ਨਵੀਂ ਦਿੱਲੀ : ਹਿੰਦੋਸਤਾਨ ਏਅਰੋਨੋਟਿਕਸ ਲਿਮਟਿਡ (ਐਚ.ਏ.ਐਲ.) ਦੇ 20 ਹਜ਼ਾਰ ਤੋਂ ਵੱਧ ਮੁਲਾਜ਼ਮਾਂ ਨੇ ਤਨਖਾਹਾਂ 'ਚ ਵਾਧੇ ਦੀ ਮੰਗ ਨੂੰ ਲੈ ਕੇ 14 ਅਕਤੂਬਰ ਤੋਂ ਅਣਮਿੱਥੇ ਸਮੇਂ ਲਈ ਹੜਤਾਲ ਸ਼ੁਰੂ ਕਰ ਦਿੱਤੀ ਹੈ। ਇਸ ਦੌਰਾਨ ਮੁਲਾਜ਼ਮਾਂ ਨੇ ਮੈਨੇਜਮੈਂਟ ਵਿਰੁਧ ਨਾਹਰੇਬਾਜ਼ੀ ਕੀਤੀ। ਸੰਗਠਨ ਦੇ ਜਨਰਲ ਸਕੱਤਰ ਨੇ ਦੱਸਿਆ ਕਿ ਇਹ ਦੇਸ਼ ਪਧਰੀ ਹੜਤਾਲ ਅਣਮਿੱਥੇ ਸਮੇਂ ਲਈ ਹੈ। ਉਨ੍ਹਾਂ ਦੋਸ਼ ਲਗਾਇਆ ਕਿ ਅਧਿਕਾਰੀਆਂ ਨੇ ਆਪਣੀਆਂ ਤਨਖਾਹਾਂ ਤਾਂ ਵਧਾ ਲਈਆਂ ਪਰ ਮੁਲਾਜ਼ਮਾਂ 'ਤੇ ਧਿਆਨ ਨਾ ਦਿੱਤਾ।
ਮੈਨੇਜਮੈਂਟ ਨਾਲ 11ਵੇਂ ਦੌਰ ਦੀ ਗੱਲਬਾਤ ਅਸਫ਼ਲ ਹੋਣ ਤੋਂ ਬਾਅਦ ਮੁਲਾਜ਼ਮਾਂ ਨੇ ਹੜਤਾਲ 'ਤੇ ਜਾਣ ਦਾ ਫ਼ੈਸਲਾ ਕੀਤਾ। 1 ਜਨਵਰੀ 2017 ਤੋਂ ਬਾਅਦ ਮੁਲਾਜ਼ਮਾਂ ਦੀਆਂ ਤਨਖਾਹਾਂ 'ਚ ਕੋਈ ਵਾਧਾ ਨਹੀਂ ਹੋਇਆ ਹੈ। ਅੰਤਮ ਵਾਰ ਸੰਸ਼ੋਧਤ ਕੀਤੀ ਗਈ ਤਨਖਾਹ ਨੂੰ ਸਾਲ 2012 'ਚ 5 ਸਾਲ ਲਈ ਕੀਤਾ ਗਿਆ ਸੀ। ਆਲ ਇੰਡੀਆ ਐਚ.ਏ.ਐਲ. ਟਰੇਡ ਯੂਨੀਅਨ ਕੋਆਰਡੀਨੇਸ਼ਨ ਕਮੇਟੀ (AIHALTUCC) ਨੇ ਐਤਵਾਰ ਨੂੰ ਕਿਹਾ ਸੀ ਕਿ ਮੈਨੇਜਮੈਂਟ ਨਾਲ ਗੱਲਬਾਤ ਅਸਫ਼ਲ ਹੋਣ ਤੋਂ ਬਾਅਦ ਅਸੀ ਅਣਮਿੱਥੇ ਸਮੇਂ ਲਈ ਹੜਤਾਲ 'ਤੇ ਜਾ ਰਹੇ ਹਾਂ। AIHALTUCC ਦੇ ਚੀਫ਼ ਕੰਵੇਨਰ ਸੂਰਿਆਦੇਵੜਾ ਚੰਦਰਸ਼ੇਖਰ ਨੇ ਕਿਹਾ, "ਅਸੀ ਦੇਸ਼ ਦੇ ਸਾਰੇ 9 ਐਚਏਐਲ ਯੂਨਿਟਾਂ 'ਚ ਹੜਤਾਲ ਕਰ ਰਹੇ ਹਾਂ। ਕੁਲ 10 ਹਜ਼ਾਰ ਮੁਲਾਜ਼ਮ ਕੰਮ ਨਹੀਂ ਕਰਨਗੇ ਅਤੇ ਕੰਮਕਾਜ ਪੂਰੀ ਤਰ੍ਹਾਂ ਠੱਪ ਹੋ ਜਾਵੇਗਾ।
ਜ਼ਿਕਰਯੋਗ ਹੈ ਕਿ ਭਾਰਤ ਦੀ ਜਲ, ਥਲ ਅਤੇ ਹਵਾਈ ਤਿੰਨਾਂ ਸੈਨਾਵਾਂ ਲਈ ਲੜਾਕੂ ਜਹਾਜ਼ ਅਤੇ ਹੈਲੀਕਾਪਟਰ ਬਣਾਉਣ ਵਾਲੀ ਸਰਕਾਰੀ ਕੰਪਨੀ ਐਚ.ਏ.ਐਲ. ਦੇ ਦੇਸ਼ ਭਰ 'ਚ 16 ਮੈਨੁਫੈਕਚਰਿੰਗ ਪਲਾਂਟ ਹਨ। ਇਸ ਦੇ ਨਾਲ ਹੀ 9 ਰਿਸਰਚ ਐਂਡ ਡਿਵੈਲਪਮੈਂਟ ਸੈਂਟਰ ਵੀ ਹਨ, ਜਿਨ੍ਹਾਂ 'ਚ 30 ਹਜ਼ਾਰ ਤੋਂ ਵੱਧ ਮੁਲਾਜ਼ਮ ਕੰਮ ਕਰਦੇ ਹਨ। ਐਚ.ਏ.ਐਲ. ਦੀਆਂ ਇਹ ਯੂਨਿਟਾਂ ਬੰਗਲੁਰੂ, ਹੈਦਰਾਬਾਦ, ਉੜੀਸਾ ਦੇ ਕੋਰਾਪੁਟ, ਲਖਨਊ ਅਤੇ ਨਾਸਿਕ 'ਚ ਹਨ। ਐਚ.ਏ.ਐਲ. ਦਾ ਕਾਰਪੋਰੇਟ ਹੈਡਕੁਆਰਟਰ ਵੀ ਬੰਗਲੁਰੂ 'ਚ ਹੈ। ਐਚ.ਏ.ਐਲ. ਦੇਸ਼ ਦੀਆਂ ਫ਼ੌਜਾਂ (ਥਲ, ਜਲ ਅਤੇ ਹਵਾਈ) ਲਈ ਸਵਦੇਸ਼ੀ ਲੜਾਕੂ ਜਹਾਜ਼, ਹੈਲੀਕਾਪਟਰ ਅਤੇ ਏਅਰੋਨੋਟਿਕਲ ਇੰਜਨ ਤਿਆਰ ਕਰਦੀ ਹੈ।