ਪਿਛਲੇ ਕੁੱਝ ਸਮੇਂ ਤੋਂ ਦੇਸ਼ ਵਿਚ ਮੋਦੀ ਸਰਕਾਰ ਵੱਲੋਂ ਦੇਸ਼ ਦੇ ਵਿਕਾਸ ਅਤੇ 'ਨਿਊ ਇੰਡੀਆ' ਦਾ ਕਾਫ਼ੀ ਢੰਡੋਰਾ ਪਿੱਟਿਆ ਜਾ ਰਿਹਾ ਪਰ ਸਰਕਾਰ ਦੇ ਇਨ੍ਹਾਂ ਦਾਅਵਿਆਂ ਵਿਚ ਕਿੰਨੀ ਕੁ ਸੱਚਾਈ ਹੈ, ਇਸ ਬਾਰੇ ਕੁੱਝ ਜ਼ਿਆਦਾ ਦੱਸਣ ਦੀ ਲੋੜ ਨਹੀਂ ਕਿਉਂਕਿ ਸੋਸ਼ਲ ਮੀਡੀਆ 'ਤੇ ਆਏ ਦਿਨ ਕੋਈ ਨਾ ਕੋਈ ਵੀਡੀਓ ਸਰਕਾਰ ਦੇ ਦਾਅਵਿਆਂ ਦੀ ਪੋਲ ਖੋਲ੍ਹਦੀ ਰਹਿੰਦੀ ਹੈ।
ਜੇਕਰ ਗੱਲ ਕਰੀਏ ਸਿਹਤ ਸੇਵਾਵਾਂ ਦੀ ਤਾਂ ਆਜ਼ਾਦੀ ਦੇ 71 ਸਾਲ ਬਾਅਦ ਵੀ ਬਿਨਾਂ ਇਲਾਜ ਦੇ ਮਰਨ ਵਾਲਿਆਂ ਦੀ ਗਿਣਤੀ ਲੱਖਾਂ ਵਿਚ ਹੈ। ਦਰਦ ਨਾਲ ਤੜਫਦੀ ਗਰਭਵਤੀ ਮਹਿਲਾ ਨੂੰ ਮੰਜੇ ਸਮੇਤ ਉਠਾ ਕੇ ਲਿਜਾ ਰਹੇ ਪਰਿਵਾਰਕ ਮੈਂਬਰਾਂ ਦੀ ਇਹ ਦਰਦਨਾਕ ਤਸਵੀਰ ਉਨ੍ਹਾਂ ਨੇਤਾਵਾਂ ਦਾ ਮੂੰਹ ਚਿੜਾ ਰਹੀ ਹੈ ਜੋ ਵਿਕਾਸ ਦੇ ਵੱਡੇ-ਵੱਡੇ ਦਾਅਵੇ ਕਰਦੇ ਨਹੀਂ ਥੱਕਦੇ।
ਇਹ ਤਸਵੀਰ ਉਸ ਸੂਬੇ ਛੱਤੀਸਗੜ੍ਹ ਦੀ ਹੈ, ਜਿੱਥੇ ਲੰਮਾ ਸਮਾਂ ਭਾਜਪਾ ਦਾ ਸਾਸ਼ਨ ਰਹਿ ਚੁੱਕਿਆ ਏ। ਇਸ ਤਸਵੀਰ ਤੋਂ ਤੁਸੀਂ ਛੱਤੀਗਸੜ੍ਹ ਦੇ ਵਿਕਾਸ ਦਾ ਅੰਦਾਜ਼ਾ ਖ਼ੁਦ ਹੀ ਲਗਾ ਸਕਦੇ ਹੋ ਕਿ ਇਕ ਗਰਭਵਤੀ ਔਰਤ ਨੂੰ ਹਸਪਤਾਲ ਲਿਜਾਣ ਲਈ ਐਂਬੂਲੈਂਸ ਨਹੀਂ ਹੈ, ਜੇਕਰ ਐਂਬੂਲੈਂਸ ਹੈ ਤਾਂ ਸੜਕਾਂ ਨਹੀਂ ਹਨ। ਇਸੇ ਲਈ ਪਰਿਵਾਰਕ ਮੈਂਬਰਾਂ ਨੇ ਗਰਭਵਤੀ ਮਹਿਲਾ ਨੂੰ ਕਰੀਬ 5 ਕਿਲੋਮੀਟਰ ਤਕ ਚੁੱਕ ਕੇ ਹਸਪਤਾਲ ਪਹੁੰਚਾਇਆ। ਕੀ ਇਹ ਐ ਮੋਦੀ ਸਰਕਾਰ ਦਾ ਨਵਾਂ ਭਾਰਤ?
ਦਰਅਸਲ ਛੱਤੀਸਗੜ੍ਹ ਦੇ ਜਸ਼ਪੁਰ ਜ਼ਿਲ੍ਹੇ ਦੇ ਬਗੀਚਾ ਵਿਕਾਸਖੰਡ ਅਧੀਨ ਪੈਂਦੇ ਪਿੰਡ ਜਬਲਾ ਦੀ ਰਹਿਣ ਵਾਲੀ 27 ਸਾਲਾ ਸਾਵਿੱਤਰੀ ਬਾਈ ਨੂੰ ਜਦੋਂ ਜਨਮ ਪੀੜਾਂ ਸ਼ੁਰੂ ਹੋਈਆਂ ਤਾਂ ਉਸ ਦੇ ਪਰਿਵਾਰਕ ਮੈਂਬਰ ਉਸ ਨੂੰ ਹਸਪਤਾਲ ਲਿਜਾਣ ਦੀ ਕੋਸ਼ਿਸ਼ ਕਰਨ ਲੱਗੇ ਪਰ ਪਿੰਡ ਤਕ ਕਿਸੇ ਵਾਹਨ ਦੇ ਪਹੁੰਚਣ ਯੋਗ ਸੜਕ ਹੀ ਨਹੀਂ ਸੀ।
ਜਿਸ ਕਾਰਨ ਉਨ੍ਹਾਂ ਨੇ ਸਾਵਿੱਤਰੀ ਨੂੰ ਮੰਜੇ ਸਮੇਤ ਉਠਾ ਲਿਆ ਅਤੇ 5 ਕਿਲੋਮੀਟਰ ਦੂਰ ਅੰਬਾਕਛਾਰ ਪਿੰਡ ਵਿਚ ਪਹੁੰਚਾਇਆ ਗਿਆ, ਜਿੱਥੋਂ ਉਸ ਨੂੰ ਇਕ ਨਿੱਜੀ ਵਾਹਨ ਰਾਹੀਂ ਕੁਨਕੁਰੀ ਪਿੰਡ ਵਿਚ ਬਣੇ ਹਸਪਤਾਲ ਵਿਚ ਪਹੁੰਚਾਇਆ ਗਿਆ।
ਇਸ ਘਟਨਾ ਦੀ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਗਈ, ਨਾਲ ਹੀ ਨੇਤਾਵਾਂ ਅਤੇ ਅਫ਼ਸਰਾਂ ਦੇ ਬਿਆਨ ਆਉਣੇ ਸ਼ੁਰੂ ਹੋ ਗਏ ਕਿ ਜਲਦ ਹੀ ਪਿੰਡ ਤਕ ਪਹੁੰਚਣ ਲਈ ਦੋ ਨਾਲਿਆਂ 'ਤੇ ਪੁਲ਼ਾਂ ਦਾ ਨਿਰਮਾਣ ਕਰਵਾਇਆ ਜਾਵੇਗਾ, ਸੜਕ ਬਣਵਾਈ ਜਾਵੇਗੀ ਵਗੈਰਾ ਵਗੈਰਾ, ਪਰ ਇਹ ਸਭ ਹੋਵੇਗਾ ਕਦੋਂ, ਇਸ ਬਾਰੇ ਕੁੱਝ ਨਹੀਂ ਦੱਸਿਆ ਗਿਆ।
ਪਿਛਲੇ ਲੰਬੇ ਸਮੇਂ ਤੋਂ ਇਹੀ ਕੁੱਝ ਹੁੰਦਾ ਆ ਰਿਹੈ ਕਿਉਂਕਿ ਛੱਤੀਸਗੜ੍ਹ ਵਿਚ ਇਹ ਕੋਈ ਪਹਿਲੀ ਘਟਨਾ ਨਹੀਂ ਜਦੋਂ ਕਿਸੇ ਗਰਭਵਤੀ ਮਹਿਲਾ ਨੂੰ ਇਸ ਤਰ੍ਹਾਂ ਮੰਜੇ 'ਤੇ ਉਠਾ ਕੇ ਹਸਪਤਾਲ ਪਹੁੰਚਾਇਆ ਗਿਆ ਹੋਵੇ। ਬਲਕਿ ਛੱਤੀਸਗੜ੍ਹ ਤਾਂ ਅਜਿਹੀਆਂ ਘਟਨਾਵਾਂ ਲਈ ਕਾਫ਼ੀ ਮਸ਼ਹੂਰ ਹੋ ਚੁੱਕਿਐ। ਪਿਛਲੇ ਮਹੀਨੇ 14 ਅਗਸਤ ਨੂੰ ਵੀ ਇਸੇ ਖੇਤਰ ਦੇ ਸਨਈਪੁਰ ਪਿੰਡ ਦੀ ਇਕ ਅਜਿਹੀ ਘਟਨਾ ਸਾਹਮਣੇ ਆਈ ਸੀ।
ਜਿੱਥੋਂ ਦੀ ਰਹਿਣ ਵਾਲੀ ਗਰਭਵਤੀ ਮਹਿਲਾ ਸੁਸ਼ੀਲਾ ਬਾਈ ਨੂੰ ਹਸਪਤਾਲ ਲਿਜਾਣ ਲਈ ਜਦੋਂ ਐਂਬੂਲੈਂਸ ਨਾ ਮਿਲੀ ਤਾਂ ਉਸ ਨੂੰ ਵੀ ਇਸੇ ਤਰ੍ਹਾਂ ਮੰਜੇ 'ਤੇ ਉਠਾ ਕੇ ਲਿਜਾਇਆ ਗਿਆ ਪਰ ਇਸ ਤੋਂ ਪਹਿਲਾਂ ਕਿ ਉਹ ਸੜਕ ਤਕ ਪਹੁੰਚਦੇ, ਰਸਤੇ ਵਿਚ ਹੀ ਸ਼ੁਸੀਲਾ ਨੇ ਇਕ ਬੱਚੇ ਨੂੰ ਜਨਮ ਦੇ ਦਿੱਤਾ ਸੀ, ਜਿਸ ਤੋਂ ਬਾਅਦ ਉਸ ਦੀ ਹਾਲਤ ਕਾਫ਼ੀ ਖ਼ਰਾਬ ਹੋ ਗਈ ਸੀ। ਬੜੀ ਮੁਸ਼ਕਲ ਨਾਲ ਉਸ ਨੂੰ ਹਸਪਤਾਲ ਤਕ ਪਹੁੰਚਾਇਆ ਗਿਆ ਸੀ।
ਸਾਲ ਦੇ ਸ਼ੁਰੂ ਯਾਨੀ ਜਨਵਰੀ ਮਹੀਨੇ ਵਿਚ ਵੀ ਛੱਤੀਸਗੜ੍ਹ ਦੇ ਬੀਜਾਪੁਰ ਇਲਾਕੇ ਵਿਚ ਵਾਪਰੀ ਇਕ ਘਟਨਾ ਵੀ ਸਰਕਾਰ ਦੇ ਪ੍ਰਬੰਧਾਂ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਸੀ, ਜਦੋਂ ਕੇਂਦਰੀ ਰਿਜ਼ਰਵ ਪੁਲਿਸ ਬਲ ਯਾਨੀ ਸੀਆਰਪੀਐਫ ਦੇ ਜਵਾਨਾਂ ਨੇ ਦਰਦ ਨਾਲ ਤੜਫਦੀ ਇਕ ਔਰਤ ਨੂੰ ਇਸੇ ਤਰ੍ਹਾਂ ਮੰਜੇ 'ਤੇ ਰੱਖ ਕੇ 6 ਕਿਲੋਮੀਟਰ ਦੂਰ ਤਕ ਚੱਲ ਕੇ ਹਸਪਤਾਲ ਤਕ ਪਹੁੰਚਾਇਆ ਸੀ।
ਇਸੇ ਤਰ੍ਹਾਂ ਇਕ ਗਰਭਵਤੀ ਔਰਤ ਨੂੰ ਹਸਪਤਾਲ ਲਿਜਾਣ ਲਈ ਪਿੰਡ ਵਾਸੀਆਂ ਨੇ ਇਕ ਵੱਡੇ ਬਰਤਨ ਵਿਚ ਰੱਖ ਕੇ ਨਦੀ ਪਾਰ ਕਰਵਾਈ ਪਰ ਹਸਪਤਾਲ ਪਹੁੰਚਣ 'ਤੇ ਉਸ ਦਾ ਬੱਚਾ ਪੇਟ ਵਿਚ ਹੀ ਦਮ ਤੋੜ ਗਿਆ। ਛੱਤੀਸਗੜ੍ਹ ਵਿਚ ਅਜਿਹੀਆਂ ਦਰਜਨਾਂ ਘਟਨਾਵਾਂ ਸਾਹਮਣੇ ਆ ਚੁੱਕੀਆਂ ਨੇ ਪਰ ਸਰਕਾਰਾਂ ਅਜੇ ਤਕ ਸੜਕਾਂ ਅਤੇ ਪੁਲ਼ ਦੀ ਪਲਾਨਿੰਗ ਕਰਨ ਵਿਚ ਹੀ ਲੱਗੀਆਂ ਹੋਈਆਂ ਨੇ।
ਦੱਸ ਦਈਏ ਕਿ ਛੱਤੀਸਗੜ੍ਹ ਵਿਚ ਲਗਾਤਾਰ ਕਈ ਟਰਮਾਂ ਤਕ ਭਾਜਪਾ ਦੀ ਸਰਕਾਰ ਰਹਿ ਚੁੱਕੀ ਐ ਜਦਕਿ ਇਸ ਵਾਰ ਉਥੇ ਕਾਂਗਰਸ ਦਾ ਰਾਜ ਐ ਪਰ ਅਫ਼ਸੋਸ ਨਾ ਤਾਂ ਭਾਜਪਾ ਸਰਕਾਰ ਨੇ ਪਿੰਡਾਂ ਦੇ ਇਨ੍ਹਾਂ ਲੋਕਾਂ ਦੀਆਂ ਸਹੂਲਤਾਂ ਵੱਲ ਕੋਈ ਧਿਆਨ ਦਿੱਤਾ ਅਤੇ ਨਾ ਹੀ ਕਾਂਗਰਸ ਨੇ।
ਇਸ ਸਭ ਦੇ ਚਲਦਿਆਂ ਹੁਣ ਲੋਕਾਂ ਵੱਲੋਂ ਪ੍ਰਧਾਨ ਮੰਤਰੀ ਮੋਦੀ ਨੂੰ ਇਹੀ ਸਵਾਲ ਕੀਤੇ ਜਾ ਰਹੇ ਨੇ ਕਿ ਕੀ ਇਹੀ ਹੈ ਉਨ੍ਹਾਂ ਦਾ 'ਆਤਮ ਨਿਰਭਰ ਭਾਰਤ'? ਕੀ ਇਹ ਐ ਮੋਦੀ ਦਾ ਨਿਊ ਇੰਡੀਆ?