Now you will get your favorite seat in the train also

Railway News: ਹਵਾਈ ਜਹਾਜ਼ ਅਤੇ ਸਿਨੇਮਾ ਹਾਲ ਟਿਕਟਾਂ ਦੀ ਤਰਜ਼ 'ਤੇ ਰੇਲਵੇ ਹੁਣ ਟ੍ਰੇਨ 'ਚ ਯਾਤਰੀਆਂ ਨੂੰ ਉਨ੍ਹਾਂ ਦੀ ਪਸੰਦ ਦੀਆਂ ਸੀਟਾਂ ਦੇਣ ਦੀ ਪ੍ਰਣਾਲੀ ਲਾਗੂ ਕਰਨ ਦੀ ਤਿਆਰੀ ਕਰ ਰਿਹਾ ਹੈ। ਇਸ ਦੇ ਲਈ ਨਵਾਂ ਸਾਫਟਵੇਅਰ ਲਗਭਗ ਤਿਆਰ ਹੈ।

ਇੰਡੀਅਨ ਰੇਲਵੇ ਕੈਟਰਿੰਗ ਐਂਡ ਟੂਰਿਜ਼ਮ ਕਾਰਪੋਰੇਸ਼ਨ (ਆਈਆਰਸੀਟੀਸੀ) ਦੇ ਅਧਿਕਾਰੀਆਂ ਦੇ ਅਨੁਸਾਰ, ਇਕ ਵਾਰ ਸਿਸਟਮ ਲਾਗੂ ਹੋਣ ਤੋਂ ਬਾਅਦ, ਖਾਲੀ ਸੀਟਾਂ ਦੀ ਸੂਚੀ ਦੇਸ਼ ਭਰ ਵਿਚ ਘਰ ਬੈਠੇ ਯਾਤਰੀਆਂ ਨੂੰ ਉਪਲਬਧ ਹੋਵੇਗੀ। ਨਵੀਂ ਪ੍ਰਣਾਲੀ ਵਿਚ ਯਾਤਰੀਆਂ ਨੂੰ ਉਪਰਲੀ-ਹੇਠਲੀ ਜਾਂ ਖਿੜਕੀ ਦੀਆਂ ਸੀਟਾਂ ਦੀ ਚੋਣ ਕਰਨ ਦਾ ਅਧਿਕਾਰ ਵੀ ਹੋਵੇਗਾ। ਸਿਸਟਮ ਦੇ ਤਹਿਤ ਯਾਤਰੀ ਇਹ ਵੀ ਜਾਣ ਸਕਣਗੇ ਕਿ ਯਾਤਰਾ ਦੀ ਤਰੀਕ 'ਤੇ ਟ੍ਰੇਨ 'ਚ ਕਿੰਨੀਆਂ ਸੀਟਾਂ ਖਾਲੀ ਹਨ ਅਤੇ ਉਨ੍ਹਾਂ ਦਾ ਸਥਾਨ ਕੀ ਹੈ।

ਰਾਏਪੁਰ ਰੇਲਵੇ ਡਿਵੀਜ਼ਨ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਜਿਵੇਂ ਹੀ ਨਵੀਂ ਐਪ ਰਾਹੀਂ ਰੇਲਗੱਡੀ ਦਾ ਨਾਮ ਅਤੇ ਯਾਤਰਾ ਦੀ ਮਿਤੀ ਦਰਜ ਕਰਕੇ ਖੋਜ ਕੀਤੀ ਜਾਵੇਗੀ, ਯਾਤਰੀਆਂ ਦੇ ਮੋਬਾਈਲ ਸਕ੍ਰੀਨ 'ਤੇ ਏਸੀ ਤੋਂ ਲੈ ਕੇ ਸਲੀਪਰ ਕਲਾਸ ਤਕ ਦੇ ਡੱਬਿਆਂ ਦਾ ਚਿੱਤਰ ਉਪਲਬਧ ਹੋ ਜਾਵੇਗਾ। ਚਿੱਤਰ ਨੂੰ ਦੇਖ ਕੇ ਯਾਤਰੀ ਆਸਾਨੀ ਨਾਲ ਅਪਣੀ ਪਸੰਦ ਦੀ ਸੀਟ ਬੁੱਕ ਕਰ ਸਕਣਗੇ। ਜਿਹੜੀਆਂ ਸੀਟਾਂ ਪਹਿਲਾਂ ਤੋਂ ਰਾਖਵੀਆਂ ਕੀਤੀਆਂ ਗਈਆਂ ਹਨ, ਉਨ੍ਹਾਂ ਦੀ ਨਿਸ਼ਾਨਦੇਹੀ ਕੀਤੀ ਜਾਵੇਗੀ। ਖਾਲੀ ਥਾਂਵਾਂ ਜਾਂ ਸੀਟਾਂ 'ਤੇ ਕੋਈ ਨਿਸ਼ਾਨਦੇਹੀ ਨਹੀਂ ਹੋਵੇਗੀ।

ਦੱਖਣ ਪੂਰਬੀ ਮੱਧ ਰੇਲਵੇ ਦੇ ਸੀ.ਪੀ.ਆਰ.ਓ ਵਿਕਾਸ ਕਸ਼ਯਪ ਨੇ ਕਿਹਾ ਕਿ ਨਵਾਂ ਸਾਫਟਵੇਅਰ ਯਾਤਰੀਆਂ ਨੂੰ ਉਨ੍ਹਾਂ ਦੀ ਪਸੰਦ ਦੀਆਂ ਸੀਟਾਂ ਪ੍ਰਦਾਨ ਕਰਨ ਲਈ ਲਗਭਗ ਤਿਆਰ ਹੈ। ਐਪ ਨੂੰ ਜਲਦੀ ਹੀ ਲਾਂਚ ਕੀਤਾ ਜਾਵੇਗਾ। ਇਸ ਸਿਸਟਮ ਦੇ ਵਿਕਸਤ ਹੋਣ ਤੋਂ ਬਾਅਦ ਯਾਤਰੀਆਂ ਨੂੰ ਇਹ ਵੀ ਪਤਾ ਲੱਗ ਜਾਵੇਗਾ ਕਿ ਟ੍ਰੇਨ 'ਚ ਕਿੰਨੀਆਂ ਸੀਟਾਂ ਖਾਲੀ ਹਨ। ਉਹ ਆਪਣੀ ਮਰਜ਼ੀ ਅਨੁਸਾਰ ਟਿਕਟਾਂ ਬੁੱਕ ਕਰ ਸਕਣਗੇ।

ਅਜਿਹਾ ਸਿਸਟਮ ਲਾਗੂ ਕਰਨ ਦੀਆਂ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ, ਜਿਸ ਨਾਲ ਕਿਸੇ ਦੀ ਪਸੰਦ ਦੀਆਂ ਸੀਟਾਂ ਚੁਣਨ ਦਾ ਵਿਕਲਪ ਦਿਤਾ ਜਾ ਸਕੇ, ਪਰ ਰੇਲਵੇ ਅਧਿਕਾਰੀ ਟਿਕਟਾਂ ਦੀਆਂ ਕੀਮਤਾਂ ਨੂੰ ਲੈ ਕੇ ਅਜੇ ਤਕ ਚੁੱਪ ਹਨ। ਰੇਲਵੇ ਸੂਤਰਾਂ ਮੁਤਾਬਕ ਯਾਤਰੀਆਂ ਨੂੰ ਅਪਣੀ ਪਸੰਦ ਦੀ ਸੀਟ ਲੈਣ ਲਈ ਵਾਧੂ ਪੈਸੇ ਦੇਣੇ ਪੈ ਸਕਦੇ ਹਨ।

(For more Punjabi news apart from Now you will get your favorite seat in the train also, stay tuned to Rozana Spokesman)