ਦੇਸ਼ ਭਰ ’ਚ ਲਗਭਗ ਡੇਢ ਘੰਟੇ ਲਈ UPI ਸੇਵਾ ਰਹੀ ਬੰਦ

UPI services remained down across the country for about an hour and a half

ਦੇਸ਼ ਵਿੱਚ ਯੂਨੀਫਾਈਡ ਪੇਮੈਂਟਸ ਇੰਟਰਫੇਸ (UPI) ਸੇਵਾ ਲਗਭਗ ਡੇਢ ਘੰਟੇ ਲਈ ਤਕਨੀਕੀ ਸਮੱਸਿਆ ਕਾਰਨ ਬੰਦ ਰਹੀ। ਇਸ ਵੇਲੇ ਲੋਕਾਂ ਨੂੰ UPI ਭੁਗਤਾਨ ਕਰਨ ਵਿਚ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪਿਛਲੇ 20 ਦਿਨਾਂ ਵਿਚ ਇਹ ਤੀਜੀ ਵਾਰ ਹੈ ਜਦੋਂ ਲੈਣ-ਦੇਣ ਵਿਚ ਕੋਈ ਸਮੱਸਿਆ ਆਈ ਹੈ। ਡਾਊਨਡਿਟੇਕਟਰ ਅਨੁਸਾਰ, ਸਮੱਸਿਆ ਦਾ ਸਾਹਮਣਾ ਕਰ ਰਹੇ ਲਗਭਗ 72 ਫ਼ੀ ਸਦੀ ਲੋਕਾਂ ਨੂੰ ਭੁਗਤਾਨ ਕਰਨ ਵਿਚ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

27 ਫ਼ੀ ਸਦੀ ਲੋਕਾਂ ਨੂੰ ਫੰਡ ਟਰਾਂਸਫਰ ਕਰਨ ਵਿਚ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਅਤੇ ਲਗਭਗ 1 ਫ਼ੀ ਸਦੀ ਲੋਕਾਂ ਨੂੰ ਖ਼ਰੀਦਦਾਰੀ ਕਰਨ ਵਿਚ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦਸਦਈਏ ਕਿ ਸਭ ਤੋਂ ਵੱਧ ਪਰੇਸ਼ਾਨੀ ਸਵੇਰੇ 11:30 ਵਜੇ ਤੋਂ ਦੁਪਹਿਰ 12:30 ਵਜੇ ਤਕ ਹੁੰਦੀ ਹੈ। ਇਸ ਤੋਂ ਪਹਿਲਾਂ, 2 ਅਪ੍ਰੈਲ ਅਤੇ 26 ਮਾਰਚ ਨੂੰ, ਦੇਸ਼ ਭਰ ਵਿਚ ਸੇਵਾ ਲਗਭਗ ਢਾਈ ਘੰਟੇ ਲਈ ਬੰਦ ਰਹੀ ਸੀ। ਫਿਰ ਲੋਕਾਂ ਨੂੰ ਗੂਗਲ ਪੇ, ਫੋਨਪੇ ਅਤੇ ਪੇਟੀਐਮ ਵਰਗੀਆਂ ਐਪਾਂ ਰਾਹੀਂ ਪੈਸੇ ਟਰਾਂਸਫਰ ਕਰਨ ਵਿਚ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।

ਇਸ ਤੋਂ ਇਲਾਵਾ 10 ਤੋਂ ਵੱਧ ਬੈਂਕਾਂ ਦੀਆਂ UPI ਅਤੇ ਨੈੱਟ ਬੈਂਕਿੰਗ ਸੇਵਾਵਾਂ ਵੀ ਪ੍ਰਭਾਵਿਤ ਹੋਈਆਂ। ਉਪਭੋਗਤਾ ਐਪ ਵਿੱਚ ਲੌਗਇਨ ਅਤੇ ਨੈੱਟ ਬੈਂਕਿੰਗ ਤਕ ਵੀ ਪਹੁੰਚ ਨਹੀਂ ਕਰ ਪਾ ਰਹੇ ਸਨ। ਨੈਸ਼ਨਲ ਪੇਮੈਂਟਸ ਕਾਰਪੋਰੇਸ਼ਨ ਆਫ ਇੰਡੀਆ (NPCI) ਨੇ ਕਿਹਾ ਸੀ, ’ਉਪਭੋਗਤਾਵਾਂ ਨੂੰ ਅਸਥਾਈ ਤਕਨੀਕੀ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪਿਆ, ਜਿਸ ਕਾਰਨ UPI ਵਿਚ ਅੰਸ਼ਕ ਵਿਘਨ ਪਿਆ।’ ਹੁਣ ਇਹ ਸਮੱਸਿਆਵਾਂ ਹੱਲ ਹੋ ਗਈਆਂ ਹਨ। ਸਿਸਟਮ ਸਥਿਰ ਹੋ ਗਿਆ ਹੈ।