ਹੁਣ ਤਕ ਤੁਸੀਂ ਵੈਬਸਾਈਟ ਵਗੈਰਾ ਹੈਕ ਹੋਣ ਦੀਆਂ ਘਟਨਾਵਾਂ ਤਾਂ ਅਕਸਰ ਸੁਣੀਆਂ ਹੋਣਗੀਆਂ ਪਰ ਕੀ ਤੁਸੀਂ ਕਦੇ ਏਟੀਐਮ ਕਾਰਡ ਦੇ ਹੈਕ ਹੋਣ ਬਾਰੇ ਸੁਣਿਆ ਹੈ? ਜੇਕਰ ਨਹੀਂ ...
ਚੰਡੀਗੜ੍ਹ : ਹੁਣ ਤਕ ਤੁਸੀਂ ਵੈਬਸਾਈਟ ਵਗੈਰਾ ਹੈਕ ਹੋਣ ਦੀਆਂ ਘਟਨਾਵਾਂ ਤਾਂ ਅਕਸਰ ਸੁਣੀਆਂ ਹੋਣਗੀਆਂ ਪਰ ਕੀ ਤੁਸੀਂ ਕਦੇ ਏਟੀਐਮ ਕਾਰਡ ਦੇ ਹੈਕ ਹੋਣ ਬਾਰੇ ਸੁਣਿਆ ਹੈ? ਜੇਕਰ ਨਹੀਂ ਤਾਂ ਹੁਣੇ ਤੋਂ ਹੋ ਜਾਓ ਸਾਵਧਾਨ ਕਿਉਂਕਿ ਪੰਜਾਬ ਵਿਚ ਅਜਿਹੀਆਂ ਕਈ ਘਟਨਾਵਾਂ ਸਾਹਮਣੇ ਆ ਚੁੱਕੀਆਂ ਨੇ, ਜਿਨ੍ਹਾਂ ਨੂੰ ਲੈ ਕੇ ਲੋਕਾਂ ਵਿਚ ਡਰ ਦਾ ਮਾਹੌਲ ਬਣਿਆ ਹੋਇਆ ਹੈ। ਜੀ ਹਾਂ, ਠੱਗੀ ਮਾਰਨ ਵਾਲਿਆਂ ਨੇ ਹੁਣ 'ਕਾਰਡ ਕਲੋਨਿੰਗ' ਨਾਂਅ ਦਾ ਨਵਾਂ ਤਰੀਕਾ ਇਜ਼ਾਦ ਕੀਤਾ ਹੈ। ਜਾਅਲਸਾਜ਼ੀ ਕਰਨ ਦੇ ਇਸ ਨਵੇਂ ਤਰੀਕੇ ਬਾਰੇ ਹਾਲੇ ਸ਼ਾਇਦ ਹੀ ਕੋਈ ਜਾਣਦਾ ਹੋਵੇਤਾਂ ਆਓ ਦਸਦੇ ਹਾਂ ਤੁਹਾਨੂੰ ਕਿਵੇਂ ਕੀਤੀ ਜਾਂਦੀ ਏ ਏਟੀਐਮ ਕਾਰਡ ਦੀ ਹੈਕਿੰਗ।
ਕਾਰਡ ਕਲੋਨ, ਇਹ ਸ਼ਬਦ ਅੱਜਕੱਲ੍ਹ ਕਾਫ਼ੀ ਸੁਣਨ ਨੂੰ ਮਿਲ ਰਿਹਾ ਹੈ। ਇਹੀ ਉਹ ਤਰੀਕਾ ਹੈ ਜਿਸ ਦੇ ਜ਼ਰੀਏ ਤੁਹਾਡੇ ਏਟੀਐਮ ਕਾਰਡ ਨੂੰ ਹੈਕ ਕਰ ਕੇ ਤੁਹਾਡੇ ਖ਼ਾਤੇ ਵਿਚੋਂ ਪੈਸੇ ਕਢਵਾ ਲਏ ਜਾਂਦੇ ਹਨ। ਕਾਰਡ ਕਲੋਨ ਦਾ ਮਤਲਬ ਹੈ...ਤੁਹਾਡੇ ਏਟੀਐਮ ਕਾਰਡ ਦੀ ਹੁਬਹੂ ਕਾਪੀ...ਜਿਸ ਵਿਚ ਤੁਹਾਡੇ ਕਾਰਡ ਦੀ ਸਾਰੀ ਜਾਣਕਾਰੀ ਜਮ੍ਹਾਂ ਹੁੰਦੀ ਹੈ। ਇਹ ਦਿਸਣ ਵਿਚ ਵੀ ਏਟੀਐਮ ਕਾਰਡ ਵਰਗਾ ਹੀ ਹੁੰਦਾ ਹੈ। ਹੁਣ ਤੁਸੀਂ ਸੋਚ ਰਹੇ ਹੋਵੋਗੇ ਕਿ ਆਖ਼ਰ ਕਿਵੇਂ ਕੀਤੀ ਜਾਂਦੀ ਹੈ ਏਟੀਐਮ ਕਾਰਡ ਦੀ ਹੈਕਿੰਗ ਤਾਂ ਆਓ ਇਹ ਵੀ ਜਾਣ ਲਓ।
ਤੁਸੀਂ ਜਿਹੜਾ ਏਟੀਐਮ ਕਾਰਡ ਵਰਤਦੇ ਹੋ, ਉਸ ਵਿਚ ਇਕ ਕਾਲੇ ਰੰਗ ਦੀ ਮੈਗਨੇਟਿਕ ਸਟ੍ਰਿਪ ਹੁੰਦੀ ਹੈ। ਇਸੇ ਸਟ੍ਰਿਪ ਵਿਚ ਹੁੰਦੀ ਹੈ ਤੁਹਾਡੇ ਖ਼ਾਤੇ ਨਾਲ ਜੁੜੀ ਸਾਰੀ ਜਾਣਕਾਰੀ। ਜੀ ਹਾਂ। ਤੁਹਾਡੀ ਇਸੇ ਜਾਣਕਾਰੀ ਦੀ ਵਰਤੋਂ ਕਰ ਕੇ ਠੱਗੀ ਮਾਰਨ ਵਾਲੇ ਸਕੀਮਰ ਨਾਂਅ ਦੇ ਇਕ ਡਿਵਾਈਸ ਦੀ ਮਦਦ ਨਾਲ ਤੁਹਾਡੇ ਕਾਰਡ ਦਾ ਇਕ ਕਲੋਨ ਬਣਾ ਲੈਂਦੇ ਹਨ। ਅਸਲ ਵਿਚ ਡਿਵਾਈਸ ਨੂੰ ਕਾਰਡ ਸਵੈਪਿੰਗ ਮਸ਼ੀਨ ਵਿਚ ਫਿੱਟ ਕਰਕੇ ਤੁਹਾਡੇ ਕਾਰਡ ਦੀ ਡਿਟੇਲਸ ਨੂੰ ਕਾਪੀ ਕਰ ਲਿਆ ਜਾਂਦਾ ਹੈ। ਕਾਪੀ ਕੀਤਾ ਗਿਆ ਡਾਟਾ ਸਕੀਮਰ ਡਿਵਾਈਸ ਦੀ ਮੈਮਰੀ ਯੂਨਿਟ ਵਿਚ ਸੇਵ ਹੋ ਜਾਂਦਾ ਹੈ।
ਇਸ ਤੋਂ ਬਾਅਦ ਤੁਸੀਂ ਜਿਵੇਂ ਹੀ ਕਿਸੇ ਏਟੀਐਮ ਮਸ਼ੀਨ ਵਿਚ ਅਪਣਾ ਕਾਰਡ ਲਗਾ ਕੇ ਪਿੰਨ ਕੋਡ ਪਾਉਂਦੇ ਹੋ ਤਾਂ ਓਵਰਲੇ ਡਿਵਾਈਸਜ਼ ਦੇ ਜ਼ਰੀਏ ਕਾਰਡ ਦੇ ਪਿੰਨ ਨੂੰ ਰੀਡ ਕਰ ਲਿਆ ਜਾਂਦਾ ਹੈ। ਇਸ ਤੋਂ ਬਾਅਦ ਤੁਹਾਡੇ ਏਟੀਐਮ ਕਾਰਡ ਦਾ ਕਲੋਨ ਬਣਾ ਕੇ ਫਰਾਡ ਟਰਾਂਜੈਕਸ਼ਨ ਨੂੰ ਅੰਜ਼ਾਮ ਦਿਤਾ ਜਾਂਦਾ ਹੈ ਤੇ ਤੁਹਾਡਾ ਖ਼ਾਤਾ ਸਾਫ਼। ਮੁਹਾਲੀ ਅਤੇ ਚੰਡੀਗੜ੍ਹ ਵਿਚ ਇਸ ਤਰ੍ਹਾਂ ਕਈ ਘਟਨਾਵਾਂ ਸਾਹਮਣੇ ਆ ਚੁੱਕੀਆਂ ਨੇ, ਜਿਨ੍ਹਾਂ ਨੂੰ ਲੈ ਕੇ ਲੋਕਾਂ ਵਿਚ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਹੈ।
ਜਿੱਥੇ ਐਚਡੀਐਫਸੀ ਅਤੇ ਆਈਸੀਆਈਸੀਆਈ ਬੈਂਕਾਂ ਦੇ ਏਟੀਐਮ ਵਿਚ ਇਸ ਤਰ੍ਹਾਂ ਦੀ ਘਟਨਾ ਸਾਹਮਣੇ ਆ ਚੁੱਕੀ ਹੈ, ਉਥੇ ਹੀ ਕੇਨਰਾ ਬੈਂਕ ਦੇ ਏਟੀਐਮ ਵਿਚ ਵੀ ਇਸ ਡਿਵਾਈਸ ਨੂੰ ਦੇਖਿਆ ਗਿਆ ਹੈ। ਸੋ ਹੁਣ ਤੁਸੀਂ ਸਾਵਧਾਨ ਹੋ ਜਾਓ, ਕਿਉਂਕਿ ਜੇਕਰ ਸਾਵਧਾਨ ਨਾ ਹੋਏ ਤਾਂ ਤੁਸੀਂ ਬਣ ਸਕਦੇ ਓ ਹੈਕਰਾਂ ਦਾ ਅਗਲਾ ਨਿਸ਼ਾਨਾ। ਫਿਲਹਾਲ ਇਸ ਤਰ੍ਹਾਂ ਲਗਾਤਾਰ ਸਾਹਮਣੇ ਆਈਆਂ ਘਟਨਾਵਾਂ ਤੋਂ ਬਾਅਦ ਸਾਈਬਰ ਕ੍ਰਾਈਮ ਵਲੋਂ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਗਈ ਹੈ। ਫਿਰ ਵੀ ਜੇਕਰ ਤੁਹਾਨੂੰ ਕਿਸ ਏਟੀਐਮ 'ਤੇ ਅਜਿਹਾ ਕੁੱਝ ਸ਼ੱਕੀ ਲਗਦਾ ਹੈ ਤਾਂ ਤੁਰਤ ਇਸ ਦੀ ਜਾਣਕਾਰੀ ਪੁਲਿਸ ਜਾਂ ਸਬੰਧਤ ਬੈਂਕ ਨੂੰ ਦਿਓ।