Photo

ਨਵੀਂ ਦਿੱਲੀ: ਕੋਰੋਨਾ ਯੋਧਿਆਂ ਦੇ ਸਨਮਾਨ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੋਂ ਲੈ ਕੇ ਪੂਰਾ ਦੇਸ਼ ਨਤਮਸਤਕ ਹੈ। ਦੇਸ਼ ਵਾਸੀ ਵੱਖਰੇ ਅੰਦਾਜ਼ ਵਿਚ ਇਹਨਾਂ ਯੋਧਿਆਂ ਦਾ ਹੌਂਸਲਾ ਵਧਾ ਰਹੇ ਹਨ। ਭਾਰਤੀ ਫੌਜ ਵੱਲੋਂ ਕੋਰੋਨਾ ਯੋਧਿਆਂ ਲਈ ਫੁੱਲਾਂ ਦੀ ਵਰਖਾ ਕੀਤੀ ਸੀ। 

ਇਸ ਦੇ ਨਾਲ ਹੀ ਹੈਦਰਾਬਾਦ ਵਿਚ ਇਕ ਡਾਕਟਰ ਦਾ ਪੂਰਾ ਪਰਿਵਾਰ ਇਸ ਜੰਗ ਦੌਰਾਨ ਹਸਪਤਾਲ ਵਿਚ ਸੇਵਾ ਨਿਭਾਅ ਰਿਹਾ ਹੈ। ਜਦੋਂ ਉਹਨਾਂ ਦੇ ਗੁਆਂਢੀਆਂ ਨੇ ਉਹਨਾਂ ਦਾ ਸਨਮਾਨ ਕੀਤਾ ਤਾਂ ਇਹ ਪਰਿਵਾਰ ਭਾਵੁਕ ਹੋ ਗਿਆ।  ਦਰਅਸਲ ਇਸ ਪਰਿਵਾਰ ਦੇ ਮੁਖੀ ਦਾ ਨਾਂਅ ਡਾਕਟਰ ਮਹਿਬੂਬ ਖ਼ਾਨ ਹੈ।

ਮਹਿਬੂਬ ਖ਼ਾਨ ਹੈਦਰਾਬਾਦ ਦੇ ਚੈਸਟ ਹਸਪਤਾਲ ਵਿਚ ਮੈਡੀਕਲ ਸੁਪਰਡੈਂਟ ਹਨ। ਕੋਰੋਨਾ ਸੰਕਟ ਦੌਰਾਨ ਇਸ ਹਸਪਤਲ ਨੂੰ ਕੋਵਿਡ ਹਸਪਤਾਲ ਐਲਾਨਿਆ ਗਿਆ ਹੈ, ਇੱਥੇ ਕੋਰੋਨਾ ਮਰੀਜ਼ਾਂ ਦਾ ਇਲਾਜ ਚੱਲ ਰਿਹਾ ਹੈ। ਡਾਕਟਰ ਮਹਿਬੂਬ ਖ਼ਾਨ ਇਸ ਮੁਸ਼ਕਿਲ ਸਮੇਂ ਵਿਚ ਲਗਾਤਾਰ ਅਪਣੀਆਂ ਸੇਵਾਵਾਂ ਦੇ ਰਹੇ ਹਨ ਅਤੇ ਕੋਰੋਨਾ ਨੂੰ ਹਰਾਉਣ ਲਈ ਹਰ ਸੰਭਵ ਕੋਸ਼ਿਸ਼ ਕਰ ਰਹੇ ਹਨ।

ਇਸ ਲੜਾਈ ਵਿਚ ਮਹਿਬੂਬ ਇਕੱਲੇ ਨਹੀਂ ਹਨ ਬਲਕਿ ਇਸ ਦੌਰਾਨ ਉਹਨਾਂ ਦਾ ਪੂਰਾ ਪਰਿਵਾਰ ਉਹਨਾਂ ਨਾਲ ਹੈ। ਮਹਿਬੂਬ ਖ਼ਾਨ ਦੀ ਪਤਨੀ ਸ਼ਾਹੀਨਾ ਖ਼ਾਨ ਅਤੇ ਧੀ ਰਸ਼ਿਕਾ ਖ਼ਾਨ ਵੀ ਡਾਕਟਰ ਹਨ। 48 ਸਾਲ ਦੇ ਡਾਕਟਰ ਸ਼ਾਹੀਨਾ ਖ਼ਾਨ 25 ਸਾਲਾਂ ਤੋਂ ਹੈਦਰਾਬਾਦ ਦੇ ਗਾਂਧੀ ਹਸਪਤਾਲ ਵਿਚ ਸੇਵਾਵਾਂ ਦੇ ਰਹੇ ਹਨ।

ਗਾਂਧੀ ਹਸਪਤਾਲ ਨੂੰ ਵੀ ਕੋਵਿਡ19 ਹਸਪਤਾਲ ਬਣਾਇਆ ਗਿਆ ਹੈ। ਮਹਿਬੂਬ ਖ਼ਾਨ ਅਤੇ ਉਹਨਾ ਦੀ ਪਤਨੀ ਲੰਬੇ ਸਮੇਂ ਤੋਂ ਇਸ ਪੇਸ਼ੇ ਵਿਚ ਹਨ ਪਰ ਹਾਲ ਹੀ ਵਿਚ ਐਮਬੀਬੀਐਸ ਦੀ ਪੜ੍ਹਾਈ ਕਰਨ ਵਾਲੀ ਉਹਨਾਂ ਦੀ 22 ਸਾਲ ਦੀ ਧੀ ਵੀ ਇਸ ਜੰਗ ਵਿਚ ਅਪਣੀ ਭੂਮਿਕਾ ਨਿਭਾਅ ਰਹੀ ਹੈ।

ਡਾਕਟਰ ਮਹਿਬੂਬ ਖ਼ਾਨ ਦੇ ਪਰਿਵਾਰ ਦੇ ਇਸ ਯੋਗਦਾਨ ਲਈ ਉਹਨਾਂ ਦੇ ਗੁਆਂਢੀਆਂ ਨੇ ਸਨਮਾਨ ਵਜੋਂ ਉਹਨਾਂ ਲਈ ਫੁੱਲ ਬਰਸਾਏ ਅਤੇ ਉਹਨਾਂ ਨੂੰ ਸਲਾਮ ਕੀਤਾ। ਇਹ ਦੇਖ ਕੇ ਪੂਰਾ ਪਰਿਵਾਰ ਭਾਵੁਕ ਹੋ ਗਿਆ। ਮਹਿਬੂਬ ਖ਼ਾਨ ਦਾ ਲੜਕਾ ਵੀ ਮੈਡੀਕਲ ਦੀ ਤਿਆਰੀ ਕਰ ਰਿਹਾ ਹੈ। ਯਾਨੀ ਪੂਰਾ ਪਰਿਵਾਰ ਮੈਡੀਕਲ ਸੇਵਾ ਨਾਲ ਜੁੜਿਆ ਹੋਇਆ ਹੈ।