ਬਾਦਲਾਂ ਨੂੰ ਪਈ ਫ਼ਿਕਰ, ਜੀਕੇ ਤੇ ਸਿਮਰਨਜੀਤ ਮਾਨ ਦੀ ਹੋਈ ਮਿਲਣੀ
ਚੰਡੀਗੜ੍ਹ (ਨੀਲ ਭਲਿੰਦਰ ਸਿੰਘ) : ਸਾਬਕਾ ਮੁੱਖ ਸੰਸਦੀ ਸਕੱਤਰ ਅਤੇ ਕਾਂਗਰਸੀ ਆਗੂ ਡਾਕਟਰ ਨਵਜੋਤ ਕੌਰ ਸਿਧੂ ਨੇ ਕਿਹਾ ਹੈ ਕਿ ਜੇ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੀ ਪੰਜਾਬ ਦੀ ਕਾਂਗਰਸ ਸਰਕਾਰ ਨੇ ਬੇਅਦਬੀ ਅਤੇ ਗੋਲੀਕਾਂਡ ਵਿਚ ਇਨਸਾਫ਼ ਨਾ ਦਿਤਾ ਤਾਂ ਲੋਕ ਮਨਾਂ 'ਚ ਅਕਾਲੀ ਦਲ ਖ਼ਾਸਕਰ ਬਾਦਲਾਂ ਪ੍ਰਤੀ ਪੈਦਾ ਹੋਈ ਨਫ਼ਰਤ ਕਾਂਗਰਸ ਵਲ ਤਬਦੀਲ ਹੋ ਜਾਵੇਗੀ। ਪ੍ਰੈਸ ਕਲੱਬ 'ਚ ਬਿਜਲਈ ਮੀਡੀਆ ਨਾਲ ਗੱਲ ਕਰਦਿਆਂ ਡਾਕਟਰ ਸਿੱਧੂ ਨੇ ਕਿਹਾ ਕਿ ਪੰਜਾਬ ਦੇ ਲੋਕ ਮੌਜੂਦਾ ਸਰਕਾਰ ਕੋਲੋਂ ਇਨਸਾਫ਼ ਦੀ ਤਵੱਕੋ ਕਰ ਰਹੇ ਹਨ ਅਤੇ ਲੋਕਾਂ ਦੇ ਜ਼ੋਰ ਅੱਗੇ ਸਰਕਾਰ ਨੂੰ ਝੁਕਣਾ ਹੀ ਪਵੇਗਾ।
ਉਨ੍ਹਾਂ ਚਿਤਾਵਨੀ ਦਿਤੀ ਕਿ ਜੇਕ ਕਾਂਗਰਸ ਸਰਕਾਰ ਲੋਕਾਂ ਦੀਆਂ ਉਮੀਦਾਂ ਤੋਂ ਥਿੜਕ ਗਈ ਤਾਂ ਲੋਕ ਰਾਜੇ ਮਹਾਰਾਜਿਆਂ, ਵੱਡੇ ਸਿਆਸਤਦਾਨਾਂ ਆਦਿ ਦੀ ਵੀ ਕੋਈ ਪਰਵਾਹ ਨਹੀਂ ਕਰਨਗੇ ਤੇ ਜਿਸ ਲੋਕ ਰੋਹ ਦਾ ਸਾਹਮਣਾ ਅੱਜ ਬਾਦਲਾਂ ਨੂੰ ਕਰਨਾ ਪੈ ਰਿਹਾ ਹੈ, ਉਸੇ ਦਾ ਸਾਹਮਣਾ ਮੌਜੂਦਾ ਹੁਕਮਰਾਨਾਂ ਨੂੰ ਵੀ ਕਰਨਾ ਪੈ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਤੇ ਦੋ ਬੇਕਸੂਰ ਨੌਜਵਾਨਾਂ ਦਾ ਮਾਰੇ ਜਾਣਾ ਕੋਈ ਨਿੱਕੀ ਗਲ ਨਹੀਂ ਹੈ। ਲੋੜ ਹੈ ਤਾਂ ਕਾਂਗਰਸ ਸਰਕਾਰ ਅਪਣੇ ਇਨਸਾਫ਼ ਬਾਰੇ ਦਾਅਵੇ ਨੂੰ ਪੁਗਾਵੇ।
