Ramzana Heer

ਮੋਹਾਲੀ : ਪੰਜਾਬੀ ਵਿਰਾਸਤੀ ਗਾਇਕਾ ਰਮਜ਼ਾਨਾ ਹੀਰ ਇਹਨੀਂ ਦਿਨੀਂ ਆਪਣੇ ਨਵੇਂ ਗੀਤਾਂ ਦੀ ਤਿਆਰੀ ਵਿਚ ਰੁੱਝੀ ਹੋਈ ਹੈ। ਸਪੋਕਸਮੈਨ ਨਾਲ ਗੱਲਬਾਤ ਦੌਰਾਨ ਰਮਜ਼ਾਨਾ ਨੇ ਦੱਸਿਆ ਕਿ ਸਰੋਤਿਆਂ ਦੀ ਮੰਗ ਅਨੁਸਾਰ ਕਾਫੀ ਸਮੇਂ ਤੋਂ ਮੇਰੀ ਕੋਸ਼ਿਸ਼ ਰਹੀ ਹੈ ਕਿ ਮੈਂ ਜਲਦੀ ਹੀ ਸਰੋਤਿਆਂ ਦੀ ਕਚਹਿਰੀ ’ਚ ਨਵੇਂ ਗੀਤ ਪੇਸ਼ ਕਰਾਂ।

ਉਹਨਾਂ ਦੱਸਿਆ ਕਿ ਪਿਤਾ ਜੀ ਦੀ ਮੌਤ ਅਤੇ ਕੋਰੋਨਾ ਦੀ ਵਜ੍ਹਾ ਕਾਰਨ ਮੈਂ ਸਾਲ ਭਰ ਸਰੋਤਿਆਂ ਨਾਲ ਰਾਬਤਾ ਕਾਇਮ ਨਹੀਂ ਕਰ ਸਕੀ ਪਰ ਹੁਣ ਮੇਰੇ ਕਾਫੀ ਗੀਤਾਂ ਦਾ ਕੰਮ ਮੁਕੰਮਲ ਹੋ ਚੁੱਕਾ ਹੈ ਅਤੇ ਤਿਆਰ ਹੋਈ ਗੀਤਾਂ ਦੀ ਫੁਲਵਾੜੀ ਵਿਚੋਂ ਮੈਂ ‘ਰੁੱਸਣਾ’ ਗੀਤ ਬਹੁਤ ਜਲਦੀ ਸਰੋਤਿਆਂ ਲਈ ਲੈਕੇ ਆ ਰਹੀ ਹਾਂ,ਜਿਸ ਨੂੰ ਲੱਕੀ ਚਾਵਲਾ ਮੁਕਤਸਰ ਨੇ ਕਲਮਬੱਧ ਕੀਤਾ ਹੈ।

ਇਸ ਦਾ ਸੰਗੀਤ ਐਡਰੇ ਨੇ ਕੀਤਾ ਹੈ ਤੇ ਇਸ ਦੀ ਵੀਡੀਓ ਦਾ ਕੰਮ ਸਾਜਨ (ਵੀਡੀਓ ਡਾਇਰੈਕਟਰ) ਦੀ ਨਿਰਦੇਸ਼ਨਾ ਹੇਠ "ਦਾ ਸਾਈਲੈਂਟ ਕਿੱਲਰ" ਟੀਮ ਵੱਲੋਂ ਕੀਤਾ ਗਿਆ ਹੈ। ਉਹਨਾਂ ਦੱਸਿਆ ਕਿ ਗਗਨਦੀਪ ਗਰਚਾ ਦੇ ਇਸ ਪ੍ਰਾਜੈਕਟ ਨੂੰ ਬਹੁਤ ਜਲਦੀ Beat24 ਮਿਊਜ਼ਿਕ ਕੰਪਨੀ ਅਤੇ ਹੈਬੀ ਸ਼ੇਰਗਿੱਲ ਵੱਲੋਂ ਵਿਸ਼ਵ ਭਰ ਵਿਚ ਰਿਲੀਜ਼ ਕੀਤਾ ਜਾਵੇਗਾ।

ਰਮਜ਼ਾਨਾ ਨੇ ਅੱਗੇ ਆਖਿਆ ਕਿ ਇਸ ਤੋਂ ਇਲਾਵਾ ਉਹਨਾਂ ਦੇ ਆਉਣ ਵਾਲੇ ਹੋਰ ਵੀ ਕਾਫੀ ਗੀਤਾਂ ਦੀ ਜਾਣਕਾਰੀ ਨੂੰ ਸਰੋਤਿਆਂ ਨਾਲ ਜਲਦੀ ਸਾਂਝਾ ਕੀਤਾ ਜਾਵੇਗਾ।