Gautam Gambhir gets support from Laxman, Harbhajan in pamphlet case

ਨਵੀਂ ਦਿੱਲੀ : ਭਾਰਤੀ ਟੀਮ ਦੇ ਸਾਬਕਾ ਖਿਡਾਰੀ ਵੀਵੀਐਸ ਲਕਸ਼ਮਣ ਅਤੇ ਹਰਭਜਨ ਸਿੰਘ ਨੇ ਪਰਚਾ ਵਿਵਾਦ ਵਿਚ ਟੀਮ ਦੇ ਸਾਬਕਾ ਸਾਥੀ ਅਤੇ ਪੂਰਬੀ ਦਿੱਲੀ ਤੋਂ ਭਾਰਤੀ ਜਨਤਾ ਪਾਰਟੀ ਦੇ ਉਮੀਦਵਾਰ ਗੌਤਮ ਗੰਭੀਰ ਦਾ ਸਮਰਥਨ ਕੀਤਾ ਹੈ। ਇਸੇ ਚੋਣ ਖੇਤਰ ਵਿਚ 'ਆਪ' ਉਮੀਦਵਾਰ ਆਤਿਸ਼ੀ ਨੇ ਵੀਰਵਾਰ ਨੂੰ ਅਪਣੇ ਵਿਰੁਧ 'ਇਤਰਾਜ਼ਯੋਗ ਅਤੇ ਅਪਮਾਨਜਨਕ' ਟਿਪਣੀਆਂ ਵਾਲਾ ਇਕ ਪਰਚਾ ਪੜ੍ਹਦੇ ਹੋਏ ਦਾਵਾ ਕੀਤਾ ਕਿ ਉਸ ਦੇ ਵਿਰੋਧੀ ਗੰਭੀਰ ਨੇ ਚੋਣ ਖੇਤਰ ਵਿਚ ਇਹ ਪਰਚੇ ਵੰਡਵਾਏ।

ਲਕਸ਼ਮਣ ਨੇ ਸ਼ੁਕਰਵਾਰ ਨੂੰ ਟਵੀਟ ਕੀਤਾ, ''ਕਲ (ਵੀਰਵਾਰ) ਦੀ ਘਟਨਾ ਬਾਰੇ ਸੁਣ ਕੇ ਹੈਰਾਨੀ ਹੋਈ। ਗੰਭੀਰ ਨੂੰ ਦੋ ਦਹਾਕੇਆਂ ਤੋਂ ਜਾਣਦਾ ਹਾਂ, ਔਰਤਾਂ ਲਈ ਉਨ੍ਹਾਂ ਦੇ ਸਨਮਾਨ, ਇਮਾਨਦਾਰੀ, ਚਰਿੱਤਰ ਦੀ ਮੈਂ ਗਰੰਟੀ ਲੈ ਸਕਦਾ ਹਾਂ।'' ਹਰਭਜਨ ਸਿੰਘ ਨੇ ਟਵੀਟ ਕਰਦੇਆਂ ਕਿਹਾ ਕਿ, ''ਗੌਤਮ ਗੰਭੀਰ ਨਾਲ ਜੁੜੀ ਕਲ ਦੀ ਗੱਲ ਸੁਣ ਕੇ ਮੀ ਹੈਰਾਨ ਹਾਂ। ਮੈਂ ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਜਾਣਦਾ ਹਾਂ, ਉਹ ਕਦੀ ਵੀ ਕਿਸੀ ਮਹਿਲਾ ਵਿਰੁਧ ਗ਼ਲਤ ਨਹੀਂ ਬੋਲਣਗੇ। ਉਹ ਜਿੱਤਣ ਜਾਂ ਹਾਰਨ ਇਹ ਅਲੱਗ ਮਸਲਾ ਹੈ।''

ਗੰਭੀਰ ਨੇ ਦੋਸ਼ਾਂ ਨੂੰ ਖਾਰਜ ਕਰਦੇ ਹੋਏ ਅਤਿਸ਼ੀ, ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਅਤੇ ਉੱਪ ਮੁੱਖ ਮੰਤਰੀ ਮਨੀਸ਼ ਸੀਸੋਦੀਆ ਨੂੰ ਮਾਨ ਹਾਨੀ ਦਾ ਨੋਟਿਸ ਭੇਜਿਆ ਹੈ।