Varinderpal Singh refuses to accept prestigious award

ਨਵੀਂ ਦਿੱਲੀ: ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿਚ ਰੋਸ ਪ੍ਰਦਰਸ਼ਨ ਕਰ ਰਹੇ ਕਿਸਾਨਾਂ ਦੀ ਹਮਾਇਤ ਵਿਚ ਜਿੱਥੇ ਖਿਡਾਰੀਆਂ, ਸਾਹਿਤਕਾਰਾਂ, ਲੇਖਕਾਂ ਵੱਲੋਂ ਅਪਣੇ ਐਵਾਰਡ ਵਾਪਸ ਕਰਕੇ ਕਿਸਾਨਾਂ ਨਾਲ ਖੜ੍ਹੇ ਹੋਣ ਦਾ ਸਬੂਤ ਦਿੱਤਾ ਜਾ ਰਿਹਾ ਹੈ। ਉਥੇ ਹੀ ਹੁਣ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਇਕ ਖੇਤੀ ਵਿਗਿਆਨੀ ਡਾ. ਵਰਿੰਦਰਪਾਲ ਸਿੰਘ ਨੇ ਦਿੱਲੀ ਵਿਚ ਇਕ ਵੱਕਾਰੀ ਐਵਾਰਡ ਅਤੇ ਗੋਲਡ ਮੈਡਲ ਲੈਣ ਤੋਂ ਇਨਕਾਰ ਕਰ ਦਿੱਤਾ।

ਜਿਸ ਸਮੇਂ ਉਨ੍ਹਾਂ ਨੇ ਇਹ ਐਵਾਰਡ ਲੈਣ ਤੋਂ ਇਨਕਾਰ ਕੀਤਾ, ਉਸ ਸਮੇਂ ਵਿਸ਼ੇਸ਼ ਸਮਾਗਮ ਵਿਚ ਦੇਸ਼ ਵਿਦੇਸ਼ ਦੇ ਕਰੀਬ 800 ਖੇਤੀ ਵਿਗਿਆਨੀ ਮੌਜੂਦ ਸਨ।  ਉਨ੍ਹਾਂ ਆਖਿਆ ਕਿ ਜਦੋਂ ਸਾਡੇ ਦੇਸ਼ ਦੇ ਕਿਸਾਨ ਔਖੀ ਘੜੀ ਦੇ ਚਲਦਿਆਂ ਸੜਕਾਂ 'ਤੇ ਬੈਠੇ ਹਨ, ਅਜਿਹੇ ਵਿਚ ਮੇਰਾ ਜ਼ਮੀਰ ਮੈਨੂੰ ਇਹ ਐਵਾਰਡ ਪ੍ਰਾਪਤ ਕਰਨ ਦੀ ਇਜਾਜ਼ਤ ਨਹੀਂ ਦਿੰਦਾ। 

ਉਨ੍ਹਾਂ ਨੇ ਅੱਗੇ ਕਿਹਾ, ''ਸਤਿਕਾਰਯੋਗ ਮੰਤਰੀ ਸਾਹਿਬ ਇਹ ਪੀਏਯੂ-ਐਲਸੀਸੀ ਟੈਕਨਾਲੋਜੀ ਕਿਸਾਨਾਂ ਨੂੰ ਜਾਂਦੀ ਹੈ, ਇਹ ਇਕੱਲੇ ਪੰਜਾਬ ਵਿਚ ਸਾਲਾਨਾ 750 ਕਰੋੜ ਰੁਪਏ ਦੀ ਬੱਚਤ ਕਰਦੀ ਹੈ ਅਤੇ ਪੂਰੇ ਭਾਰਤ ਵਿਚ ਇਸ ਦੀ ਬੱਚਤ ਅਰਬਾਂ ਵਿਚ ਹੋ ਸਕਦੀ ਹੈ। ਮੈਂ ਇਸ ਤਕਨੀਕ ਨੂੰ ਪਛਾਣ ਦੇਣ ਲਈ ਤੁਹਾਡਾ ਧੰਨਵਾਦੀ ਹਾਂ। ਡਾ. ਸਤੀਸ਼ ਚੰਦਰ ਮੈਂ ਤੁਹਾਡਾ ਧੰਨਵਾਦੀ ਹਾਂ।

ਮੈਂ ਮੁਬਾਰਕਵਾਦ ਦਿੰਦਾ ਹਾਂ ਅਤੇ ਆਭਾਰੀ ਹਾਂ ਮਾਣਯੋਗ ਕੈਮੀਕਲ ਐਂਡ ਫਰਟੀਲਾਈਜ਼ਰਜ਼ ਮੰਤਰੀ ਅਤੇ ਡਾਇਰੈਕਟਰ ਜਨਰਲ ਐਫਏਆਈ ਦਾ। ਮੈਂ ਤੁਹਾਡਾ ਧੰਨਵਾਦੀ ਹਾਂ ਪਰ ਜਦੋਂ ਕਿਸਾਨ ਸੜਕਾਂ 'ਤੇ ਹਨ ਤਾਂ ਮੇਰਾ ਇਸ ਔਖੀ ਘੜੀ ਵਿਚ ਐਵਾਰਡ ਲੈਣ ਦਾ ਮਨ ਨਹੀਂ ਕਰਦਾ। ਮੈਂ ਚਾਹੁੰਦਾ ਹਾਂ ਕਿ ਅਸੀਂ ਇਕੱਠੇ ਦੇਸ਼ ਦੇ ਲਈ ਕੰਮ ਕਰੀਏ ਅਤੇ ਸਰਕਾਰ ਸਾਡੇ ਕਿਸਾਨਾਂ ਦੀ ਗੱਲ ਸੁਣੇ ਕਿਉਂਕਿ ਜੋ ਵੀ ਮੈਂ ਕੰਮ ਕੀਤਾ ਹੈ ਉਹ ਸਿਰਫ਼ ਕਿਸਾਨਾਂ ਅਤੇ ਰਾਸ਼ਟਰ ਲਈ ਹੈ।

ਮੈਂ ਸ਼ਰਮ ਮਹਿਸੂਸ ਕਰਾਂਗਾ ਕਿ ਮੈਂ ਇਸ ਸਮੇਂ ਇਹ ਐਵਾਰਡ ਪ੍ਰਾਪਤ ਕਰਾਂ ਪਰ ਮੈਂ ਬਹੁਤ ਧੰਨਵਾਦੀ ਹਾਂ ਮਾਣਯੋਗ ਕੈਮੀਕਲ ਐਂਡ ਫਰਟੀਲਾਈਜ਼ਰਸ ਮੰਤਰੀ ਅਤੇ ਡਾਇਰੈਕਟਰ ਜਨਰਲ ਐਫਏਆਈ ਦਾ। ਮੇਰੀ ਮੁਆਫ਼ੀ ਕਬੂਲ ਕਰੋ। ਮੈਨੂੰ ਇਸ ਦੇ ਲਈ ਅਫ਼ਸੋਸ ਹੈ। ਮੇਰੀ ਸਿਰਫ਼ ਇਹੀ ਭਾਵਨਾ ਹੈ ਕਿ ਅਸੀਂ ਕਿਸਾਨਾਂ ਅਤੇ ਭਾਰਤ ਸਰਕਾਰ ਲਈ ਇਕੱਠੇ ਕੰਮ ਕਰੀਏ ਤਾਂ ਕਿ ਅਸੀਂ ਅਪਣੇ ਭਾਰਤ ਨੂੰ ਮਹਾਨ ਬਣਾ ਸਕੀਏ।''

ਦੱਸ ਦਈਏ ਕਿ ਇਹ ਐਵਾਰਡ ਸਮਾਰੋਹ ਭਾਰਤੀ ਖਾਦ ਸੰਸਥਾ ਵੱਲੋਂ ਕਰਵਾਇਆ ਗਿਆ ਸੀ ਅਤੇ ਡਾ. ਵਰਿੰਦਰਪਾਲ ਸਿੰਘ ਨੂੰ ਇਹ ਐਵਾਰਡ ਖੇਤੀ ਖੋਜ ਲਈ ਦਿੱਤਾ ਜਾਣਾ ਸੀ। ਇਸ ਐਵਾਰਡ ਵਿਚ ਉਨ੍ਹਾਂ ਨੂੰ ਇਕ ਲੱਖ ਰੁਪਏ, ਪ੍ਰਸ਼ੰਸਾ ਪੱਤਰ ਅਤੇ ਸੋਨੇ ਦਾ ਤਮਗਾ ਦਿੱਤਾ ਜਾਣਾ ਸੀ, ਜਿਸ ਨੂੰ ਉਨ੍ਹਾਂ ਨੇ ਕਿਸਾਨਾਂ ਦੀ ਹਮਾਇਤ ਵਿਚ ਲੈਣ ਤੋਂ ਕੋਰੀ ਨਾਂਹ ਕਰ ਦਿੱਤੀ।