ਕਾਂਗਰਸ ਨੇ ਨੋਟਬੰਦੀ ਨੂੰ ਇਕ ਘਪਲਾ ਦਸਦੇ ਹੋਏ ਭਾਜਪਾ ਦੇ ਰਾਸ਼ਟਰੀ ਅਮਿਤ ਸ਼ਾਹ 'ਤੇ ਹਮਲਾ ਬੋਲਿਆ ਹੈ। ਕਾਂਗਰਸ ਦਾ ਦੋਸ਼ ਹੈ ਕਿ ਅਮਿਤ ....
ਨਵੀਂ ਦਿੱਲੀ : ਕਾਂਗਰਸ ਨੇ ਨੋਟਬੰਦੀ ਨੂੰ ਇਕ ਘਪਲਾ ਦਸਦੇ ਹੋਏ ਭਾਜਪਾ ਦੇ ਰਾਸ਼ਟਰੀ ਅਮਿਤ ਸ਼ਾਹ 'ਤੇ ਹਮਲਾ ਬੋਲਿਆ ਹੈ। ਕਾਂਗਰਸ ਦਾ ਦੋਸ਼ ਹੈ ਕਿ ਅਮਿਤ ਸ਼ਾਹ ਜਿਸ ਬੈਂਕ ਦੇ ਨਿਦੇਸ਼ਕ ਰਹੇ ਹਨ, ਉਹ ਨੋਟਬੰਦੀ ਦੌਰਾਨ ਸਭ ਤੋਂ ਜ਼ਿਆਦਾ ਪਾਬੰਦੀਸ਼ੁਦਾ 500 ਅਤੇ 1000 ਰੁਪਏ ਦੇ ਨੋਟ ਜਮ੍ਹਾਂ ਕਰਨ ਵਾਲਾ ਜ਼ਿਲ੍ਹਾ ਸਹਿਕਾਰੀ ਬੈਂਕ ਹੈ। ਕੇਂਦਰ ਸਰਕਾਰ ਨੇ ਅੱਠ ਨਵੰਬਰ 2016 ਵਿਚ ਉਸ ਸਮੇਂ ਚੱਲਣ ਵਾਲੇ 500 ਅਤੇ 1000 ਰੁਪਏ ਦੇ ਨੋਟਾਂ 'ਤੇ ਪਾਬੰਦੀ ਲਗਾ ਕੇ ਉਨ੍ਹਾਂ ਨੂੰ ਚੱਲਣ ਤੋਂ ਬਾਹਰ ਕਰ ਦਿਤਾ ਸੀ।
ਕਾਂਗਰਸ ਦੇ ਬੁਲਾਰੇ ਰਣਦੀਪ ਸੁਰਜੇਵਾਲਾ ਨੇ ਸ਼ੁਕਰਵਾਰ ਨੂੰ ਪ੍ਰੈੱਸ ਕਾਨਫਰੰਸ ਕਰਕੇ ਦੋਸ਼ ਲਗਾਇਆ ਹੈ ਕਿ ਨੋਟਬੰਦੀ ਦੌਰਾਨ ਕਾਲੇ ਧਨ ਨੂੰ ਸਫ਼ੈਦ ਕੀਤਾ ਗਿਆ। ਗੁਜਰਾਤ ਕੋਆਪ੍ਰੇਟਿਵ ਬੈਂਕ ਵਿਚ ਹੇਰਾਫੇਰੀ ਕਰਕੇ ਨੋਟਬੰਦੀ ਦੌਰਾਨ ਸਭ ਤੋਂ ਵੱਡਾ ਘਪਲਾ ਕੀਤਾ ਗਿਆ। ਕਾਂਗਰਸ ਦਾ ਦੋਸ਼ ਹੈ ਕਿ ਘਪਲੇ ਨਾਲ ਜੁੜੇ ਸਬੂਤ ਹੁਣ ਸਾਹਮਣੇ ਆਏ ਹਨ ਅਤੇ ਗੁਜਰਾਤ ਦੇ ਕਈ ਕੋਆਪ੍ਰੇਟਿਵ ਬੈਂਕਾਂ ਦੇ ਚੇਅਰਮੈਨ ਭਾਜਪਾ ਨੇਤਾ ਹਨ।
ਨੋਟਬੰਦੀ ਘਪਲੇ ਦੀ ਜਾਂਚ ਦੇ ਸਮੇਂ ਸਭ ਤੋਂ ਵੱਡੇ ਘਪਲੇ ਦੇ ਸਬੂਤ ਹੁਣ ਮਿਲੇ ਹਨ। ਨੋਟਬੰਦੀ ਦੌਰਾਨ ਇਕ ਬੈਂਕ ਵਿਚ 745 ਕਰੋੜ ਰੁਪਏ ਪੰਜ ਦਿਨ ਵਿਚ ਜਮ੍ਹਾਂ ਹੋਏ। ਇਹ ਉਹੀ ਬੈਂਕ ਹੈ ਜਿਸ ਦੇ ਨਿਦੇਸ਼ਕ ਭਾਜਪਾ ਦੇ ਪ੍ਰਧਾਨ ਅਮਿਤ ਸ਼ਾਹ ਰਹੇ ਹਨ। ਅਹਿਮਦਾਬਾਦ ਜ਼ਿਲ੍ਹਾ ਸਹਿਕਾਰੀ ਬੈਂਕ (ਏਡੀਸੀਬੀ) ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੁਆਰਾ ਨੋਟਬੰਦੀ ਦਾ ਐਲਾਨ ਕਰਨ ਦੇ ਮਹਿਜ ਪੰਜ ਦਿਨ ਦੇ ਅੰਦਰ 745.59 ਕਰੋੜ ਰੁਪਏ ਮੁੱਲ ਦੇ ਪਾਬੰਦੀਸ਼ੁਦਾ ਨੋਟ ਪ੍ਰਾਪਤ ਕੀਤੇ ਸਨ।
ਜ਼ਿਕਰਯੋਗ ਹੈ ਕਿ ਨੋਟਬੰਦੀ ਦੇ ਐਲਾਨ ਤੋਂ ਪੰਜ ਦਿਨ ਬਾਅਦ 14 ਨਵੰਬਰ 2016 ਨੂੰ ਸਾਰੇ ਜ਼ਿਲ੍ਹਾ ਸਹਿਕਾਰੀ ਬੈਂਕਾਂ ਨੂੰ ਲੋਕਾਂ ਤੋਂ ਪਾਬੰਦੀਸ਼ੁਦਾ ਨੋਟ ਜਮ੍ਹਾਂ ਲੈਣ ਤੋਂ ਮਨ੍ਹਾਂ ਕਰ ਦਿਤਾ ਗਿਆ ਸੀ ਕਿਉਂਕਿ ਇਹ ਸ਼ੱਕ ਜਤਾਇਆ ਗਿਆ ਸੀ ਕਿ ਸਹਿਕਾਰੀ ਬੈਂਕਾਂ ਜ਼ਰੀਏ ਕਾਲੇ ਧਨ ਨੂੰ ਸਫ਼ੈਦ ਕੀਤਾ ਜਾ ਸਕਦਾ ਹੈ। ਬੈਂਕ ਦੀ ਵੈਬਸਾਈਟ ਅਨੁਸਾਰ ਅਮਿਤ ਸ਼ਾਹ ਉਸ ਸਮੇਂ ਬੈਂਕ ਵਿਚ ਨਿਦੇਸ਼ਕ ਦੇ ਅਹੁਦੇ 'ਤੇ ਸਨ ਅਤੇ ਉਹ ਕਈ ਸਾਲ ਤੋਂ ਇਸ ਅਹੁਦੇ 'ਤੇ ਬਣੇ ਰਹੇ। ਉਹ 2000 ਵਿਚ ਬੈਂਕ ਦੇ ਪ੍ਰਧਾਨ ਵੀ ਰਹੇ ਹਨ।
ਏਡੀਸੀਬੀ ਦੇ ਕੋਲ 31 ਮਾਰਚ 2017 ਨੂੰ ਕੁੱਲ 5050 ਕਰੋੜ ਰੁਪਏ ਜਮ੍ਹਾਂ ਸਨ ਅਤੇ ਵਿੱਤੀ ਸਾਲ 2017-18 ਵਿਚ ਬੈਂਕ ਦਾ ਸ਼ੁੱਧ ਮੁਨਾਫ਼ਾ 14.31 ਕਰੋੜ ਰਿਹਾ। ਏਡੀਸੀਬੀ ਤੋਂ ਬਾਅਦ ਸਭ ਤੋਂ ਜ਼ਿਆਦਾ ਪਾਬੰਦੀਸ਼ੁਦਾ ਨੋਟ ਜਮ੍ਹਾਂ ਕਰਨ ਵਾਲਾ ਸਹਿਕਾਰੀ ਬੈਂਕ ਰਾਜਕੋਟ ਜ਼ਿਲ੍ਹਾ ਸਹਿਕਾਰੀ ਬੈਂਕ ਹੈ, ਜਿਸ ਦੇ ਪ੍ਰਧਾਨ ਗੁਜਰਾਤ ਦੇ ਮੁੱਖ ਮੰਤਰੀ ਵਿਜੈ ਰੂਪਾਣੀ ਦੀ ਸਰਕਾਰ ਵਿਚ ਕੈਬਨਿਟ ਮੰਤਰੀ ਜਯੇਸ਼ਭਾਈ ਵਿੱਠਲਭਾਈ ਰਡਾੜੀਆ ਹਨ। ਇਸ ਬੈਂਕ ਨੇ 693.19 ਕਰੋੜ ਰੁਪਏ ਮੁੱਲ ਦੇ ਪਾਬੰਦੀਸ਼ੁਦਾ ਨੋਟ ਜਮ੍ਹਾਂ ਲਏ ਸਨ।
ਜ਼ਾਹਿਰ ਹੈ ਕਿ ਰਾਜਕੋਟ ਗੁਜਰਾਤ ਵਿਚ ਭਾਜਪਾ ਦੀ ਰਾਜਨੀਤੀ ਦਾ ਕੇਂਦਰ ਰਿਹਾ ਹੈ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਪਹਿਲੀ ਵਾਰ ਇਥੋਂ ਹੀ 2001 ਵਿਚ ਵਿਧਾਇਕ ਚੁਣੇ ਗਏ ਸਨ। ਗੌਰ ਕਰਨ ਵਾਲੀ ਗੱਲ ਇਹ ਹੈ ਕਿ ਅਹਿਮਦਾਬਾਦ ਅਤੇ ਰਾਜਕੋਟ ਦੇ ਜ਼ਿਲ੍ਹਾ ਸਹਿਕਾਰੀ ਬੈਂਕਾਂ ਦੁਆਰਾ ਜਮ੍ਹਾਂ ਪ੍ਰਾਪਤੀ ਦਾ ਇਹ ਅੰਕੜਾ ਗੁਜਰਾਤ ਰਾਜ ਸਹਿਕਾਰੀ ਬੈਂਕ ਲਿਮਟਿਡ ਦੁਆਰਾ ਜਮ੍ਹਾਂ ਪ੍ਰਾਪਤ ਰਕਮ 1.11 ਕਰੋੜ ਰੁਪਏ ਤੋਂ ਬਹੁਤ ਜ਼ਿਆਦਾ ਹੈ।