Kashmiri Students Eid Festival

ਨਵੀਂ ਦਿੱਲੀ : ਜੰਮੂ - ਕਸ਼ਮੀਰ 'ਚ ਧਾਰਾ 370 ਦੇ ਖਤਮ ਹੋਣ ਦੇ ਚਾਰ ਦਿਨ ਬਾਅਦ ਵੀ ਘਾਟੀ 'ਚ ਮੋਬਾਇਲ ਅਤੇ ਇੰਟਰਨੈੱਟ ਸੇਵਾ ਬੰਦ ਹੈ ਤੇ ਧਾਰਾ 144 ਲਾਗੂ ਹੈ। ਉਥੇ ਹੀ ਬਕਰੀਦ ਦਾ ਤਿਉਹਾਰ ਮਨਾਉਣ ਲਈ ਬਾਹਰ ਰਾਜਾਂ 'ਚ ਪੜ੍ਹਨ ਵਾਲੇ ਕਸ਼ਮੀਰੀ ਵਿਦਿਆਰਥੀਆਂ ਨੇ ਆਪਣੇ ਘਰਾਂ ਦਾ ਰੁਖ਼ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਹਾਲਾਂਕਿ ਕਸ਼ਮੀਰੀਆਂ ਦੀ ਸ਼ਿਕਾਇਤ ਹੈ ਕਿ ਫੋਨ ਬੰਦ ਹੋਣ ਨਾਲ ਉਨ੍ਹਾਂ ਨੂੰ ਪਰਿਵਾਰ ਨਾਲ ਸੰਪਰਕ ਕਰਨ 'ਚ ਪਰੇਸ਼ਾਨੀ ਹੋ ਰਹੀ ਹੈ।

ਉਥੇ ਹੀ ਕਸ਼ਮੀਰ 'ਚ ਤਨਾਅ ਭਰੇ ਹਾਲਾਤ ਅਤੇ ਈਦ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਸ਼੍ਰੀਨਗਰ ਦੇ ਜ਼ਿਲ੍ਹਾਧਿਕਾਰੀ ਸ਼ਾਹਿਦ ਚੌਧਰੀ ਨੇ ਬਾਹਰ ਰਹਿ ਰਹੇ ਜੰਮੂ - ਕਸ਼ਮੀਰ  ਦੇ ਲੋਕਾਂ ਲਈ ਘਰ ਵਾਪਸੀ ਯਾਤਰਾ 'ਚ ਸਹਾਇਤਾ ਅਤੇ ਕਸ਼ਮੀਰ 'ਚ ਸਬੰਧੀਆਂ ਨਾਲ ਸੰਪਰਕ ਕਰਨ ਲਈ ਹੈਲਪਲਾਇਨ ਨੰਬਰ ਜਾਰੀ ਕੀਤੇ ਹਨ। ਉਨ੍ਹਾਂ ਨੇ ਟਵੀਟ ਕੀਤਾ ਹੈ ਕਿ ਡੀਸੀ ਦਫ਼ਤਰ ਸ਼੍ਰੀਨਗਰ ਨੇ ਦੋ ਹੈਲਪਲਾਇਨ ਨੰਬਰ 9419028242, 9419028251 ਸਥਾਪਿਤ ਕੀਤੇ ਹਨ। ਰਾਜ ਦੇ ਬਾਹਰ ਰਹਿ ਰਹੇ ਲੋਕ ਇਨ੍ਹਾਂ ਨੰਬਰਾਂ 'ਤੇ ਸੰਪਰਕ ਕਰ ਸਕਦੇ ਹਨ।

ਸ਼੍ਰੀਨਗਰ ਦੇ ਜ਼ਿਲ੍ਹਾਧਿਕਾਰੀ ਨੇ ਕਿਹਾ ਕਿ ਸ਼੍ਰੀਨਗਰ ਦੇ ਬੜਗਾਮ ਏਅਰਪੋਰਟ 'ਤੇ ਉੱਤਰਨ ਵਾਲੇ ਲੋਕਾਂ ਲਈ ਘਰ ਤੱਕ ਪਹੁੰਚਣ ਲਈ ਬੱਸਾਂ ਅਤੇ ਕੈਬ ਦੀ ਸਹੂਲਤ ਦਾ ਇੰਤਜਾਮ ਕੀਤਾ ਗਿਆ ਹੈ। ਜੰਮੂ - ਕਸ਼ਮੀਰ ਪਹੁੰਚਣ ਵਾਲੇ ਲੋਕਾਂ ਲਈ ਏਅਰਪੋਰਟ ਅਤੇ ਬੱਸ ਸਟੈਂਡ 'ਤੇ ਖਾਣ -ਪੀਣ  ਦੇ ਲੰਗਰ ਲਗਾਏ ਗਏ ਹਨ। ਇਸ ਤੋਂ ਇਲਾਵਾ ਘਰ ਤੱਕ ਪਹੁੰਚਣ ਲਈ ਟ੍ਰਾਂਸਪੋਰਟ ਦੀ ਵਿਵਸਥਾ ਕੀਤੀ ਗਈ ਹੈ।

ਈਦ 'ਤੇ ਘਰ ਆਉਣ - ਜਾਣ ਵਾਲੇ ਲੋਕਾਂ ਲਈ ਉਧਮਪੁਰ ਅਤੇ ਜੰਮੂ ਤੋਂ ਵਿਸ਼ੇਸ਼ ਟ੍ਰੇਨ ਦਾ ਬੰਦੋਬਸਤ ਕੀਤਾ ਗਿਆ ਹੈ। ਜ਼ਿਲ੍ਹਾਧਿਕਾਰੀ ਸ਼ਾਹਿਦ ਚੌਧਰੀ ਨੇ ਟਵੀਟ ਵਿੱਚ ਕਿਹਾ ਕਿ ਕਸ਼ਮੀਰ ਤੋਂ ਬਾਹਰ ਦੂਜੇ ਰਾਜਾਂ 'ਚ ਘਰ ਜਾਣ ਦੀ ਚਾਹ ਰੱਖਣ ਵਾਲੇ ਲੋਕਾਂ ਨੂੰ ਵੀ ਸਹੂਲਤ ਦਿੱਤੀ ਜਾ ਰਹੀ ਹੈ। ਕਸ਼ਮੀਰ, ਜੰਮੂ, ਲੱਦਾਖ ਦੇ ਵੱਖਰੇ ਜ਼ਿਲ੍ਹਿਆਂ ਅਤੇ ਬਾਹਰ ਦੇ ਖੇਤਰ 'ਚ ਵਿਦਿਆਰਥੀਆਂ ਦੇ ਆਉਣ-ਜਾਣ ਲਈ 300 ਤੋਂ ਜ਼ਿਆਦਾ ਵਾਹਨਾਂ ਨੂੰ ਲਗਾਇਆ ਗਿਆ ਹੈ।