15 ਅਗੱਸਤ ਨੂੰ ਵਿਆਹ ਦੀ ਵਰ੍ਹੇਗੰਢ ਦੀ ਪਾਰਟੀ ਦੇ ਕੇ ਘਰ ਪਰਤ ਰਿਹਾ ਸੀ ਸੁੱਬਾ

ਬੇਂਗਲੁਰੂ, 19 ਅਗੱਸਤ: ਬੇਂਗਲੁਰੂ ’ਚ ਸਿੱਕਿਮ ਦੇ ਇਕ ਵਿਅਕਤੀ (31) ਦੀ ਅਣਪਛਾਤੇ ਲੋਕਾਂ ਨੇ ‘ਚੀਨੀ’ ਕਹਿ ਕੇ ਬੇਰਹਿਮੀ ਨਾਲ ਕੁਟਮਾਰ ਕੀਤੀ ਜਿਸ ਨਾਲ ਉਸ ਗੰਭੀਰ ਰੂਪ ’ਚ ਜ਼ਖ਼ਮੀ ਹੋ ਗਿਆ। ਬੇਂਗਲੁਰੂ ਪੁਲਿਸ ਨੇ ਸਨਿਚਰਵਾਰ ਨੂੰ ਇਹ ਜਾਣਕਾਰੀ ਦਿਤੀ। 

ਪੁਲਿਸ ਮੁਤਾਬਕ ਘਟਨਾ 15 ਅਗੱਸਤ ਦੀ ਰਾਤ ਦੀ ਹੈ। ਸਿੱਕਿਮ ਦੇ ਰਿੰਚੇਨਪੋਂਗ ਸ਼ਹਿਰ ਵਾਸੀ ਦਿਨੇਸ਼ ਸ਼ੁੱਬਾ ਨੂੰ ਨੱਕ ਸਮੇਤ ਸਰੀਰ ’ਚ ਕਈ ਥਾਵਾਂ ’ਤੇ ਸੱਟਾਂ ਲਗੀਆਂ ਹਨ ਅਤੇ ਉਸ ਨੂੰ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ ਹੈ। 

ਪੁਲਿਸ ਨੇ ਕਿਹਾ ਕਿ ਸੁੱਬਾ ਸੱਤ ਮਹੀਨੇ ਪਹਿਲਾਂ ਅਪਣੀ ਪਤਨੀ ਅਤੇ ਤਿੰਨ ਮਹੀਨਿਆਂ ਦੇ ਬੱਚੇ ਨਾਲ ਰੋਜ਼ੀ-ਰੋਟੀ ਕਮਾਉਣ ਲਈ ਬੇਂਗਲੁਰੂ ਆਇਆ ਸੀ। ਪੁਲਿਸ ਨੇ ਕਿਹਾ ਕਿ ਉਹ ਇਸ ਵੇਲੇ ਸ਼ਹਿਰ ਦੇ ਰੇਸਤਰਾਂ ’ਚ ਕੰਮ ਕਰ ਰਿਹਾ ਸੀ। 

ਪੁਲਿਸ ਨੇ ਕਿਹਾ ਕਿ 15 ਅਗੱਸਤ ਨੂੰ ਸੁੱਬਾ ਨੇ ਕੁੱਝ ਦੋਸਤਾਂ ਨਾਲ ਅਪਣੇ ਵਿਆਹ ਦੀ ਵਰ੍ਹੇਗੰਢ ਮਨਾਈ ਅਤੇ ਦੇਰ ਰਾਤ ਇਕੱਲਿਆਂ ਘਰ ਜਾ ਰਿਹਾ ਸੀ, ਜਦੋਂ ਕੁੱਝ ਲੋਕਾਂ ਨੇ ਉਸ ਨੂੰ ਰੋਕ ਲਿਆ। 

ਪੁਲਿਸ ਅਨੁਸਾਰ ਸੁੱਬਾ ਇਹ ਲੋਕ ਸੁੱਬਾ ਨੂੰ ‘ਚੀਨੀ’ ਕਹਿ ਕੇ ਛੇੜਨ ਲੱਗੇ ਜਿਸ ਦਾ ਸੁੱਬਾ ਨੇ ਵਿਰੋਧ ਕੀਤਾ। ਇਸ ’ਤੇ ਇਨ੍ਹਾਂ ਲੋਕਾਂ ਨੇ ਉਸ ਦੀ ਕੁੱਟਮਾਰ ਕਰ ਦਿਤੀ, ਜਿਸ ਕਾਰਨ ਉਹ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ। ਪੁਲਿਸ ਅਨੁਸਾਰ ਉਸ ਦੀ ਕੁੱਟਮਾਰ ਕਰਨ ਤੋਂ ਬਾਅਦ ਮੁਲਜ਼ਮ ਮੌਕੇ ਤੋਂ ਭੱਜ ਗਏ। 

ਪੁਲਿਸ ਦੀ ਇਕ ਗਸ਼ਤੀ ਟੁਕੜੀ ਨੇ ਸੁੱਬਾ ਨੂੰ ਜ਼ਖ਼ਮੀ ਅਤੇ ਦਰਦ ਨਾਲ ਤੜਪਦਿਆਂ ਵੇਖਿਆ। ਗਸ਼ਤੀ ਟੁਕੜੀ ਨੇ ਸੁੱਬਾ ਨੂੰ ਹਸਪਤਾਲ ’ਚ ਭਰਤੀ ਕਰਵਾਇਆ। ਬਾਅਦ ’ਚ ਸੁੱਬਾ ਨੇ ਪੁਲਿਸ ’ਚ ਸ਼ਿਕਾਇਤ ਦਰਜ ਕਰਵਾਈ। ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿਤੀ ਹੈ ਅਤੇ ਹਮਲੇ ’ਚ ਸ਼ਾਮਲ ਵਿਅਕਤੀਆਂ ਨੂੰ ਫੜਨ ਲਈ ਸੀ.ਸੀ.ਟੀ.ਵੀ. ਫ਼ੁਟੇਜ ਖੰਗਾਲ ਰਹੀ ਹੈ।