ਟਮਾਟਰ ਚੌਲ ਬਹੁਤ ਚਟਪਟੇ ਹੁੰਦੇ ਹਨ। ਇਹ ਫ਼ਟਾਫ਼ਟ ਬਣ ਜਾਂਦੇ ਹਨ। ਇਸ ਨੂੰ ਤੁਸੀਂ ਨਾਸ਼ਤੇ ਜਾਂ ਦੁਪਹਿਰ ਦੇ ਖਾਣੇ ਸਮੇਂ ਖਾ ਸਕਦੇ ਹੋ। ਅਪਣੇ ਸਵਾਦ ਅਨੁਸਾਰ ਇਸ 'ਚ ਹੋਰ ਮਸਾਲੇ ਵੀ ਪਾ ਸਕਦੇ ਹੋ। ਇਸ ਨੂੰ ਪਾਪੜ ਜਾਂ ਰਾਇਤੇ ਨਾਲ ਖਾਉ ਅਤੇ ਆਨੰਦ ਮਾਣੋ।

ਸਮੱਗਰੀ: 2 ਕੱਪ ਚੌਲ, 4 ਬਰੀਕ ਕੱਟੇ ਟਮਾਟਰ, 1 ਬਰੀਕ ਕੱਟਿਆ ਪਿਆਜ਼, 5 ਚਮਚ ਮਟਰ, 1 ਹਰੀ ਮਿਰਚ, 1 ਚਮਚ ਅਦਰਕ-ਲੱਸਣ ਦਾ ਪੇਸਟ, 1 ਚਮਚ ਲਾਲ ਮਿਰਚ ਪਾਊਡਰ, ਅੱਧਾ ਚਮਚ ਹਲਦੀ ਪਾਊਡਰ, 1 ਚਮਚ ਟੋਮੈਟੋ ਸੌਸ, ਨਮਕ ਸਵਾਦ ਅਨੁਸਾਰ, 2 ਕੱਪ ਪਾਣੀ, 2 ਕੱਪ ਘਿਉ।

ਵਿਧੀ: ਪ੍ਰੈਸ਼ਰ ਕੁੱਕਰ 'ਚ ਘਿਉ ਪਾ ਕੇ ਗਰਮ ਕਰੋ ਅਤੇ ਫਿਰ ਇਸ 'ਚ ਵਿਚਕਾਰੋਂ ਕੱਟੀ ਹਰੀ ਮਿਰਚ ਪਾਉ। ਇਸ ਪਿੱਛੋਂ ਪਿਆਜ਼ ਪਾ ਕੇ ਹਲਕਾ ਸੁਨਹਿਰੀ ਹੋਣ ਤਕ ਪਕਾਉ। ਫਿਰ ਟਮਾਟਰ ਪਾ ਕੇ 5 ਮਿੰਟ ਤਕ ਹਿਲਾਉ। ਇਸ ਪਿਛੋਂ ਅਦਰਕ-ਲਸਣ ਦਾ ਪੇਸਟ, ਹਲਦੀ ਅਤੇ ਲਾਲ ਮਿਰਚ ਪਾ ਦਿਉ। ਸੱਭ ਕੁੱਝ ਪਾਉਣ ਤੋਂ ਬਾਅਦ ਹੀ ਟੋਮੈਟੋ ਸੌਸ ਅਤੇ ਨਮਕ ਪਾ ਕੇ ਹਿਲਾਉ।

ਇਸ ਸਾਰੀ ਸਮੱਗਰੀ ਨੂੰ 5-6 ਮਿੰਟ ਤਕ ਚੰਗੀ ਤਰ੍ਹਾਂ ਰਿੰਨ੍ਹੋ। ਫਿਰ ਇਸ 'ਚ ਧੋਤੇ ਹੋਏ ਚੌਲ ਪਾਉ। ਕੁੱਝ ਦੇਰ ਫ਼ਰਾਈ ਕਰੋ। ਫਿਰ ਪਾਣੀ ਪਾ ਕੇ ਢੱਕਣ ਬੰਦ ਕਰ ਦਿਉ। 3 ਸੀਟੀਆਂ ਤੋਂ ਬਾਅਦ ਗੈਸ ਬੰਦ ਕਰ ਦਿਉ। ਗਰਮਾ-ਗਰਮ ਪਰੋਸੋ।