ਸਰਕਾਰੀ ਫੰਡ ਨਾ ਮਿਲਿਆ ਤਾਂ ਬੰਦ ਹੋ ਜਾਵੇਗੀ Vodafone-Idea: ਬਿਰਲਾ
ਦਿੱਗਜ਼ ਉਦਯੋਗਪਤੀ ਕੁਮਾਰ ਮੰਗਲਮ ਬਿਰਲਾ ਨੇ ਸ਼ੁੱਕਰਵਾਰ ਨੂੰ ਟੈਲੀਕਾਮ ਕੰਪਨੀ ਵੋਡਾਫੋਨ-ਆਈਡੀਆ ਨੂੰ ਲੈ ਕੇ ਵੱਡਾ ਬਿਆਨ ਦਿੱਤਾ ਹੈ।
ਨਵੀਂ ਦਿੱਲੀ: ਦਿੱਗਜ਼ ਉਦਯੋਗਪਤੀ ਕੁਮਾਰ ਮੰਗਲਮ ਬਿਰਲਾ ਨੇ ਸ਼ੁੱਕਰਵਾਰ ਨੂੰ ਟੈਲੀਕਾਮ ਕੰਪਨੀ ਵੋਡਾਫੋਨ-ਆਈਡੀਆ ਨੂੰ ਲੈ ਕੇ ਵੱਡਾ ਬਿਆਨ ਦਿੱਤਾ ਹੈ। ਮੰਗਲਮ ਬਿਰਲਾ ਨੇ ਕਿਹਾ ਕਿ ਜੇਕਰ ਲੋੜ ਅਨੁਸਾਰ ਸਰਕਾਰੀ ਸਹਾਇਤਾ ਨਹੀਂ ਮਿਲੀ ਤਾਂ ਉਹ ਵੋਡਾਫੋਨ-ਆਈਡੀਆ ਨੂੰ ਬੰਦ ਕਰ ਦੇਣਗੇ। ਇਕ ਸਮਾਰੋਹ ਦੌਰਾਨ ਬਿਰਲਾ ਨੇ ਸੰਕੇਤ ਦਿੱਤਾ ਹੈ ਕਿ ਹੁਣ ਬਿਰਲਾ ਗਰੁੱਪ ਵੋਡਾਫੋਨ-ਆਈਡੀਆ ਵਿਚ ਕੋਈ ਨਿਵੇਸ਼ ਨਹੀਂ ਕਰੇਗਾ।
ਉਹਨਾਂ ਨੇ ਕਿਹਾ ਕਿ ਚੰਗੇ ਰੁਪਏ ਨੂੰ ਬੁਰੇ ਰੁਪਏ ਵਿਚ ਨਿਵੇਸ਼ ਦਾ ਕੋਈ ਮਤਲਬ ਨਹੀਂ ਹੈ। ਸਰਕਾਰੀ ਰਾਹਤ ਨਾ ਮਿਲਣ ‘ਤੇ ਕੰਪਨੀ ਦੇ ਕਦਮ ਦੇ ਸਵਾਲ ‘ਤੇ ਬਿਰਲਾ ਨੇ ਕਿਹਾ ਕਿ ਅਸੀਂ ਅਪਣੀ ਦੁਕਾਨ ਬੰਦ ਕਰ ਦੇਵਾਂਗੇ। ਉਹਨਾਂ ਨੇ ਕਿਹਾ ਕਿ ਰਾਹਤ ਨਾ ਮਿਲਣ ਦੀ ਸਥਿਤੀ ਵਿਚ ਕੰਪਨੀ ਦਿਵਾਲੀਆਂ ਪ੍ਰਕਿਰਿਆ ਦਾ ਰਸਤਾ ਅਪਣਾਵੇਗੀ।
ਸੁਪਰੀਮ ਕੋਰਟ ਵੱਲੋਂ ਏਜੀਆਰ ‘ਤੇ ਦਿੱਤੇ ਗਏ ਫੈਸਲੇ ਦਾ ਵੋਡਾਫੋਨ-ਆਈਡੀਆ ‘ਤੇ ਸਭ ਤੋਂ ਜ਼ਿਆਦਾ ਅਸਰ ਪਿਆ ਹੈ। ਇਸ ਦੇ ਕਾਰਨ ਕੰਪਨੀ ਨੇ ਦੂਜੀ ਤਿਮਾਹੀ ਵਿਚ 50 ਹਜ਼ਾਰ ਕਰੋੜ ਰੁਪਏ ਤੋਂ ਜ਼ਿਆਦਾ ਘਾਟਾ ਦੱਸਿਆ ਹੈ। ਰਿਲਾਇੰਸ ਜੀਓ ਦੀ ਲਾਂਚਿੰਗ ਤੋਂ ਬਾਅਦ ਟੈਲੀਕਾਮ ਸੈਕਟਰ ਵਿਚ ਬਣੇ ਰਹਿਣ ਲਈ ਕੁਮਾਰ ਮੰਗਲਮ ਬਿਰਲਾ ਨੇ ਆਪਣੀ ਆਈਡੀਆ ਦਾ ਵੋਡਾਫੋਨ ਨਾਲ ਰਲੇਵਾਂ ਕਰ ਦਿੱਤਾ ਸੀ ਅਤੇ ਨਵੀਂ ਕੰਪਨੀ ਵੋਡਾਫੋਨ ਆਈਡੀਆ ਹੋਂਦ ਵਿਚ ਆਈ ਸੀ।
ਪਿਛਲੇ ਸਾਲ ਹੋਏ ਰਲੇਵੇਂ ਦੇ ਸਮਝੌਤੇ ਅਨੁਸਾਰ, ਵੋਡਾਫੋਨ-ਆਈਡੀਆ ਕੰਪਨੀ ਵਿਚ 45.1 ਫੀਸਦੀ ਹਿੱਸੇਦਾਰੀ ਵੋਡਾਫੋਨ ਕੋਲ ਹੈ ਜਦਕਿ 26 ਫੀਸਦੀ ਹਿੱਸੇਦਾਰੀ ਅਦਿੱਤਿਆ ਬਿਰਲਾ ਗਰੁੱਪ ਕੋਲ ਹੈ। ਹੋਰ ਸ਼ੇਅਰ ਹੋਲਡਰਸ ਦੇ ਕੋਲ 28.9 ਫੀਸਦੀ ਹਿੱਸੇਦਾਰੀ ਹੈ। ਵੋਡਾਫੋਨ-ਆਈਡੀਆ ਦਾ ਸੰਚਾਲਨ ਦੋਵੇਂ ਕੰਪਨੀਆਂ ਸੰਯੁਕਤ ਤੌਰ ‘ਤੇ ਕਰਦੀਆਂ ਹਨ। ਵੋਡਾਫੋਨ ਨੇ ਸਰਕਾਰ ਕੋਲੋਂ ਇਕ ਰਾਹਤ ਪੈਕੇਜ ਦੀ ਮੰਗ ਕੀਤੀ ਸੀ। ਵੋਡਾਫੋਨ ਦੁਨੀਆਂ ਦੀ ਦੂਜੀ ਵੱਡੀ ਮੋਬਾਈਲ ਅਪਰੇਟਰ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।