Anushka Sharma, Virat Kohli

ਨਵੀਂ ਦਿੱਲੀ - ਸੁਪਰਸਟਾਰ ਕ੍ਰਿਕਟਰ ਵਿਰਾਟ ਕੋਹਲੀ ਪਿਤਾ ਬਣਨ ਜਾ ਰਹੇ ਹਨ। ਉਹਨਾਂ ਨੇ ਆਪਣੀ ਪਤਨੀ ਅਤੇ ਅਭਿਨੇਤਰੀ ਅਨੁਸ਼ਕਾ ਸ਼ਰਮਾ ਨਾਲ ਇੱਕ ਤਸਵੀਰ ਸਾਂਝੀ ਕੀਤੀ ਹੈ ਅਤੇ ਨਾਲ ਹੀ ਉਹਨਾਂ ਲਿਖਿਆ ਕਿ ਜਨਵਰੀ 2021 ਵਿਚ ਛੋਟਾ ਮਹਿਮਾਨ ਉਹਨਾਂ ਦੇ ਘਰ ਆਉਣ ਵਾਲਾ ਹੈ। ਇਸ ਤਸਵੀਰ 'ਚ ਅਨੁਸ਼ਕਾ ਬੇਬੀ ਬੰਪ ਨਾਲ ਨਜ਼ਰ ਆ ਰਹੀ ਹੈ। 

ਵਿਰਾਟ ਕੋਹਲੀ ਅਤੇ ਅਨੁਸ਼ਕਾ ਸ਼ਰਮਾ ਬਹੁਤ ਹੀ ਮਸ਼ਹੂਰ ਕਪਲ ਹੈ। ਦੋਵੇਂ ਸਿਤਾਰੇ ਆਪਣੇ-ਆਪਣੇ ਖੇਤਰ ਵਿਚ ਸ਼ਾਨਦਾਰ ਕੰਮ ਕਰਕੇ ਸੁਰਖੀਆਂ ਵਿਚ ਰਹਿੰਦੇ ਹਨ। ਕੁਝ ਦਿਨ ਪਹਿਲਾਂ ਇੰਸਟਾਗ੍ਰਾਮ 'ਤੇ ਇਕ ਫੈਨ ਨੇ ਅਨੁਸ਼ਕਾ ਨੂੰ ਪੁੱਛਿਆ ਕਿ ਤੁਹਾਡੇ ਨਜ਼ਦੀਕੀ ਤੁਹਾਨੂੰ ਬੇਬੀ ਪਲਾਨਿੰਗ ਲਈ ਨਹੀਂ ਕਹਿੰਦੇ? ਤੁਹਾਡੇ ਵਿਆਹ ਨੂੰ ਲੰਬਾ ਸਮਾਂ ਹੋ ਗਿਆ ਹੈ। ਇਸ 'ਤੇ ਅਨੁਸ਼ਕਾ ਨੇ ਕਿਹਾ ਕਿ ਨਹੀਂ, ਕੋਈ ਨਹੀਂ ਪੁੱਛਦਾ। ਲੋਕ ਸਿਰਫ਼ ਸੋਸ਼ਲ ਮੀਡੀਆ 'ਤੇ ਪੁੱਛਦੇ ਹਨ।

ਜ਼ਿਕਰਯੋਗ ਹੈ ਕਿ ਅਨੁਸ਼ਕਾ ਅਤੇ ਵਿਰਾਟ ਵਿਚਾਲੇ ਇਕ ਬਹੁਤ ਹੀ ਮਜ਼ਬੂਤ ਰਿਸ਼ਤਾ ਹੈ। ਅਨੁਸ਼ਕਾ ਨੇ ਦੱਸਿਆ ਸੀ ਕਿ ਵਿਰਾਟ ਮੈਦਾਨ 'ਚ ਚਾਹੇ ਕਿਨੇ ਵੀ ਸਖ਼ਤ ਕਿਉਂ ਨਾ ਹੋਣ ਪਰ ਉਹ ਘਰ 'ਚ ਬਹੁਤ ਸ਼ਾਂਤ ਹਨ, ਵਿਰਾਟ ਨੇ ਅਕਸਰ ਕਿਹਾ ਹੈ ਕਿ ਅਨੁਸ਼ਕਾ ਦੇ ਕਾਰਨ ਉਸ ਦੀ ਜ਼ਿੰਦਗੀ 'ਚ ਕਈ ਪਾਜ਼ੀਟਿਵ ਬਦਲਾਅ ਆਏ ਹਨ ਅਤੇ ਵਿਆਹ ਤੋਂ ਬਾਅਦ ਉਹ ਇਕ ਬਹੁਤ ਵਧੀਆ ਇਨਸਾਨ ਬਣ ਗਏ ਹਨ। 

ਅਨੁਸ਼ਕਾ ਸ਼ਰਮਾ ਅਤੇ ਵਿਰਾਟ ਕੋਹਲੀ ਪਹਿਲੀ ਵਾਰ ਸ਼ੈਂਪੂ ਦੇ ਇਸ਼ਤਿਹਾਰ ਦੀ ਸ਼ੂਟਿੰਗ ਦੌਰਾਨ ਮਿਲੇ ਸਨ। ਉਸ ਸਮੇਂ ਵਿਰਾਟ ਕਾਫ਼ੀ ਘਬਰਾਇਆ ਹੋਇਆ ਸੀ, ਕਿਉਂਕਿ ਉਹਨਾਂ ਨੂੰ ਐਕਟਿੰਗ ਬਾਰੇ ਕੁਝ ਨਹੀਂ ਪਤਾ ਸੀ। ਇਸ ਇਸ਼ਤਿਹਾਰ ਤੋਂ ਬਾਅਦ ਦੋਵੇਂ ਦੋਸਤ ਬਣ ਗਏ ਅਤੇ ਦੋਵੇਂ ਅਕਸਰ ਇਕੱਠੇ ਦਿਖਾਈ ਦਿੱਤੇ। ਸਾਲ 2017 ਵਿਚ ਦੋਵਾਂ ਨੇ ਇਟਲੀ ਵਿਚ ਵਿਆਹ ਕਰਵਾ ਲਿਆ।