ਪਤਨੀ ਨਾਰਾਜ਼ ਹੋ ਕੇ ਪੇਕੇ ਗਈ ਤਾਂ ਪਤੀ ਉਸ ਨੂੰ ਮਨਾਉਣ ਲਈ ਉਥੇ ਪਹੁੰਚ ਗਿਆ ਪਰ ਪਤਨੀ ਫਿਰ ਵੀ ਉਸ ਦੇ ਨਾਲ ਆਉਣ...
ਸੰਗਰੂਰ (ਪੀਟੀਆਈ) : ਪਤਨੀ ਨਾਰਾਜ਼ ਹੋ ਕੇ ਪੇਕੇ ਗਈ ਤਾਂ ਪਤੀ ਉਸ ਨੂੰ ਮਨਾਉਣ ਲਈ ਉਥੇ ਪਹੁੰਚ ਗਿਆ ਪਰ ਪਤਨੀ ਫਿਰ ਵੀ ਉਸ ਦੇ ਨਾਲ ਆਉਣ ਲਈ ਰਾਜੀ ਨਹੀਂ ਹੋਈ। ਇਸ ਤੋਂ ਬਾਅਦ ਪਤੀ ਨੇ ਅਜਿਹਾ ਕਦਮ ਚੁਕਿਆ ਕਿ ਜਿਸ ਨਾਲ ਸਾਰਿਆਂ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਗਈ। ਪਤੀ ਨੇ ਦੋਸਤਾਂ ਨੂੰ ਵੀਡੀਓ ਭੇਜੀ ਅਤੇ ਫਿਰ ਖ਼ੁਦ ਨੂੰ ਫਾਹਾ ਲਾ ਕੇ ਖੁਦਕੁਸ਼ੀ ਕਰ ਲਈ। ਪੁਲਿਸ ਨੇ ਮ੍ਰਿਤਕ ਨੌਜਵਾਨ ਦੇ ਪਿਤਾ ਦੀ ਸ਼ਿਕਾਇਤ ‘ਤੇ ਉਸ ਦੀ ਪਤਨੀ, ਸੱਸ ਸਮੇਤ ਤਿੰਨ ਦੇ ਖਿਲਾਫ਼ ਮਾਮਲਾ ਦਰਜ ਕਰ ਦਿਤਾ ਹੈ।
ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਪਿੰਡ ਛਾਜਲਾ ਨਿਵਾਸੀ ਮ੍ਰਿਤਕ ਚਮਕੌਰ ਸਿੰਘ (27) ਦੇ ਪਿਤਾ ਰਣ ਸਿੰਘ ਸਪੁੱਤਰ ਗੱਜਨ ਸਿੰਘ ਨੇ ਦੱਸਿਆ ਕਿ ਉਸ ਦੇ ਤਿੰਨ ਮੁੰਡੇ ਹਨ। ਚਮਕੌਰ ਸਿੰਘ ਦੀ ਕਰੀਬ ਸੱਤ ਸਾਲ ਪਹਿਲਾਂ ਪਿੰਡ ਸੇਖੁਵਾਸ ਦੀ ਸ਼ਿੰਦਰਪਾਲ ਕੌਰ ਉਰਫ਼ ਪ੍ਰੀਤ ਸਪੁੱਤਰੀ ਬਲਵੀਰ ਸਿੰਘ ਨਾਲ ਵਿਆਹ ਹੋਇਆ ਸੀ। ਉਨ੍ਹਾਂ ਦੀ ਕੋਈ ਔਲਾਦ ਨਹੀਂ ਸੀ। ਸ਼ਿੰਦਰਪਾਲ ਕੌਰ ਅਪਣੇ ਪਤੀ ਚਮਕੌਰ ਸਿੰਘ ‘ਤੇ ਬੇਵਜ੍ਹਾ ਤੋਂ ਸ਼ੱਕ ਕਰਦੀ ਸੀ, ਜਿਸ ਕਾਰਨ ਅਕਸਰ ਦੋਵਾਂ ਦੀ ਲੜਾਈ ਰਹਿੰਦੀ ਸੀ।
ਇਸ ਵਿਚ ਕੁਝ ਸਮਾਂ ਪਹਿਲਾਂ ਸ਼ਿੰਦਰਪਾਲ ਕੌਰ ਨਾਰਾਜ਼ ਹੋ ਕੇ ਅਪਣੇ ਪੇਕੇ ਚਲੀ ਗਈ ਸੀ ਅਤੇ ਉਥੇ ਜਾ ਕੇ ਅਪਣੇ ਪਤੀ ਚਮਕੌਰ ਸਿੰਘ ਦੇ ਖਿਲਾਫ਼ ਥਾਣਾ ਛਾਜਲੀ ਵਿਚ ਸ਼ਿਕਾਇਤ ਦੇ ਦਿਤੀ। ਇਸ ਦਾ ਪਤਾ ਲੱਗਣ ‘ਤੇ ਚਮਕੌਰ ਸਿੰਘ ਅਪਣੇ ਕੁਝ ਦੋਸਤਾਂ ਦੇ ਨਾਲ ਅਪਣੇ ਸਹੁਰਾ-ਘਰ ਸ਼ਿੰਦਰਪਾਲ ਨੂੰ ਮਨਾਉਣ ਪਹੁੰਚ ਗਿਆ ਪਰ ਉਸ ਨੇ ਉਸ ਦੇ ਨਾਲ ਵਾਪਸ ਆਉਣ ਲਈ ਮਨਾ ਕਰ ਦਿਤਾ। ਪਤੀ ਦੇ ਨਾਲ ਨਾ ਵਾਪਸ ਆਉਣ ਤੋਂ ਚਮਕੌਰ ਉਦਾਸ ਹੋ ਗਿਆ।
ਵਾਪਸ ਘਰ ਪਹੁੰਚ ਕੇ ਉਸ ਨੇ ਦਰੱਖ਼ਤ ਨਾਲ ਫਾਹਾ ਲਾ ਕੇ ਖ਼ੁਦਕੁਸ਼ੀ ਕਰ ਲਈ। ਇਸ ਦੀ ਜਾਣਕਾਰੀ ਪਰਵਾਰ ਨੂੰ ਚਮਕੌਰ ਸਿੰਘ ਦੇ ਦੋਸਤ ਨੇ ਦਿਤੀ। ਉਸ ਨੇ ਕਿਹਾ ਕਿ ਚਮਕੌਰ ਸਿੰਘ ਨੇ ਮਰਦੇ ਹੋਏ ਇਕ ਵੀਡੀਓ ਉਸ ਨੂੰ ਭੇਜੀ ਸੀ, ਜਿਸ ਵਿਚ ਉਸ ਨੇ ਮੌਤ ਲਈ ਪਤਨੀ, ਸੱਸ ਅਤੇ ਹੋਰ ਵਿਅਕਤੀ ਨੂੰ ਜ਼ਿੰਮੇਵਾਰ ਠਹਰਾਇਆ ਹੈ। ਪਰਵਾਰ ਨੇ ਤੁਰਤ ਮੌਕੇ ‘ਤੇ ਪਹੁੰਚ ਕੇ ਵੇਖਿਆ ਤਾਂ ਚਮਕੌਰ ਦੀ ਲਾਸ਼ ਦਰੱਖ਼ਤ ਨਾਲ ਲਟਕ ਰਹੀ ਸੀ। ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਲਾਸ਼ ਨੂੰ ਸਿਵਲ ਹਸਪਤਾਲ ‘ਚ ਪੋਸਟਮਾਰਟਮ ਲਈ ਭੇਜ ਦਿਤਾ।