Say Assam Hospital Staff as 18 Newborns Die in 9 Days

ਜੋਰਹਾਟ (ਭਾਸ਼ਾ) : ਅਸਾਮ ਦੇ ਜੋਰਹਾਟ ਮੈਡੀਕਲ ਕਾਲਜ ਅਤੇ ਹਸਪਤਾਲ ਵਿਚ ਪਿਛਲੇ ਨੌਂ ਦਿਨਾਂ ਵਿਚ 18 ਨਵਜੰਮੇ ਬੱਚਿਆਂ ਦੀ ਮੌਤ ਦੀ ਖ਼ਬਰ ਨਾਲ ਸਿਹਤ ਵਿਭਾਗ ਵਿਚ ਹੜਕੰਪ ਮਚ ਗਿਆ ਹੈ। ਵਿਭਾਗ ਨੇ ਡਾਇਰੈਕਟਰ ਆਫ਼ ਮੈਡੀਕਲ ਐਜੂਕੇਸ਼ਨ ਦੀ ਅਗਵਾਈ ਵਿਚ ਮਾਮਲੇ ਦੀ ਜਾਂਚ ਦੇ ਆਦੇਸ਼ ਦੇ ਦਿਤੇ ਹਨ। ਇਸ ਮਾਮਲੇ ਨੂੰ ਲੈ ਕੇ ਸ਼ਨਿਚਰਵਾਰ ਨੂੰ ਯੂਨੀਸੇਫ ਦੇ ਇਕ ਵਫ਼ਦ ਨੇ ਹਸਪਤਾਲ ਦਾ ਦੌਰਾ ਕੀਤਾ।

ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਅਤੇ ਚੀਫ਼ ਸੁਪਰਡੈਂਟ ਦੇਬਾਜੀਤ ਹਜਾਰਿਕਾ ਨੇ ਤਿੰਨ ਬੱਚਿਆਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਹੈ ਅਤੇ ਦਸਿਆ ਹੈ ਕਿ ਪੀਡੀਆਟ੍ਰਿਕਸ ਵਿਭਾਵ ਦੇ ਮੁਖੀ ਪ੍ਰਣਬਜੀਤ ਬਿਸਵਨਾਥ ਦੀ ਅਗਵਾਈ ਵਿਚ ਅੰਦਰੂਨੀ ਜਾਂਚ ਕਰਕੇ ਰਿਪੋਰਟ ਸ਼ੁਕਰਵਾਰ ਨੂੰ ਦਿਤੀ ਗਈ ਹੈ। ਉਨ੍ਹਾਂ ਦਸਿਆ ਕਿ ਅੰਦਰੂਨੀ ਜਾਂਚ ਕਮੇਟੀ ਦੀ ਰਿਪੋਰਟ ਮੁਤਾਬਕ ਇਕ ਨਵੰਬਰ ਤੋਂ ਹੁਣ ਤਕ ਸਪੈਸ਼ਲ ਕੇਅਰ ਨਿਊ ਬੌਰਨ ਯੂਨਿਟ (ਐਸਸੀਐਨਯੂ) ਵਿਚ 15 ਬੱਚਿਆਂ ਦੀ ਮੌਤ ਮੁਸ਼ਕਲ ਡਿਲੀਵਰੀ ਅਤੇ ਜ਼ਰੂਰੀ ਸਮਾਨ ਦੀ ਕਮੀ ਕਾਰਲ ਹੋ ਗਈ।

ਉਨ੍ਹਾਂ ਦਸਿਆ ਕਿ 10 ਬੱਚਿਆਂ ਦੀ ਮੌਤ ਜਨਮ ਦੇ ਸਮੇਂ ਘੱਟ ਵਜ਼ਨ ਅਤੇ ਤਿੰਨ ਦੀ ਮੌਤ ਦਿਲ ਨਾਲ ਜੁੜੀਆਂ ਬਿਮਾਰੀਆਂ ਕਾਰਨ ਹੋ ਗਈ। ਰਿਕਾਰਡਸ ਦੇ ਮੁਤਾਬਕ ਮੈਡੀਕਲ ਕਾਲਜ ਦੇ ਨਵੇਂ ਐਸਸੀਐਨਯੂ ਵਿਚ ਸਿਰਫ਼ 40 ਬੱਚੇ ਆ ਸਕਦੇ ਹਨ ਪਰ ਹਸਪਤਾਲ ਨੇ ਇਕ ਨਵੰਬਰ ਤੋਂ 6 ਨਵੰਬਰ ਦੇ ਵਿਚਕਾਰ ਬੈੱਡ ਸ਼ੇਅਰ ਕਰਵਾਉਂਦੇ ਹੋਏ 80 ਬੱਚੇ ਭਰਤੀ ਕਰ ਲਏ। ਹਜਾਰਿਕਾ ਨੇ ਦਸਿਆ ਕਿ ਸਰਕਾਰ ਨੂੰ ਐਸਸੀਐਨਯੂ ਦੀ ਸਮਰੱਥਾ 40 ਤੋਂ ਵਧਾ ਕੇ 100 ਕਰਨ ਦੀ ਮੰਗ ਕੀਤੀ ਗਈ ਹੈ। 

ਦਸ ਦਈਏ ਕਿ ਇਸ ਤੋਂ ਪਹਿਲਾਂ ਉਤਰ ਪ੍ਰਦੇਸ਼ ਵਿਚ ਮੁੱਖ ਮੰਤਰੀ ਯੋਗੀ ਅਦਿਤਿਆਨਾਥ ਦੇ ਖੇਤਰ ਗੋਰਖ਼ਪੁਰ ਦੇ ਇਕ ਹਸਪਤਾਲ ਵਿਚ ਕਈ ਬੱਚਿਆਂ ਦੀ ਮੌਤ ਹੋ ਗਈ ਸੀ। ਇਸ ਦੌਰਾਨ ਵੀ ਹਸਪਤਾਲ ਵਿਚ ਕਈ ਕਮੀਆਂ ਸਾਹਮਣੇ ਆਈਆਂ ਸਨ। ਦਰਅਸਲ ਇਨ੍ਹਾਂ ਵਿਚੋਂ ਜ਼ਿਆਦਾਤਰ ਮੌਤਾਂ ਇਕ ਪ੍ਰਾਈਵੇਟ ਕੰਪਨੀ ਵਲੋਂ ਹਸਪਤਾਲ ਦੀ ਆਕਸੀਜ਼ਨ ਸਪਲਾਈ ਬੰਦ ਕਰ ਦਿਤੇ ਜਾਣ ਕਾਰਨ ਹੋਈਆਂ ਸਨ

ਕਿਉਂਕਿ ਹਸਪਤਾਲ ਨੇ ਕੰਪਨੀ ਨੇ ਲੰਬੇ ਸਮੇਂ ਤੋਂ ਪੇਮੈਂਟ ਨਹੀਂ ਦਿਤੀ ਸੀ। ਉਂਝ ਭਾਰਤੀ ਹਸਪਤਾਲਾਂ ਦੀ ਹਾਲਤ ਤੋਂ ਹਰ ਕੋਈ ਵਾਕਿਫ਼ ਹੈ, ਜਿੱਥੇ ਇਲਾਜ ਲਈ ਦਾਖ਼ਲ ਹੋਏ ਲੋਕ ਕਈ ਵਾਰ ਮੁਢਲੀਆਂ ਸਹੂਲਤਾਂ ਦੀ ਘਾਟ ਕਾਰਨ ਹੀ ਦਮ ਤੋੜ ਜਾਂਦੇ ਹਨ। ਦੇਸ਼ ਦੇ ਕਈ ਖੇਤਰਾਂ ਵਿਚ ਅਜਿਹੇ ਅਨੇਕਾਂ ਮਾਮਲੇ ਸਾਹਮਣੇ ਆ ਚੁੱਕੇ ਹਨ, ਜਿਨ੍ਹਾਂ ਵਿਚ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਵਾਪਰੀਆਂ ਹਨ।