Man wants gold loan against cows after Dilip Ghosh's 'gold in milk' theory

ਕੋਲਕਾਤਾ: ਪੱਛਮੀ ਬੰਗਾਲ ਦੇ ਹੁਗਲੀ ਜ਼ਿਲ੍ਹੇ ਵਿਚ ਇਕ ਅਜੀਬੋ ਗਰੀਬ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਭਾਜਪਾ ਆਗੂ ਦਲੀਪ ਘੋਸ਼ ਦੇ ਇਕ ਬਿਆਨ ਤੋਂ ਬਾਅਦ ਇਕ ਵਿਅਕਤੀ ਅਪਣੀਆਂ ਦੋ ਗਾਵਾਂ ਨੂੰ ਲੈ ਕੇ ਮਨਾਪੁਰਮ ਫਾਈਨਾਂਸ ਲਿਮਟਡ ਦੀ ਬ੍ਰਾਂਚ ਵਿਚ ਗੋਲਡ ਲੋਨ ਲੈਣ ਪਹੁੰਚ ਗਿਆ। ਵਿਅਕਤੀ ਨੇ ਕਿਹਾ ਕਿ ਉਸ ਨੇ ਸੁਣਿਆ ਹੈ ਕਿ ਗਾਂ ਦੇ ਦੁੱਧ ਵਿਚ ਸੋਨਾ ਹੁੰਦਾ ਹੈ, ਇਸ ਲਈ ਉਹ ਗੋਲਡ ਲੋਨ ਲੈਣ ਆਇਆ ਹੈ।

ਵਿਅਕਤੀ ਦੀ ਇਹ ਗੱਲ ਸੁਣ ਕੇ ਕੰਪਨੀ ਦੇ ਅਧਿਕਾਰੀ ਹੈਰਾਨ ਰਹਿ ਗਏ। ਨਿਊਜ਼ ਚੈਨਲ ਨਾਲ ਗੱਲਬਾਤ ਦੌਰਾਨ ਇਸ ਵਿਅਕਤੀ ਨੇ ਕਿਹਾ, ‘ਮੇਰੇ ਕੋਲ 20 ਗਾਵਾਂ ਹਨ ਅਤੇ ਮੇਰਾ ਪਰਿਵਾਰ ਇਹਨਾਂ ਗਾਵਾਂ ‘ਤੇ ਹੀ ਨਿਰਭਰ ਹੈ। ਜੇਕਰ ਮੈਨੂੰ ਲੋਨ ਮਿਲ ਜਾਂਦਾ ਹੈ ਤਾਂ ਮੈਂ ਅਪਣਾ ਕਾਰੋਬਾਰ ਵਧਾ ਸਕਦਾ ਹਾਂ। ਮੈਂ ਸੁਣਿਆ ਹੈ ਕਿ ਗਾਂ ਦੇ ਦੁੱਧ ਵਿਚ ਸੋਨਾ ਹੁੰਦਾ ਹੈ ਇਸ ਲਈ ਮੈਂ ਇੱਥੇ ਗੋਲਡ ਲੋਨ ਲੈਣ ਆਇਆ ਹਾਂ’।

ਦਰਅਸਲ ਬਰਦਵਾਨ ਵਿਚ ਗੋਪਾਲ ਅਸ਼ਟਮੀ ਦੇ ਸਮਾਗਮ ਦੌਰਾਨ ਭਾਜਪਾ ਦੇ ਸੰਸਦ ਦਲੀਪ ਘੋਸ਼ ਨੇ ਕਿਹਾ ਸੀ, ‘ਭਾਰਤੀ ਨਸਲ ਦੀ ਦੇਸੀ ਗਾਂ ਵਿਚ ਇਕ ਖ਼ਾਸੀਅਤ ਹੁੰਦੀ ਹੈ। ਇਸ ਦੇ ਦੁੱਧ ਵਿਚ ਸੋਨਾ ਮਿਲਿਆ ਹੁੰਦਾ ਹੈ। ਇਹੀ ਕਾਰਨ ਹੈ ਕਿ ਇਸ ਦਾ ਦੁੱਧ ਸੁਨਹਿਰੇ ਰੰਗ ਦਾ ਹੁੰਦਾ ਹੈ’। ਦੇਸੀ ਅਤੇ ਵਿਦੇਸੀ ਗਾਂ ਦੀ ਤੁਲਨਾ ਕਰਦੇ ਹੋਏ ਘੋਸ਼ ਨੇ ਇਹ ਵੀ ਕਿਹਾ ਸੀ ਕਿ ਸਿਰਫ਼ ਦੇਸੀ ਗਾਂ ਹੀ ਸਾਡੀ ਮਾਂ ਹੈ ਅਤੇ ਵਿਦੇਸ਼ੀ ਨਸਲ ਦੀਆਂ ਗਾਵਾਂ ਸਾਡੀਆਂ ਆਂਟੀਆਂ ਹਨ। ਪਿੰਡ ਦੀ ਪੰਚਾਇਤ ਦਾ ਕਹਿਣਾ ਹੈ ਕਿ ਘੋਸ਼ ਦੇ ਇਸ ਬਿਆਨ ਤੋਂ ਬਾਅਦ ਕਈ ਲੋਕ ਫਾਈਨਾਂਸ ਕੰਪਨੀ ਨਾਲ ਗੋਲਡ ਲੋਨ ਲਈ ਸੰਪਰਕ ਕਰ ਚੁੱਕੇ ਹਨ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook ਤੇ ਲਾਈਕ Twitter  ਤੇ follow ਕਰੋ।