ਕਾਂਟੈਕਟ ਲੈਂਜ਼ ਵਾਲੀਆਂ ਅੱਖਾਂ ਲਈ ਕਿਸ ਤਰ੍ਹਾਂ ਦਾ ਹੋਵੇ ਮੇਕਅਪ?
ਅੱਜ ਅਸੀਂ ਤੁਹਾਨੂੰ ਕੁੱਝ ਟਿਪਸ ਦੇਵਾਂਗੇ, ਜਿਨ੍ਹਾਂ ਦੀ ਮਦਦ ਨਾਲ ਤੁਸੀਂ ਲੈਂਜ਼ ਪਾਏ ਹੋਣ ਦੇ ਬਾਵਜੂਦ ਆਰਾਮ ਨਾਲ ਆਈ ਮੇਕਅਪ ਕਰ ਸਕਦੀਆਂ ਹੋ।
ਚੰਡੀਗੜ੍ਹ: ਅੱਖਾਂ ਦੀ ਰੌਸ਼ਨੀ ਘੱਟ ਹੋਣ ’ਤੇ ਕੁੱਝ ਕੁੜੀਆਂ ਐਨਕਾਂ ਦੀ ਬਜਾਏ ਕਾਂਟੈਕਟ ਲੈਂਜ਼ ਪਹਿਨਣਾ ਜ਼ਿਆਦਾ ਪਸੰਦ ਕਰਦੀਆਂ ਹਨ। ਉਥੇ ਹੀ ਕੁੱਝ ਕੁੜੀਆਂ ਖ਼ੂਬਸੂਰਤੀ ਵਧਾਉਣ ਲਈ ਵੀ ਕਾਸਮੈਟਿਕ ਲੈਂਜ਼ ਦਾ ਕਾਫ਼ੀ ਪ੍ਰਯੋਗ ਕਰ ਰਹੀਆਂ ਹਨ। ਪਰ ਲੈਂਜ਼ ਪਾਏ ਹੋਣ ਮਗਰੋਂ ਉਹ ਮੇਕਅਪ ਕਰਨ ਤੋਂ ਡਰਦੀਆਂ ਹਨ ਕਿਉਂਕਿ ਇਸ ਨਾਲ ਇਨਫ਼ੈਕਸ਼ਨ ਦਾ ਖ਼ਤਰਾ ਰਹਿੰਦਾ ਹੈ। ਅਜਿਹੇ ਵਿਚ ਅੱਜ ਅਸੀਂ ਤੁਹਾਨੂੰ ਕੁੱਝ ਟਿਪਸ ਦੇਵਾਂਗੇ, ਜਿਨ੍ਹਾਂ ਦੀ ਮਦਦ ਨਾਲ ਤੁਸੀਂ ਲੈਂਜ਼ ਪਾਏ ਹੋਣ ਦੇ ਬਾਵਜੂਦ ਆਰਾਮ ਨਾਲ ਆਈ ਮੇਕਅਪ ਕਰ ਸਕਦੀਆਂ ਹੋ।
ਹੱਥਾਂ ਨੂੰ ਕਰੋ ਸਾਫ਼: ਮੇਕਅਪ ਕਰਨ ਤੋਂ ਪਹਿਲਾਂ ਅਪਣੇ ਹੱਥਾਂ ਨੂੰ ਚੰਗੀ ਤਰ੍ਹਾਂ ਸਾਫ਼ ਕਰੋ ਅਤੇ ਫਿਰ ਉਨ੍ਹਾਂ ਨੂੰ ਸੁਕਾ ਲਉ। ਇਸ ਤਰ੍ਹਾਂ ਮੇਕਅਪ ਕਰਦੇ ਸਮੇਂ ਲੈਂਜ਼ ’ਤੇ ਦਾਗ਼ ਨਹੀਂ ਪੈਣਗੇ ਅਤੇ ਇਨਫ਼ੈਕਸ਼ਨ ਦਾ ਖ਼ਤਰਾ ਵੀ ਨਹੀਂ ਰਹੇਗਾ।
ਅੱਖਾਂ ਦੇ ਅੰਦਰ ਨਾ ਕਰੋ ਮੇਕਅਪ: ਕੁੱਝ ਕੁੜੀਆਂ ਅੱਖਾਂ ਅੰਦਰ ਕੱਜਲ ਲਾ ਲੈਂਦੀਆਂ ਹਨ ਪਰ ਜੇਕਰ ਤੁਸੀਂ ਲੈਂਜ਼ ਪਾਏ ਹੋਏ ਹਨ ਤਾਂ ਅਜਿਹਾ ਨਾ ਕਰੋ। ਇਸ ਨਾਲ ਅੱਖਾਂ ਵਿਚ ਜਲਨ ਹੋ ਸਕਦੀ ਹੈ।
ਤੇਲ ਮੁਕਤ ਉਤਪਾਦਾਂ ਦਾ ਪ੍ਰਯੋਗ: ਲੈਂਜ਼ ਨਾਲ ਮੇਕਅਪ ਕਰਨ ਲਈ ਤੇਲ ਮੁਕਤ ਉਤਪਾਦਾਂ ਦਾ ਹੀ ਪ੍ਰਯੋਗ ਕਰੋ। ਦਰਅਸਲ ਤੇਲ ਵਾਲੇ ਉਤਪਾਦ ਤੋਂ ਨਿਕਲਣ ਵਾਲਾ ਤੇਲ ਲੈਂਜ਼ ਸੋਖ ਲੈਂਦਾ ਹੈ। ਇਸ ਨਾਲ ਤੁਹਾਨੂੰ ਧੁੰਦਲਾ ਵਿਖਾਈ ਦੇਣ ਲਗਦਾ ਹੈ।
ਫ਼ਾਈਬਰ ਯੁਕਤ ਮਸਕਾਰਾ: ਆਈ ਮੇਕਅਪ ਲਈ ਫ਼ਾਈਬਰ ਯੁਕਤ ਮਸਕਾਰੇ ਦਾ ਇਸਤੇਮਾਲ ਨਾ ਕਰੋ। ਇਸ ਨਾਲ ਅੱਖਾਂ ਵਿਚ ਇਨਫ਼ੈਕਸ਼ਨ, ਜਲਨ ਅਤੇ ਖੁਰਕ ਹੋ ਸਕਦੀ ਹੈ। ਲੈਂਜ਼ ਨਾਲ ਮੇਕਅਪ ਕਰਨ ਲਈ ਮਸਕਾਰੇ ਦਾ ਪ੍ਰਯੋਗ ਸਾਵਧਾਨੀ ਨਾਲ ਕਰੋ।
ਨਕਲੀ ਪਲਕਾਂ: ਅੱਜਕਲ੍ਹ ਪਲਕਾਂ ਨੂੰ ਸੰਘਣੀਆਂ ਵਿਖਾਉਣ ਲਈ ਕੁੜੀਆਂ ਨਕਲੀ ਪਲਕਾਂ ਦਾ ਇਸਤੇਮਾਲ ਕਰਦੀਆਂ ਹਨ ਪਰ ਲੈਂਜ਼ ਲਾਉਣ ਤੋਂ ਬਾਅਦ ਇਨ੍ਹਾਂ ਦਾ ਪ੍ਰਯੋਗ ਨੁਕਸਾਨਦਾਇਕ ਹੋ ਸਕਦਾ ਹੈ। ਏਨਾ ਹੀ ਨਹੀਂ, ਨਕਲੀ ਪਲਕਾਂ ਨਾਲ ਅੱਖਾਂ ਉੱਤੇ ਕੱਟ ਵੀ ਲੱਗ ਸਕਦਾ ਹੈ। ਅਜਿਹੇ ਵਿਚ ਬਿਹਤਰ ਹੋਵੇਗਾ ਕਿ ਤੁਸੀ ਇਨ੍ਹਾਂ ਦਾ ਇਸਤੇਮਾਲ ਨਾ ਕਰੋ।
ਮੇਕਅਪ ਤੋਂ ਪਹਿਲਾਂ ਕਾਂਟੈਕਟ ਲੈਂਜ਼: ਅਕਸਰ ਕੁੜੀਆਂ ਮੇਕਅਪ ਕਰਨ ਤੋਂ ਬਾਅਦ ਲੈਂਜ਼ ਲਾਉਂਦੀਆਂ ਹਨ ਪਰ ਅਜਿਹਾ ਕਰਨਾ ਗ਼ਲਤ ਹੈ। ਮੇਕਅਪ ਕਰਨ ਤੋਂ ਪਹਿਲਾਂ ਲੈਂਜ਼ ਲਾ ਲਉ। ਇਸ ਨਾਲ ਅੱਖਾਂ ਵਿਚ ਜਲਨ ਅਤੇ ਖੁਰਕ ਦੀ ਸਮੱਸਿਆ ਨਹੀਂ ਹੋਵੇਗੀ ।
ਆਈਸ਼ੈਡੋ: ਜੇਕਰ ਤੁਸੀਂ ਕਾਸਮੈਟਿਕ ਲੈਂਜ਼ ਲਾਉਂਦੇ ਹੋ ਤਾਂ ਪਾਊਡਰ ਦੀ ਬਜਾਏ ਕਰੀਮ ਆਈਸ਼ੈਡੋ ਦਾ ਇਸਤੇਮਾਲ ਕਰੋ। ਇਹ ਨਾ ਸਿਰਫ਼ ਜ਼ਿਆਦਾ ਦੇਰ ਤਕ ਅੱਖਾਂ ਉਤੇ ਟਿਕਿਆ ਰਹਿੰਦਾ ਹੈ ਸਗੋਂ ਇਸ ਨਾਲ ਕੋਈ ਨੁਕਸਾਨ ਵੀ ਨਹੀਂ ਹੁੰਦਾ।
ਆਈਲਾਈਨਰ ਲਾਉਂਦੇ ਸਮੇਂ ਵੀ ਅੱਖਾਂ ਦਾ ਖ਼ਾਸ ਖ਼ਿਆਲ ਰਖਣਾ ਚਾਹੀਦਾ ਹੈ ਕਿਉਂਕਿ ਕਈ ਵਾਰ ਉਹ ਤੁਹਾਡੀਆਂ ਅੱਖਾਂ ਅੰਦਰ ਚਲਿਆ ਜਾਂਦਾ ਹੈ। ਇਸ ਨਾਲ ਅੱਖਾਂ ਵਿਚ ਜਲਨ, ਖੁਜਲੀ ਅਤੇ ਪਾਣੀ ਆਉਣ ਲਗਦਾ ਹੈ ਅਤੇ ਇਸ ਦਾ ਅਸਰ ਲੈਂਜ਼ ਉਤੇ ਵੀ ਪੈਂਦਾ ਹੈ। ਅੱਖਾਂ ਦੀ ਵਾਟਰਲਾਈਨ ਉਤੇ ਹੀ ਲਾਈਨਰ ਧਿਆਨ ਨਾਲ ਲਾਉ। ਹਲਕੇ ਹੱਥਾਂ ਨਾਲ ਮੇਕਅਪ ਕਰੋ ਤਾਂਕਿ ਅੱਖਾਂ ’ਚੋਂ ਲੈਂਜ਼ ਨਿਕਲ ਨਾ ਜਾਵੇ। ਜੇਕਰ ਤੁਹਾਨੂੰ ਕਿਸੇ ਉਤਪਾਦ ਤੋਂ ਜਲਨ ਹੈ ਤਾਂ ਤੁਰਤ ਜਾ ਕੇ ਅੱਖਾਂ ਨੂੰ ਠੰਢੇ ਪਾਣੀ ਨਾਲ ਧੋ ਲਉ। ਨਹੀਂ ਤਾਂ ਇਸ ਨਾਲ ਇਨਫ਼ੈਕਸ਼ਨ ਹੋ ਸਕਦਾ ਹੈ। ਕਾਂਟੈਕਟ ਜਾਂ ਕਾਸਮੈਟਿਕ ਲੈਂਜ਼ ਲਈ ਸਪੈਸ਼ਲ ਮੇਕਅਪ ਪ੍ਰੋਡਕਟਸ ਬਣਾਏ ਜਾਂਦੇ ਹਨ ਇਸ ਲਈ ਤੁਸੀਂ ਉਨ੍ਹਾਂ ਦਾ ਇਸਤੇਮਾਲ ਕਰੋ।