PM ਸੁਰੱਖਿਆ ਮਾਮਲਾ: ਜੇ ਅੱਧਾ ਘੰਟਾ ਲੇਟ ਵੀ ਹੋ ਜਾਂਦੇ ਤਾਂ ਕਿਹੜਾ ਬੰਬ ਫਟਣਾ ਸੀ? - ਹਰੀਸ਼ ਰਾਵਤ
ਪੰਜਾਬ ਵਿਚ ਪ੍ਰਧਾਨ ਮੰਤਰੀ ਦੇ ਕਾਫਲੇ ਦੀ ਸੁਰੱਖਿਆ ਵਿਚ ਕੁਤਾਹੀ ਨੂੰ ਲੈ ਕੇ ਸਿਆਸਤ ਤੇਜ਼ ਹੋ ਗਈ ਹੈ।
ਦੇਹਰਾਦੂਨ: ਪੰਜਾਬ ਵਿਚ ਪ੍ਰਧਾਨ ਮੰਤਰੀ ਦੇ ਕਾਫਲੇ ਦੀ ਸੁਰੱਖਿਆ ਵਿਚ ਕੁਤਾਹੀ ਨੂੰ ਲੈ ਕੇ ਸਿਆਸਤ ਤੇਜ਼ ਹੋ ਗਈ ਹੈ। ਭਾਜਪਾ ਕਾਂਗਰਸ ਨੂੰ ਘੇਰਨ 'ਚ ਕੋਈ ਕਸਰ ਨਹੀਂ ਛੱਡ ਰਹੀ, ਇਸ ਲਈ ਹੁਣ ਕਾਂਗਰਸ ਨੇ ਵੀ ਜਵਾਬੀ ਕਾਰਵਾਈ ਕਰਨ ਦਾ ਮਨ ਬਣਾ ਲਿਆ ਹੈ। ਉੱਤਰਾਖੰਡ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਕਾਂਗਰਸ ਆਗੂ ਹਰੀਸ਼ ਰਾਵਤ ਨੇ ਇਸ ਪੂਰੀ ਘਟਨਾ 'ਤੇ ਅਪਣਾ ਬਿਆਨ ਜਾਰੀ ਕੀਤਾ ਹੈ। ਹਰੀਸ਼ ਰਾਵਤ ਨੇ ਕਿਹਾ, “ਜੇ ਅੱਧੇ ਘੰਟੇ ਦੀ ਦੇਰੀ ਵੀ ਹੋ ਜਾਂਦੀ ਤਾਂ ਕਿਹੜਾ ਬੰਬ ਫਟ ਜਾਣਾ ਸੀ?”
Harish Rawat
ਹਰੀਸ਼ ਰਾਵਤ ਨੇ ਕਿਹਾ ਕਿ ਕਾਂਗਰਸ ਨੂੰ ਦੁੱਖ ਹੈ ਕਿ ਪ੍ਰਧਾਨ ਮੰਤਰੀ ਦੀ ਸੁਰੱਖਿਆ 'ਚ ਕੁਤਾਹੀ ਹੋਈ ਪਰ ਪ੍ਰਧਾਨ ਮੰਤਰੀ ਦੀ ਸੁਰੱਖਿਆ ਦੀ ਜ਼ਿੰਮੇਵਾਰੀ ਕੇਂਦਰ ਦੀ ਹੈ। ਸਵਾਲ ਇਹ ਹੈ ਕਿ ਕੇਂਦਰ ਪੀਐਮ ਦੀ ਸੁਰੱਖਿਆ ਕਿਉਂ ਨਹੀਂ ਕਰ ਸਕਿਆ? ਉਹ ਵੀ ਉਦੋਂ ਜਦੋਂ ਸੂਬੇ ਦਾ ਡੀਜੀਪੀ ਵੀ ਬਿਨ੍ਹਾਂ ਚੈਕਿੰਗ ਤੋਂ ਪ੍ਰਧਾਨ ਮੰਤੀਰ ਤੱਕ ਨਹੀਂ ਪਹੁੰਚ ਸਕਦਾ। ਕਿਸਾਨ ਪਹਿਲਾਂ ਹੀ ਕਹਿ ਚੁੱਕੇ ਸਨ ਕਿ ਅਸੀਂ ਕਾਫਲੇ ਨੂੰ ਰੋਕਾਂਗੇ ਫਿਰ ਕੇਂਦਰੀ ਏਜੰਸੀਆਂ ਅਲਰਟ ਕਿਉਂ ਨਹੀਂ ਹੋਈਆਂ?
PM Modi
ਦੱਸ ਦੇਈਏ ਕਿ ਪ੍ਰਧਾਨ ਮੰਤਰੀ ਦੀ ਸੁਰੱਖਿਆ ਵਿਚ ਕੁਤਾਹੀ ਲਈ ਪੰਜਾਬ ਦੀ ਕਾਂਗਰਸ ਸਰਕਾਰ ਨੂੰ ਜ਼ਿੰਮੇਵਾਰ ਠਹਿਰਾਉਂਦੇ ਹੋਏ ਭਾਜਪਾ ਦੇਸ਼ ਭਰ ਵਿਚ ਵਿਚ ਥਾਂ-ਥਾਂ ਪ੍ਰਦਰਸ਼ਨ ਕਰ ਰਹੀ ਹੈ। ਉਧਰ ਬੀਤੇ ਦਿਨ ਉੱਤਰਾਖੰਡ ਵਿਚ ਵੀ ਵੱਡੀ ਘਟਨਾ ਸਾਹਮਣੇ ਆਈ। ਦਰਅਸਲ ਹਰੀਸ਼ ਰਾਵਤ ਕਾਸ਼ੀਪੁਰ ਵਿਚ ਕਾਂਗਰਸ ਮੈਂਬਰਸ਼ਿਪ ਪ੍ਰੋਗਰਾਮ ਵਿਚ ਸ਼ਾਮਲ ਹੋ ਰਹੇ ਸਨ, ਜਿਵੇਂ ਹੀ ਰਾਵਤ ਸਟੇਜ ਤੋਂ ਉਤਰੇ ਤਾਂ ਇੱਕ ਸਿਰਫਿਰਾ ਵਿਅਕਤੀ ਚਾਕੂ ਲੈ ਕੇ ਸਟੇਜ ਉੱਤੇ ਚੜ੍ਹ ਗਿਆ। ਇਸ ਵਿਅਕਤੀ ਨੂੰ ਕਾਬੂ ਕਰਕੇ ਪੁਲਿਸ ਹਵਾਲੇ ਕਰ ਦਿੱਤਾ ਗਿਆ ਹੈ।