ਨਵੀਂ ਦਿੱਲੀ (ਭਾਸ਼ਾ) : ਨੌਸੇਨਾ ਨੇ ਪੰਜ ਗਸ਼ਤ ਕਰਨ ਵਾਲੇ ਜਹਾਜ਼ਾਂ ਦੀ ਸਪਲਾਈ ਨਾ ਕਰਨ ‘ਤੇ ਅਨਿਲ ਅੰਬਾਨੀ ਦੀ ਕੰਪਨੀ ਰਿਲਾਇੰਸ ਨੇਵਲ ਐਂਡ ਇੰਜੀਨੀਅਰਿੰਗ ਲਿਮੀਟਡ  (ਆਰਐਨਈਐਲ) ਦੀ ਬੈਂਕ ਗਰੰਟੀ ਜ਼ਬਤ ਕਰ ਲਈ ਹੈ। ਸੌਦਾ 2500 ਕਰੋੜ ਰੁਪਏ ਦਾ ਸੀ। ਨੇਵੀ ਮੁਖੀ ਸੁਨੀਲ ਲਾਂਬਾ ਨੇ ਸੋਮਵਾਰ ਨੂੰ ਪ੍ਰੈੱਸ ਕਾਨਫਰੰਸ ਵਿਚ ਇਹ ਜਾਣਕਾਰੀ ਦਿਤੀ। ਹਾਲਾਂਕਿ, ਉਨ੍ਹਾਂ ਨੇ ਇਹ ਨਹੀਂ ਦੱਸਿਆ ਕਿ ਬੈਂਕ ਗਰੰਟੀ ਦੀ ਰਕਮ ਕਿੰਨੀ ਸੀ।

ਬੈਂਕ ਨੇ ਕੰਪਨੀ ਦੇ ਖਿਲਾਫ਼ ਅਦਾਲਤ ਦਾ ਦਰਵਾਜਾ ਖੜਕਾਇਆ ਹੈ। ਜਹਾਜ਼ਾਂ ਦੀ ਸਪਲਾਈ ਲਈ ਨੌਸੇਨਾ ਸਰਵਜਨਿਕ ਖੇਤਰ ਦੀਆਂ ਕੰਪਨੀਆਂ ਨਾਲ ਵੀ ਗੱਲ ਕਰ ਸਕਦੀ ਹੈ। ਇਸ ਸੌਦੇ ਵਿਚ ਲਾਰਸਨ ਐਂਡ ਟੂਬਰੋ ਪਹਿਲਾਂ ਤੋਂ ਸ਼ਾਮਿਲ ਹੈ। ਨੌਸੇਨਾ ਮੁਖੀ ਲਾਂਬਾ ਨੇ ਦੱਸਿਆ ਕਿ ਨੌਸੇਨਾ ਵਿਚ ਹੋਰ 56 ਜੰਗੀ ਜਹਾਜ਼ ਸ਼ਾਮਿਲ ਕਰਨ ਦੀ ਯੋਜਨਾ ਹੈ। ਇਹਨਾਂ ਵਿਚ ਲੜਾਕੂ ਪਨਡੁੱਬੀਆਂ ਵੀ ਹੋਣਗੀਆਂ। ਇਹ ਨਿਰਮਾਣ ਅਧੀਨ 32 ਜਹਾਜ਼ਾਂ ਤੋਂ ਵੱਖ ਹੋਣਗੇ।