ਰਾਫ਼ੇਲ ਨਡਾਲ ਨੂੰ ਫ਼ਰੈਂਚ ਓਪਨ 'ਚ ਅਪਣੇ 11ਵੇਂ ਖ਼ਿਤਾਬ ਦੀ ਕਵਾਇਦ 'ਚ ਪਹਿਲੇ ਦੌਰ 'ਚ ਹੀ ਕਾਫ਼ੀ ਸੰਘਰਸ਼ ਕਰਨਾ ਪਿਆ
ਮੁੰਬਈ, 30 ਮਈ: ਰਾਫ਼ੇਲ ਨਡਾਲ ਨੂੰ ਫ਼ਰੈਂਚ ਓਪਨ 'ਚ ਅਪਣੇ 11ਵੇਂ ਖ਼ਿਤਾਬ ਦੀ ਕਵਾਇਦ 'ਚ ਪਹਿਲੇ ਦੌਰ 'ਚ ਹੀ ਕਾਫ਼ੀ ਸੰਘਰਸ਼ ਕਰਨਾ ਪਿਆ ਪਰ ਆਖ਼ਿਰ ਉਹ ਇਟਲੀ ਦੇ ਸਾਈਮਲ ਬੋਲੇਲੀ ਦੀ ਸਖ਼ਤ ਚੁਣੌਤੀ ਨੂੰ ਪਾਰ ਕਰ ਕੇ ਇਹ ਰੀਕਾਰਡ 80ਵੀਂ ਜਿੱਤ ਦਰਜ ਕਰਨ 'ਚ ਸਫ਼ਲ ਰਿਹਾ। ਦੁਨੀਆ ਦੇ ਨੰਬਰ ਇਕ ਖਿਡਾਰੀ ਨਡਾਲ ਨੇ ਦੋ ਦਿਨ ਚੱਲੇ ਇਸ ਮੈਚ 'ਚ ਤੀਜੇ ਸੈੱਟ ਪੁਆਇੰਟ ਬਚਾ ਕੇ 6-4, 6-3, 7-6 (11-9) ਨਾਲ ਜਿੱਤ ਦਰਜ ਕੀਤੀ।
ਇਹ ਮੈਚ ਦੋ ਘੰਟੇ 57 ਮਿੰਟ ਤਕ ਚਲਿਆ। ਮੈਚ ਕੱਲ੍ਹ ਪੂਰਾ ਨਹੀਂ ਹੋ ਸਕਿਆ। ਉਦੋਂ ਤਕ ਨਡਾਲ ਨੇ ਕੁਝ ਸੈੱਟ ਜਿੱਤੇ ਸਨ ਪਰ ਤੀਜੇ ਸੈੱਟ 'ਚ ਉਸ ਨੇ ਸ਼ੁਰੂ 'ਚ ਅਪਣੀ ਸਰਵਿਸ ਗਵਾ ਦਿਤੀ ਸੀ। ਬੋਲੇਲੀ ਨੇ ਵਾਪਸੀ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ। ਨਡਾਲ ਨੇ ਬੇਸ਼ਕ ਹੀ ਸ਼ੁਰੂ 'ਚ ਉਸ ਦੀ ਸਰਵਿਸ ਤੋੜ ਦਿਤੀ ਸੀ ਪਰ ਵਿਸ਼ਵ 'ਚ 129ਵੇਂ ਨੰਬਰ ਦੇ ਬੋਲੇਲੀ ਨੇ ਇਸ ਤੋਂ ਬਾਅਦ ਉਸ ਨੂੰ ਇਕ-ਇਕ ਅੰਕ ਲਈ ਖ਼ੂਬ ਸੰਘਰਸ਼ ਕਰਵਾਇਆ। ਇਹ ਸੈੱਟ ਅਖ਼ੀਰ 'ਚ ਟਾਈਬ੍ਰੇਕਰ ਤਕ ਚਲਾ ਗਿਆ, ਜਿਸ 'ਚ ਨਡਾਲ ਨੇ ਚਾਰ ਸੈੱਟ ਪੁਆਇੰਟ ਬਚਾਏ।
ਫ਼ਰੈਂਚ ਓਪਨ 'ਚ ਦਸ ਵਾਰ ਦੇ ਚੈਂਪੀਅਨ ਨੇ ਅਖ਼ੀਰ 'ਚ ਤੀਜੇ ਮੈਚ ਪੁਆਇੰਟ 'ਤੇ ਜਿੱਤ ਦਰ ਕੀਤੀ ਜਦੋਂ ਬੋਲੇਲੀ ਦਾ ਫ਼ੋਰਹੈੱਡ ਨੈੱਟ ਨਾਲ ਲੱਗ ਗਿਆ। ਨਡਾਲ ਦੂਜੇ ਦੌਰ 'ਚ ਅਰਜਟੀਨਾ ਦੇ ਗੁਈਡੋ ਪੇਲਾ ਨਾਲ ਭਿੜਨਗੇ। ਇਹ ਮੈਚ ਫ਼ਰੈਂਚ ਓਪਨ 'ਚ ਨਡਾਲ ਦੀ 80ਵੀਂ ਜਿੱਤ ਹੈ। ਉਹ ਕਿਸੇ ਗ੍ਰੈਂਡ ਸਲੈਮ 'ਚ 80 ਜਾਂ ਇਸ ਤੋਂ ਜ਼ਿਆਦਾ ਜਿੱਤਾਂ ਦਰਜ ਕਰਨ ਵਾਲਾ ਸਿਰਫ ਤੀਜਾ ਖਿਡਾਰੀ ਹੈ।