Trump

ਵਾਸ਼ਿੰਗਟਨ : ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਇਸ ਗੱਲ ਤੋਂ ਮਨਾ ਕਰ ਦਿਤਾ ਹੈ ਕਿ ਉਹ ਅਮਰੀਕਾ ਨੂੰ ਵਿਸ਼ਵ ਵਪਾਰ ਸੰਸਥਾ (ਡਬਲਿਊਟੀਓ) ਤੋਂ ਬਾਹਰ ਕੱਢਣ ਦੀ ਯੋਜਨਾ 'ਤੇ ਕੰਮ ਕਰ ਰਹੇ ਹਨ। ਹਾਲਾਂਕਿ, ਉਨ੍ਹਾਂ ਨੇ ਅਮਰੀਕਾ ਦੇ ਨਾਲ ਬਹੁਤ ਮਾੜਾ ਵਿਹਾਰ ਕਰਨ ਲਈ ਡਬਲਿਊਟੀਓ ਦੀ ਸਖ਼ਤ ਆਲੋਚਨਾ ਕੀਤੀ। ਟਰੰਪ ਦੀ ਇਹ ਟਿੱਪਣੀ ਉਨ੍ਹਾਂ ਰਿਪੋਰਟਾਂ ਤੋਂ ਬਾਅਦ ਆਈ ਹੈ ਜਿਨ੍ਹਾਂ ਵਿਚ ਕਿਹਾ ਗਿਆ ਹੈ ਕਿ ਟਰੰਪ ਨੇ ਅਪਣੇ ਮੁਖ ਅਧਿਕਾਰੀਆਂ ਤੋਂ ਕਿਹਾ ਹੈ ਕਿ ਉਹ ਅਮਰੀਕਾ ਨੂੰ ਡਬਲਿਊਟੀਓ ਤੋਂ ਬਾਹਰ ਕਰਨਾ ਚਾਹੁੰਦੇ ਹਨ।

ਟਰੰਪ ਨੇ ਪੱਤਰਕਾਰਾਂ ਨੂੰ ਕਿਹਾ ਕਿ ਡਬਲਿਊਟੀਓ ਦਾ ਸਾਡੇ ਨਾਲ ਬਹੁਤ ਮਾੜਾ ਵਿਹਾਰ ਰਿਹਾ ਹੈ। ਇਹ ਬਹੁਤ ਹੀ ਅਣਉਚਿਤ ਹਾਲਤ ਹੈ। ਤੁਸੀਂ ਜਦੋਂ ਡਬਲਿਊਟੀਓ ਵੱਲ ਦੇਖਦੇ ਹੋ ਤਾਂ ਦਿਖਾਈ ਦਿੰਦਾ ਹੈ ਚੀਨ ਨੇ ਜਦੋਂ ਇਸ ਦੀ ਮੈਂਬਰੀ ਆਪਣੇ ਹੱਥ ਲਈ, ਉਦੋਂ ਤੋਂ ਚੀਨ ਨੂੰ ਹੀ ਇਸ ਵਿਚ ਫਾਇਦਾ ਪਹੁੰਚਿਆ ਹੈ। ਟਰੰਪ ਲੰਮੇ ਸਮੇਂ ਤੋਂ ਡਬਲਿਊਟੀਓ ਦੀ ਨਿੰਦਿਆ ਕਰਦੇ ਰਹੇ ਹਨ। ਉਹ ਅਕਸਰ ਇਹ ਕਹਿੰਦੇ ਰਹੇ ਹਨ ਕਿ ਇਹ ਵਿਸ਼ਵ ਵਪਾਰ ਸੰਸਥਾ ਅਮਰੀਕਾ ਦੇ ਪ੍ਰਤੀ ਭੇਦਭਾਵ ਕਰਦੀ ਹੈ।

ਰਾਸ਼ਟਰਪਤੀ ਨੇ ਅਪਣੇ ਇਸ ਦੋਸ਼ਾਂ ਨੂੰ ਵੀ ਦੁਹਰਾਇਆ ਕਿ ਦੂਜੇ ਦੇਸ਼ ਅਮਰੀਕਾ ਦਾ ਫ਼ਾਇਦਾ ਉਠਾ ਰਹੇ ਹਨ। ਉਨ੍ਹਾਂ ਦਾ ਇਲਜ਼ਾਮ ਹੈ ਕਿ ਇਹ ਸੱਭ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀਆਂ ਤੋਂ ਠੀਕ ਢੰਗ ਨਾਲ ਗੱਲਬਾਤ ਨਹੀਂ ਕੀਤੇ ਜਾਣ ਦੀ ਵਜ੍ਹਾ ਤੋਂ ਹੋਇਆ ਹੈ। ਡਬਲਿਊਟੀਓ ਨਾਲ ਅਮਰੀਕਾ ਦੇ ਬਾਹਰ ਨਿਕਲਣ ਸਬੰਧੀ ਖਬਰਾਂ ਦੇ ਬਾਰੇ ਵਿੱਚ ਪੁੱਛੇ ਜਾਣ 'ਤੇ ਟਰੰਪ ਨੇ ਕਿਹਾ ਕਿ ਮੈਂ ਬਾਹਰ ਹੋਣ ਦੀ ਗੱਲ ਨਹੀਂ ਕਰ ਰਿਹਾ ਹਾਂ, ਮੇਰਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਸਾਡੇ ਨਾਲ ਵਿਹਾਰ ਠੀਕ ਨਹੀਂ ਰਿਹਾ ਹੈ।

ਉਨ੍ਹਾਂ ਨੇ ਕਿਹਾ ਕਿ ਤੁਸੀਂ ਜੇਕਰ ਯੂਰੋਪੀ ਸੰਘ ਨੂੰ ਦੇਖੋ ਤਾਂ ਉਨ੍ਹਾਂ ਦੇ ਨਾਲ ਸਾਡਾ 150 ਅਰਬ ਡਾਲਰ ਦਾ ਘਾਟਾ ਹੋਇਆ ਹੈ। ਚੀਨ ਨੂੰ ਦੇਖੀਏ 375 ਅਰਬ ਡਾਲਰ ਦਾ ਵਪਾਰ ਘਾਟਾ ਹੋਇਆ ਹੈ। ਮੈਕਸੀਕੋ ਨੂੰ ਦੇਖੀਏ 100 ਅਰਬ ਡਾਲਰ ਦਾ ਘਾਟਾ ਹੋਇਆ ਹੈ। ਕੈਨੇਡਾ ਵੱਲ ਨੂੰ ਦੇਖੋ ਤਾਂ ਕੈਨੇਡਾ ਦਾ ਵੀ ਸਾਡੇ ਨਾਲ ਵਪਾਰ ਠੀਕ ਨਹੀਂ ਰਿਹਾ ਹੈ ਪਰ ਇਹ ਸੱਭ ਠੀਕ ਕਰ ਲਿਆ ਜਾਵੇਗਾ।