ਨਵੀਂ ਦਿੱਲੀ : ਰਾਜ ਦੀ ਮਲਕੀਅਤ ਵਾਲੀ ਦੂਰਸੰਚਾਰ ਕੰਪਨੀ ਬੀਐਸਐਨਐਲ ਬੁਰੇ ਦੌਰ ਤੋਂ ਗੁਜ਼ਰ ਰਹੀ ਹੈ। ਬੀਐਸਐਨਐਲ ਆਰਥਿਕ ਤੰਗੀ ਦੇ ਕਾਰਨ ਆਪਣੇ ਲਗਭਗ 1.76 ਲੱਖ ਕਰਮਚਾਰੀਆਂ ਨੂੰ ਫਰਵਰੀ ਦੀ ਤਨਖਾਹ ਦੇਣ ਵਿਚ ਅਸਫਲ ਰਹੀ ਹੈ। ਇਹ ਪਹਿਲੀ ਵਾਰ ਹੈ ਜਦ ਅਜਿਹਾ ਹੋਇਆ ਹੈ।

ਕਰਮਚਾਰੀ ਯੂਨੀਅਨ ਨੇ ਦੂਰਸੰਚਾਰ ਮੰਤਰੀ ਮਨੋਜ ਸਿਨਹਾ ਨੂੰ ਅਰਜ਼ੀ ਲਿਖ ਕੇ ਕਿਹਾ ਹੈ ਕਿ ਸਰਕਾਰ ਕੰਪਨੀ ਨੂੰ ਤਨਖਾਹ ਦੇ ਨਾਲ-ਨਾਲ ਪੁਨਰਜੀਵਤ ਕਰਨ ਲਈ ਫੰਡ ਵੀ ਜਾਰੀ ਕਰੇ। ਕੰਪਨੀ ਦੇ ਕਰਮਚਾਰੀ ਧਰਨੇ ਲਾ ਕੇ ਪ੍ਰਦਰਸ਼ਨ ਵੀ ਕਰ ਰਹੇ ਹਨ।

ਬੀਐਸਐਨਐਲ ਦਾ ਲਗਭਗ 55 ਪ੍ਰਤੀਸ਼ਤ ਹਿੱਸਾ ਮਾਲ ਵਿਭਾਗ ਦੇ ਭੁਗਤਾਨ ਵਿਚ ਜਾਂਦਾ ਹੈ ਜਦਕਿ ਕੰਪਨੀ ਦਾ ਤਨਖਾਹ ਬਿਲ ਹਰ ਸਾਲ 8 ਪ੍ਰਤੀਸ਼ਤ ਵਧਦਾ ਹੈ। ਬੀਐਸਐਨਐਲ ਦੇ ਯੂਨੀਅਨਾਂ ਦਾ ਕਹਿਣਾ ਹੈ ਕਿ ਰਿਲਾਇੰਸ ਜੀਓ ਦੀ ਨਿਰਧਾਰਿਤ ਕੀਮਤ ਕਾਰਨ , ਦੂਰਸੰਚਾਰ ਉਦਯੋਗ ਦੀ ਆਰਥਿਕ ਸਥਿਤੀ ਨੂੰ ਨੁਕਸਾਨ ਹੋਇਆ ਹੈ। 

ਸਿਨਹਾ ਨੇ ਬੀਐਸਐਨਐਲ ਦੀਆਂ ਸਾਰੀਆਂ ਯੂਨੀਅਨਾਂ ਅਤੇ ਐਸੋਸੀਏਸ਼ਨਾਂ ਨੂੰ ਇਕ ਪੱਤਰ ਵਿਚ ਕਿਹਾ, ‘ਹੋਰ ਓਪਰੇਟਰਾਂ ਵੱਲੋਂ ਵੀ ਵਿੱਤੀ ਸੰਕਟ ਦਾ ਸਾਹਮਣਾ ਕੀਤਾ ਜਾ ਰਿਹਾ ਹੈ, ਪਰ ਉਹ ਜ਼ਿਆਦਾ ਮਾਤਰਾ ਵਿਚ ਨਿਵੇਸ਼ ਕਰਕੇ ਸਥਿਤੀ ਵਿਚ ਸੁਧਾਰ ਕਰ ਰਹੇ ਹਨ’।

ਬੀਐਸਐਨਐਲ ਦੇ ਇਕ ਅਧਿਕਾਰੀ ਨੇ ਕਿਹਾ ਹੈ ਕਿ ਕੰਪਨੀ ਨੇ ਕੇਰਲ, ਜੰਮੂ ਅਤੇ ਕਸ਼ਮੀਰ, ਓਡੀਸ਼ਾ ਅਤੇ ਕਾਰਪੋਰੇਟ ਦਫਤਰ ਵਿਚ ਕਰਮਚਾਰੀਆਂ ਨੂੰ ਫਰਵਰੀ ਦੀ ਤਨਖਾਹ ਦੇਣੀ ਸ਼ੁਰੂ ਕਰ ਦਿੱਤੀ ਹੈ। ਉਹਨਾਂ ਨੇ ਕਿਹਾ, ‘ਹੁਣ ਜਦੋਂ ਆਮਦਨ ਹੋਵੇਗੀ ਤਾਂ ਕਰਮਚਾਰੀਆਂ ਨੂੰ ਤਨਖਾਹ ਦਿੱਤੀ ਜਾਵੇਗੀ। ਕਿਉਂਕਿ ਸਕਰਾਰ ਨੇ ਕੋਈ ਆਰਥਿਕ ਮਦਦ ਨਹੀਂ ਕੀਤੀ, ਇਸ ਲਈ ਤਨਖਾਹ ਵਿਚ ਦੇਰੀ ਹੋ ਰਹੀ ਹੈ’।

ਸੂਤਰਾਂ ਅਨੁਸਾਰ ਮਾਰਚ ਮਹੀਨੇ ਦੀ ਤਨਖਾਹ ਵਿਚ ਕੁਝ ਦਿਨਾਂ ਦੀ ਦੇਰੀ ਹੋਵੇਗੀ। ਇਕ ਹੋਰ ਸੂਤਰ ਦਾ ਕਹਿਣਾ ਹੈ ਕਿ ਬੀਐਸਐਨਐਲ ਬੋਰਡ ਨੇ ਬੈਂਕ ਤੋਂ ਲੋਨ ਲੈਣ ਦੀ ਮਨਜ਼ੂਰੀ ਦੇ ਦਿੱਤੀ ਹੈ, ਪਰ ਵਿਭਾਗ ਨੇ ਹੁਣ ਤੱਕ ਇਸ ਨੂੰ ਅੱਗੇ ਨਹੀਂ ਵਧਾਇਆ। ਹਰ ਸਾਲ ਬੀਐਸਐਨਐਲ ਨੂੰ ਘਾਟਾ ਹੋ ਰਿਹਾ ਹੈ। ਸਾਲ 2018 ਵਿਚ ਲਗਭਗ 8,000 ਕਰੋੜ ਦਾ ਘਾਟਾ ਦਰਜ ਕੀਤਾ ਗਿਆ, ਜਦਕਿ ਸਾਲ 2017 ਵਿਚ ਘਾਟਾ 4,786 ਕਰੋੜ ਸੀ।