ਖਾਣੇ ਵਿਚ ਸਾਈਨਾਇਡ ਦੇ ਕੇ ਨੂੰਹ ਨੇ 14 ਸਾਲਾਂ ‘ਚ ਪਤੀ ਸਮੇਤ ਮਾਰੇ ਪਰਿਵਾਰ ਦੇ 6 ਜੀਅ!
ਕੇਰਲ ਵਿਚ ਇਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਮਹਣੇ ਆਇਆ ਹੈ।
ਕੇਰਲ: ਕੇਰਲ ਵਿਚ ਇਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਮਹਣੇ ਆਇਆ ਹੈ। ਕੋਜ਼ੀਕੋਡ ਵਿਚ ਇਕ ਔਰਤ ‘ਤੇ ਅਪਣੇ ਸੱਸ, ਸਹੁਰਾ, ਪਤੀ ਅਤੇ ਤਿੰਨ ਹੋਰ ਰਿਸ਼ਤੇਦਾਰਾਂ ਦਾ ਕਤਲ ਕਰਨ ਦਾ ਇਲਜ਼ਾਮ ਲੱਗਿਆ ਹੈ। ਇਲਜ਼ਾਮ ਹੈ ਕਿ ਔਰਤ ਨੇ ਇਸ ਲਈ ਸਾਈਨਾਇਡ ਦੀ ਵਰਤੋਂ ਕੀਤੀ ਅਤੇ 14 ਸਾਲਾਂ ਵਿਚ ਪੂਰੇ ਪਰਿਵਾਰ ਨੂੰ ਮੌਤ ਦੀ ਘਾਟ ਉਤਾਰ ਦਿੱਤਾ।
ਹੁਣ ਤੱਕ ਕੋਜ਼ੀਕੋਡ ਪੁਲਿਸ ਨੇ ਜੌਲੀ ਥਾਮਸ ਅਤੇ ਉਸ ਦੇ ਦੋਸਤ ਐਮ. ਮੈਥਿਊ ਅਤੇ ਇਕ ਸੁਨਿਆਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਜੋ ਹੱਤਿਆਵਾਂ ਲਈ ਸਾਈਨਾਇਡ ਦਾ ਇੰਤਜ਼ਾਮ ਕਰਦਾ ਸੀ। ਜਾਂਚ ਤੋਂ ਪਤਾ ਚੱਲਿਆ ਹੈ ਕਿ ਜੌਲੀ ਪੀੜਤਾਂ ਨੂੰ ਖਾਣੇ ਵਿਚ ਸਾਈਨਾਇਡ ਮਿਲਾ ਕੇ ਦਿੰਦੀ ਸੀ। ਸਾਈਨਾਇਡ ਕਾਰਨ ਅਜਿਹੀ ਪਹਿਲੀ ਕਥਿਤ ਮੌਤ 2002 ਵਿਚ ਉਸ ਦੀ ਸੱਸ ਦੀ ਹੋਈ ਸੀ।
ਥਾਮਸ ਪਰਿਵਾਰ ਵਿਚ ਹੱਤਿਆਵਾਂ ਦਾ ਦੌਰ ਇੱਥੇ ਹੀ ਨਹੀਂ ਰੁਕਿਆ। 2014 ਵਿਚ ਅਜਿਹੇ ਹਲਾਤਾਂ ਵਿਚ ਰਾਏ ਥਾਮਸ ਦੇ ਮਾਮੇ ਦੀ ਮੌਤ ਹੋ ਗਈ। ਦੋ ਸਾਲ ਬਾਅਦ ਇਕ ਹੋਰ ਕਰੀਬੀ ਰਿਸ਼ਤੇਦਾਰ ਅਤੇ ਉਸ ਦੇ ਇਕ ਬੱਚੇ ਦੀ ਮੌਤ ਹੋ ਗਈ। ਪੀੜਤ ਪਰਿਵਾਰ ਦੇ ਵਿਅਕਤੀ ਵੱਲੋਂ ਦਰਜ ਕਰਵਾਈ ਗਈ ਸ਼ਿਕਾਇਤ ਤੋਂ ਬਾਅਦ ਪੁਲਿਸ ਨੇ ਇਸ ਮਾਮਲੇ ਵਿਚ ਜਾਂਚ ਸ਼ੁਰੂ ਕੀਤੀ। ਪੁਲਿਸ ਜਾਂਚ ਤੋਂ ਪਤਾ ਚੱਲਿਆ ਕਿ ਸਾਰੇ ਪੀੜਤਾਂ ਦੀ ਮੌਤ ਖਾਣਾ ਖਾਣ ਤੋਂ ਬਾਅਦ ਹੋਈ। ਕੋਜ਼ੀਕੋਡ ਗ੍ਰਾਮੀਣ ਐਸਪੀ ਨੇ ਕਿਹਾ ਕਿ ਉਹਨਾਂ ਨੇ ਜੌਲੀ ਦੀ ਮੌਜੂਦਗੀ ਹਰ ਉਸ ਥਾਂ ਪਾਈ, ਜਿੱਥੇ ਮੌਤ ਹੋਈ ਸੀ। ਉਸ ਨੇ ਅਪਣੇ ਪੱਖ ਵਿਚ ਜਾਇਦਾਦ ਹਾਸਲ ਕਰਨ ਲਈ ਨਕਲੀ ਦਸਤਾਵੇਜ਼ ਬਣਾਏ।
ਸੂਤਰਾਂ ਅਨੁਸਾਲ ਲੰਬੀ ਪੁੱਛ-ਗਿੱਛ ਬਾਅਦ ਜੌਲੀ ਨੇ ਆਖਿਰਕਾਰ ਅਪਣਾ ਅਪਰਾਧ ਕਬੂਲ ਕਰ ਲਿਆ। ਜੌਲੀ ਸ਼ਾਜੂ ਨਾਲ ਵਿਆਹ ਕਰਨਾ ਚਾਹੁੰਦੀ ਸੀ ਅਤੇ ਉਸ ਦੀਆਂ ਨਜ਼ਰਾਂ ਥਾਮਸ ਪਰਿਵਾਰ ਦੀ ਜਾਇਦਾਦ ‘ਤੇ ਸਨ। ਕੇਰਲ ਪੁਲਿਸ ਦੇ ਡੀਜੀਪੀ ਲੋਕਨਾਥ ਬੇਹਰਾ ਨੇ ਸ਼ੱਕ ਜ਼ਾਹਿਰ ਕਰਦੇ ਹੋਏ ਕਿਹਾ ਕਿ ਹੋ ਸਕਦਾ ਹੈ ਕਿ ਜੌਲੀ ਵੱਲੋਂ ਥਾਮਸ ਪਰਿਵਾਰ ਤੋਂ ਇਲਾਵਾ ਹੋਰ ਲੋਕਾਂ ਦੀ ਵੀ ਹੱਤਿਆ ਕੀਤੀ ਗਈ ਹੋਵੇ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਹਨ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।