇਆ ਕਾਨੂੰਨ ਜਨਵਰੀ 2016 ਵਿਚ ਲਾਗੂ ਹੋਇਆ ਸੀ। ਐਨਸੀਪੀਸੀਆਰ ਵਲੋਂ ਉਪਲਬਧ ਕਰਵਾਏ ਗਏ ਤਾਜ਼ਾ ਅੰਕੜਿਆਂ ਮੁਤਾਬਕ ਦੇਸ਼ ਵਿਚ 5880 ਬਾਲ ਗ੍ਰਹਿ ਰਜਿਸਟ੍ਰਡ ਹਨ ਤਾਂ 1339 ਬਾਲ ਗ੍ਰਹਿ ਬਿਨਾਂ ਰਜਿਸਟ੍ਰੇਸ਼ਨ ਦੇ ਚਲਦੇ ਹਨ।
ਐਨਸੀਪੀਸੀਆਰ ਦਾ ਕਹਿਣਾ ਹੈ ਕਿ ਕੇਰਲ ਵਿਚ 26 ਬਾਲ ਗ੍ਰਹਿ ਰਜਿਸਟਰਡ ਹਨ ਜਦਕਿ 1165 ਬਾਲ ਗ੍ਰਹਿ ਬਿਨਾਂ ਰਜਿਸਟ੍ਰੇਸ਼ਨ ਦੇ ਚੱਲ ਰਹੇ ਹਨ।ਇਸ ਤੋਂ ਇਲਾਵਾ ਮਹਾਰਾਸ਼ਟਰ ਵਿਚ 110, ਮਨੀਪੁਰ ਵਿਚ 13, ਤਾਮਿਲਨਾਡੂ ਵਿਚ 9, ਗੋਆ ਵਿਚ 8, ਰਾਜਸਥਾਨ ਵਿਚ 4 ਅਤੇ ਨਾਗਾਲੈਂਡ ਵਿਚ 2 ਬਾਲ ਗ੍ਰਹਿ ਰਜਿਸਟ੍ਰਡ ਨਹੀਂ ਹਨ।