ਯਾਤਰੀਆਂ ਲਈ ਸਿਆਚਿਨ ਗਲੇਸ਼ੀਅਰ ਨੂੰ ਖੋਲ੍ਹਣ ਦੀ ਸਰਕਾਰ ਨੇ ਦਿੱਤੀ ਮਨਜ਼ੂਰੀ
ਗਲੇਸ਼ੀਅਰ 'ਤੇ ਠੰਡ ਦੇ ਮੌਸਮ ਦੌਰਾਨ ਬਰਫੀਲੇ ਤੂਫਾਨ ਅਤੇ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਆਮ ਹਨ।
ਨਵੀਂ ਦਿੱਲੀ: ਸਰਕਾਰ ਨੇ ਸੋਮਵਾਰ ਨੂੰ ਸਿਆਚਿਨ ਖੇਤਰ ਨੂੰ ਹੁਣ ਯਾਤਰੀਆਂ ਲਈ ਖੋਲ੍ਹਣ ਦਾ ਐਲਾਨ ਕਰ ਦਿੱਤਾ ਹੈ। ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਕਿਹਾ ਕਿ ਸਰਕਾਰ ਨੇ ਸਿਆਚਿਨ ਬੇਸ ਕੈਂਪ ਤੋਂ ਲੈ ਕੇ ਕੁਮਾਰ ਪੋਸਟ ਤਕ ਪੂਰੇ ਇਲਾਕੇ ਨੂੰ ਯਾਤਰੀਆਂ ਲਈ ਖੋਲ੍ਹਣ ਦਾ ਫ਼ੈਸਲਾ ਕੀਤਾ ਹੈ। ਉਹਨਾਂ ਕਿਹਾ ਕਿ ਇਹ ਕਦਮ ਇਸ ਲਈ ਉਠਾਇਆ ਗਿਆ ਹੈ ਤਾਂ ਕਿ ਲੋਕ ਦੇਖ ਸਕਣ ਕਿ ਫ਼ੌਜ ਦੇ ਜਵਾਨ ਅਤੇ ਇੰਜੀਨੀਅਰ ਠੰਡੇ ਮੌਸਮ ਵਿਚ ਕਿਸ ਤਰ੍ਹਾਂ ਕੰਮ ਕਰਦੇ ਹਨ।
ਸਿੰਘ ਨੇ ਚੀਨ ਨਾਲ ਲਗਦੀ ਭਾਰਤ ਦੀ ਸਰਹੱਦ ਤੋਂ ਲਗਭਗ 45 ਕਿਲੋਮੀਟਰ ਦੂਰ ਸ਼ਯੋਕ ਨਦੀ ਤੇ ਕਰਨਲ ਚੇਵਾਂਗ ਰਿਨਚਿਨ ਪੁਲ ਦੇ ਉਦਘਾਟਨ ਮੌਕੇ ਪੂਰਵੀ ਲੱਦਾਖ ਵਿਚ ਆਯੋਜਿਤ ਇਕ ਸਮਾਰੋਹ ਨੂੰ ਸੰਬੋਧਿਤ ਕਰ ਰਹੇ ਸਨ। ਕਾਰਕੋਰਮ ਖੇਤਰ ਵਿਚ ਲਗਭਗ 20 ਹਜ਼ਾਰ ਫੁੱਟ ਦੀ ਉਚਾਈ ਤੇ ਸਥਿਤ ਸਿਆਚਿਨ ਗਲੇਸ਼ੀਅਰ ਵਿਸ਼ਵ ਵਿਚ ਸਭ ਤੋਂ ਉੱਚਾ ਫ਼ੌਜ ਖੇਤਰ ਮੰਨਿਆ ਜਾਂਦਾ ਹੈ, ਜਿੱਥੇ ਫ਼ੌਜ ਨੂੰ ਫ੍ਰਾਸਟਬਾਈਟ ਅਤੇ ਤੇਜ਼ ਹਵਾਵਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਗਲੇਸ਼ੀਅਰ ਤੇ ਠੰਡ ਦੇ ਮੌਸਮ ਦੌਰਾਨ ਬਰਫੀਲੇ ਤੂਫਾਨ ਅਤੇ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਆਮ ਹਨ। ਨਾਲ ਹੀ ਇੱਥੇ ਤਾਪਮਾਨ 0 ਤੋਂ 60 ਡਿਗਰੀ ਸੈਲਸੀਅਸ ਹੇਠਾਂ ਤਕ ਚਲਿਆ ਜਾਂਦਾ ਹੈ। ਪੁਲ ਦੇ ਉਦਘਾਟਨ ਦੌਰਾਨ ਰੱਖਿਆ ਮੰਤਰੀ ਨੇ ਕਿਹਾ ਕਿ ਇਸ ਦੇ ਨਿਰਮਾਣ ਵਿਚ ਕੇਵਲ ਸਟੀਲ ਅਤੇ ਕੰਕਰੀਟ ਹੀ ਨਹੀਂ ਲੱਗਿਆ ਹੈ ਬਲਕਿ ਇੰਜੀਨੀਅਰਾਂ ਅਤੇ ਸੀਮਾ ਸੜਕ ਸੰਗਠਨ ਦੇ ਹੋਰ ਕਰਮੀਆਂ ਦਾ ਪਸੀਨਾ ਅਤੇ ਮਿਹਨਤ ਵੀ ਲੱਗੀ ਹੈ।
ਕਰਨਲ ਚੇਵਾਂਗ ਰਿਨਚਿਨ ਬ੍ਰਿਜ ਸਭ ਤੋਂ ਵੱਧ ਉਚਾਈ ਵਾਲਾ ਪੁਲ ਹੈ ਜੋ ਦੁਰਬੁਕ ਅਤੇ ਦੌਲਤ ਬੇਗ ਓਲਡੀ ਨੂੰ ਆਪਸ ਵਿਚ ਜੋੜੇਗਾ। ਨਾਲ ਹੀ ਯਾਤਰਾ ਸਮੇਂ ਨੂੰ ਲਗਭਗ ਅੱਧਾ ਕਰ ਦੇਵੇਗਾ। ਇਸ ਦੀ ਲੰਬਾਈ 1,400 ਫੁੱਟ ਹੈ। ਸੂਤਰਾਂ ਨੇ ਦਸਿਆ ਕਿ ਭਾਰਤੀ ਫ਼ੌਜ ਨੇ ਖੇਤਰ ਵਿਚ ਕੰਮ ਕਰਨ ਵਾਲੀ ਫ਼ੌਜ ਦੇ ਕੰਮਾਂ ਦੀ ਸਥਿਤੀ ਦਿਖਾਉਣ ਲਈ ਸਿਆਚਿਨ ਨੂੰ ਸੈਰ ਸਪਾਟੇ ਲਈ ਖੋਲ੍ਹਣ ਦਾ ਪ੍ਰਸਤਾਵ ਭੇਜਿਆ ਸੀ ਅਤੇ ਸਰਕਾਰ ਨੇ ਇਸ ਨੂੰ ਅਪਣੀ ਪ੍ਰਵਾਨਗੀ ਦਿੱਤੀ ਸੀ।
ਅਧਿਕਾਰਤ ਅੰਕੜਿਆਂ ਅਨੁਸਾਰ ਸੈਨਾ ਨੇ ਪਿਛਲੇ 10 ਸਾਲਾਂ ਵਿਚ ਦੁਨੀਆ ਦੇ ਸਭ ਤੋਂ ਉੱਚੇ ਯੁੱਧ ਦੇ ਮੈਦਾਨ ਵਿਚ 163 ਜਵਾਨ ਗਵਾਏ ਹਨ। ਭਾਰਤ ਅਤੇ ਪਾਕਿਸਤਾਨ ਨੇ ਸਾਲ 1984 ਵਿਚ ਰਣਨੀਤਕ ਮਹੱਤਵਪੂਰਨ ਗਲੇਸ਼ੀਅਰ ਖੇਤਰ ਵਿਚ ਫ਼ੌਜਾਂ ਦੀ ਤਾਇਨਾਤੀ ਕਰਨੀ ਸ਼ੁਰੂ ਕਰ ਦਿੱਤੀ ਸੀ ਅਤੇ ਉਸ ਸਮੇਂ ਪਹਾੜੀ ਮੁਹਿੰਮਾਂ ਨੂੰ ਮਨਜ਼ੂਰੀ ਦਿੱਤੀ ਗਈ ਸੀ। ਸੰਨ 1984 ਵਿਚ ‘ਆਪ੍ਰੇਸ਼ਨ ਮੇਘਦੂਤ’ ਤੋਂ ਬਾਅਦ ਗਲੇਸ਼ੀਅਰ ਭਾਰਤ ਦੇ ਕਬਜ਼ੇ ਵਿਚ ਆਇਆ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।