File Photo

ਸ਼੍ਰੀਨਗਰ(ਫਿਰਦੌਸ਼ ਕਾਦਰੀ)- ਜੰਮੂ-ਕਸ਼ਮੀਰ ਦੀ ਪੰਡਤ ਕਾਲੋਨੀ ਸ਼ੀਰੀ ਬਾਰਾਮੂਲਾ ਦੇ ਨੇੜੇ ਬਰਫ਼ਬਾਰੀ ਤੋਂ ਬਾਅਦ ਭਾਰਤੀ ਫ਼ੌਜ ਕੁੱਝ ਲੋਕਾਂ ਲਈ ਉਸ ਸਮੇਂ ਮਸੀਹਾ ਬਣ ਕੇ ਪੁੱਜੀ ਜਦੋਂ ਫ਼ੌਜ ਨੇ ਬਰਫ਼ਬਾਰੀ ਮਗਰੋਂ ਹੋਈ ਫਿਸਲਣ ਕਾਰਨ ਖੱਡ ਵਿਚ ਡਿੱਗੇ ਦੋ ਵਾਹਨਾਂ ਅਤੇ ਯਾਤਰੀਆਂ ਨੂੰ ਬਾਹਰ ਕੱਢ ਕੇ ਹਸਪਤਾਲ ਪਹੁੰਚਾਇਆ। 

ਦਰਅਸਲ ਬਰਫ਼ਬਾਰੀ ਅਤੇ ਬਾਰਿਸ਼ ਤੋਂ ਬਾਅਦ ਰੋਡ 'ਤੇ ਕਾਫ਼ੀ ਜ਼ਿਆਦਾ ਚਿੱਕੜ ਹੋ ਗਿਆ ਸੀ, ਜਿਸ ਕਾਰਨ ਪੰਡਤ ਕਾਲੋਨੀ ਸ਼ੀਰੀ ਬਾਰਾਮੂਲਾ ਨੇੜੇ ਕੁੱਝ ਵਾਹਨ ਫਿਸਲ ਕੇ ਖੱਡ ਵਿਚ ਡਿੱਗ ਗਏ, ਜਿਸ ਦੌਰਾਨ ਯਾਤਰੀਆਂ ਨੂੰ ਸੱਟਾਂ ਵੀ ਵੱਜੀਆਂ ਪਰ ਐਨ ਮੌਕੇ 'ਤੇ ਪੁੱਜੀ ਭਾਰਤੀ ਫ਼ੌਜ ਦੇ 46 ਆਰਆਰ ਵਿੰਗ ਦੇ ਫ਼ੌਜੀਆਂ ਨੇ ਇਨ੍ਹਾਂ ਲੋਕਾਂ ਦੀ ਜਾਨ ਬਚਾਈ ਅਤੇ ਇਨ੍ਹਾਂ ਦੇ ਵਾਹਨਾਂ ਨੂੰ ਵੀ ਬਾਹਰ ਕੱਢਿਆ। 

ਇਸ ਮੌਕੇ ਹਾਦਸੇ ਦਾ ਸ਼ਿਕਾਰ ਹੋਏ ਲੋਕਾਂ ਨੇ ਫ਼ੌਜ ਵੱਲੋਂ ਕੀਤੀ ਗਈ ਮਦਦ ਦੀ ਤਾਰੀਫ਼ ਕਰਦਿਆਂ ਆਖਿਆ ਕਿ ਉਹ ਫ਼ੌਜ ਦਾ ਬਹੁਤ ਧੰਨਵਾਦ ਕਰਦੇ ਹਨ, ਜਿਸ ਨੇ ਉਨ੍ਹਾਂ ਦੇ ਸਾਥੀਆਂ ਦੀ ਜਾਨ ਬਚਾਈ ਅਤੇ ਖੱਡ ਵਿਚ ਡਿੱਗੇ ਉਨ੍ਹਾਂ ਦੇ ਵਾਹਨਾਂ ਨੂੰ ਬਾਹਰ ਕੱਢਿਆ। 

ਦੱਸ ਦਈਏ ਕਿ ਜੰਮੂ-ਕਸ਼ਮੀਰ ਵਿਚ ਬੀਤੇ ਦਿਨੀਂ ਕਾਫ਼ੀ ਜ਼ਿਆਦਾ ਬਰਫ਼ਬਾਰੀ ਹੋਈ, ਜਿਸ ਤੋਂ ਮਗਰੋਂ ਕਈ ਖੇਤਰਾਂ ਵਿਚ ਹਾਦਸੇ ਹੋਣ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਪਰ ਬਾਰਾਮੂਲਾ ਨੇੜੇ ਵਾਪਰੇ ਹਾਦਸੇ ਕਾਰਨ ਫਸੇ ਲੋਕਾਂ ਦੀ ਫ਼ੌਜ ਨੇ ਮਦਦ ਕੀਤੀ।