ਪਸਤੌਲ ਨਾਲ ਸੈਲਫ਼ੀ ਲੈਣੀ ਪਈ ਮਹਿੰਗੀ; ਅਚਾਨਕ ਚੱਲੀ ਗੋਲੀ, ਮੌਤ
ਪੁਲਿਸ ਨੇ ਦੇਸੀ ਕੱਟਾ ਅਤੇ ਵਾਰਦਾਤ 'ਚ ਵਰਤੀ ਹੋਈ ਗੱਡੀ ਨੂੰ ਜ਼ਬਤ ਕੀਤਾ
ਨਵੀਂ ਦਿੱਲੀ : ਦਿੱਲੀ ਦੇ ਰਣਜੀਤ ਨਗਰ ਫ਼ਲਾਈਓਵਰ 'ਤੇ ਸ਼ਨਿਚਰਵਾਰ ਰਾਤ 11:30 ਜਫ਼ਰਾਬਾਦ ਤੋਂ ਇੰਡੀਆ ਗੇਟ ਘੁੰਮਣ ਗਏ ਤਿੰਨ ਦੋਸਤਾਂ ਲਈ ਉਨ੍ਹਾਂ ਦਾ ਸੈਲਫ਼ੀ ਲੈਣ ਦਾ ਸ਼ੌਕ ਜਾਨਲੇਵਾ ਸਾਬਤ ਹੋਇਆ। 20 ਸਾਲਾ ਸਲਮਾਨ ਨਾਂ ਦੇ ਨੌਜਵਾਨ ਨੂੰ ਗੋਲੀ ਲੱਗਣ ਕਾਰਨ ਮੌਤ ਹੋ ਗਈ, ਜਦਕਿ ਗੋਲੀ ਮਾਰਨ ਦੇ ਦੋਸ਼ 'ਚ ਪੁਲਿਸ ਨੇ ਸੋਹੇਲ ਨਾਂ ਦੇ ਲੜਕੇ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਦਰਅਸਲ ਮਾਮਲਾ ਸ਼ਨਿਚਰਵਾਰ ਰਾਤ 11:30 ਵਜੇ ਦਾ ਹੈ। ਪੁਲਿਸ ਮੁਤਾਬਕ ਦਿੱਲੀ ਦੇ ਜਫ਼ਰਾਬਾਦ ਤੋਂ ਸਲਮਾਨ, ਸੌਹੇਲ ਅਤੇ ਆਮਿਰ ਨਾਂ ਦੇ ਤਿੰਨ ਦੋਸਤ ਆਪਣੀ ਟੋਇਟਾ ਕ੍ਰੇਟਾ ਗੱਡੀ ਤੋਂ ਇੰਡੀਆ ਗੇਟ ਘੁੰਮਣ ਗਏ ਸਨ। ਉਦੋਂ ਵਾਪਸ ਜਾਂਦਿਆਂ ਗੋਲੀ ਲੱਗਣ ਕਾਰਨ ਤਿੰਨਾਂ 'ਚੋਂ ਇਕ ਦੀ ਮੌਤ ਹੋ ਗਈ। ਪੁਲਿਸ ਨੇ ਦੱਸਿਆ ਕਿ ਘੁੰਮਣ ਤੋਂ ਬਾਅਦ ਤਿੰਨੇ ਨੌਜਵਾਨ ਆਪਣੀ ਗੱਡੀ 'ਚ ਵਾਪਸ ਜਾ ਰਹੇ ਸਨ। ਬਾਰਾਖੰਭਾ ਇਲਾਕੇ ਦੇ ਰੰਜੀਤ ਸਿੰਘ ਫ਼ਲਾਈਓਵਰ ਨੇੜੇ ਤਿੰਨੇ ਦੋਸਤ ਸੈਲਫ਼ੀ ਲੈਣ ਲਈ ਰੁਕੇ ਸਨ। ਇਸ ਤੋਂ ਪਹਿਲਾਂ ਕਿ ਉਹ ਸੈਲਫ਼ੀ ਲੈ ਪਾਉਂਦੇ ਗੱਡੀ ਅੰਦਰ ਗੋਲੀ ਚੱਲ ਗਈ ਅਤੇ ਸਿੱਧੇ ਸਲਮਾਨ ਦੀ ਖੋਪੜੀ 'ਚ ਜਾ ਕੇ ਲੱਗੀ।
ਸਲਮਾਨ ਨੂੰ ਸੌਹੇਲ ਅਤੇ ਆਮਿਰ ਨੇੜੇ ਦੇ ਐਲ.ਐਨ.ਜੇ.ਪੀ. ਹਸਪਤਾਲ ਲੈ ਕੇ ਗਏ, ਜਿੱਥੇ ਸਲਮਾਨ ਦੀ ਹਾਲਤ ਵੇਖ ਡਾਕਟਰਾਂ ਨੇ ਪੁਲਿਸ ਨੂੰ ਖ਼ਬਰ ਦਿੱਤੀ। ਪੁਲਿਸ ਨੇ ਮੌਕੇ 'ਤੇ ਹੀ ਸੌਹੇਲ ਨੂੰ ਗ੍ਰਿਫ਼ਤਾਰ ਕਰ ਲਿਆ, ਜਦਕਿ ਆਮਿਰ ਫ਼ਰਾਰ ਹੋ ਗਿਆ। ਪੁਲਿਸ ਨੇ ਸੌਹੇਲ ਕੋਲੋਂ ਦੇਸੀ ਕੱਟਾ ਅਤੇ ਵਾਰਦਾਤ 'ਚ ਵਰਤੀ ਹੋਈ ਗੱਡੀ ਨੂੰ ਜ਼ਬਤ ਕਰ ਲਿਆ ਹੈ।
ਸੌਹੇਲ ਨੇ ਪੁਲਿਸ ਨੂੰ ਦੱਸਿਆ ਕਿ ਇਹ ਤਿੰਨੇ ਦੋਸਤ ਅਕਸਰ ਸੈਲਫ਼ੀ ਲੈਂਦੇ ਸਨ ਅਤੇ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ 'ਤੇ ਅਪਲੋਡ ਕਰਦੇ ਸਨ। ਉਸ ਦਿਨ ਵੀ ਉਨ੍ਹਾਂ ਦਾ ਕੁਝ ਅਜਿਹਾ ਹੀ ਪਲਾਨ ਸੀ, ਪਰ ਅਚਾਨਕ ਗੋਲੀ ਚੱਲ ਗਈ।