''ਕਾਂਗਰਸ, ਖੱਬੇ ਪੱਖੀ ਅਤੇ ਦੋ-ਤਿੰਨ ਜੱਜ ਰਾਮ ਮੰਦਰ ਦੇ ਰਾਹ ਦਾ ਰੋੜਾ''
ਰਾਮ ਮੰਦਰ ਨੂੰ ਲੈ ਕੇ ਆਰ.ਐਸ.ਐਸ ਅਤੇ ਭਾਜਪਾ ਨੇਤਾਵਾਂ ਦੇ ਵਿਵਾਦਤ ਬਿਆਨ ਲਗਾਤਾਰ ਜਾਰੀ ਹਨ, ਹੁਣ ਆਰ.ਐਸ.ਐਸ ਨੇਤਾ ਇੰਦਰੇਸ਼ ਕੁਮਾਰ ਨੇ ਦੋਸ਼ ਲਗਾਇਆ...
ਨਵੀਂ ਦਿੱਲੀ : ਰਾਮ ਮੰਦਰ ਨੂੰ ਲੈ ਕੇ ਆਰ.ਐਸ.ਐਸ ਅਤੇ ਭਾਜਪਾ ਨੇਤਾਵਾਂ ਦੇ ਵਿਵਾਦਤ ਬਿਆਨ ਲਗਾਤਾਰ ਜਾਰੀ ਹਨ, ਹੁਣ ਆਰ.ਐਸ.ਐਸ ਨੇਤਾ ਇੰਦਰੇਸ਼ ਕੁਮਾਰ ਨੇ ਦੋਸ਼ ਲਗਾਇਆ ਹੈ ਕਿ ਕਾਂਗਰਸ, ਖੱਬੇ ਪੱਖੀ ਅਤੇ 'ਦੋ ਤਿੰਨ ਜੱਜ' ਉਨ੍ਹਾਂ ਗੁਨਾਹਗਾਰਾਂ ਵਿਚ ਹਨ ਜੋ ਇਨਸਾਫ਼ ਵਿਚ ਦੇਰੀ ਕਰਕੇ ਆਯੁੱਧਿਆ ਵਿਚ ਰਾਮ ਮੰਦਰ ਨਿਰਮਾਣ ਵਿਚ ਰੋੜੇ ਅਟਕਾ ਰਹੇ ਹਨ, ਉਨ੍ਹਾਂ ਆਖਿਆ ਕਿ ਆਰਐਸਐਸ ਦੀ ਮੰਗ ਹੈ ਕਿ ਮੰਦਰ ਨਿਰਮਾਣ ਲਈ ਸਰਕਾਰ ਆਰਡੀਨੈਂਸ ਲਿਆਏ।
ਜ਼ਿਕਰਯੋਗ ਹੈ ਕਿ ਆਰਐਸਐਸ ਨੇਤਾ ਦਾ ਇਹ ਬਿਆਨ ਸੁਪਰੀਮ ਕੋਰਟ ਵਿਚ ਰਾਮ ਜਨਮ ਭੂਮੀ ਅਤੇ ਬਾਬਰੀ ਮਸਜਿਦ ਜ਼ਮੀਨ ਵਿਵਾਦ ਦੇ ਮਾਮਲੇ ਦੀ ਸੁਣਵਾਈ ਨੂੰ ਟਾਲਣ ਤੋਂ ਕੁੱਝ ਦਿਨ ਬਾਅਦ ਆਇਆ ਹੈ। ਆਰਐਸਐਸ ਨੇਤਾ ਨੇ ਇਹ ਵੀ ਆਖਿਆ ਕਿ ਜਦੋਂ ਕਾਬਾ, ਵੈਟੀਕਨ ਸਿਟੀ, ਦੀਕਸ਼ਾ ਭੂਮੀ, ਸਾਰਨਾਥ, ਹਰਿਮੰਦਰ ਸਾਹਿਬ ਅਤੇ ਹੋਰ ਧਾਰਮਿਕ ਅਸਥਾਨਾਂ ਨੂੰ ਦੁਨੀਆਂ ਭਰ ਵਿਚ ਸਨਮਾਨ ਮਿਲਦਾ ਹੈ ਤਾਂ ਫਿਰ ਜਿੱਥੇ ਭਗਵਾਨ ਰਾਮ ਦਾ ਜਨਮ ਹੋਇਆ।
ਉਸ ਨੂੰ ਇੰਨੀ ਬੇਇਨਸਾਫ਼ੀ ਅਤੇ ਅਪਮਾਨ ਦਾ ਸਾਹਮਣਾ ਕਿਉਂ ਕਰਨਾ ਪੈ ਰਿਹੈ। ਪੂਰੀ ਦੁਨੀਆ ਇਸ ਦਾ ਜਵਾਬ ਦੇਣਾ ਚਾਹੀਦੈ। ਦਸ ਦਈਏ ਕਿ ਆਯੁੱਧਿਆ ਮਾਮਲਾ ਅਜੇ ਸੁਪਰੀਮ ਕੋਰਟ ਵਿਚ ਹੈ, ਜਿਸ ਦੀ ਸੁਣਵਾਈ ਪਿਛਲੇ ਹਫ਼ਤੇ 29 ਜਨਵਰੀ ਤਕ ਲਈ ਟਾਲ ਦਿਤੀ ਗਈ, ਕਿਉਂਕਿ ਬੈਂਚ ਦੇ ਮੈਂਬਰ ਜਸਟਿਸ ਯੂਯੂ ਲਲਿਤ ਨੇ ਖ਼ੁਦ ਨੂੰ ਮਾਮਲੇ ਦੀ ਸੁਣਵਾਈ ਤੋਂ ਅਲੱਗ ਕਰ ਲਿਆ ਸੀ।
ਹੈਰਾਨੀ ਦੀ ਗੱਲ ਇਹ ਹੈ ਕਿ ਮਾਮਲਾ ਅਦਾਲਤ ਵਿਚ ਹੋਣ ਦੇ ਬਾਵਜੂਦ ਭਾਜਪਾ ਅਤੇ ਆਰ.ਐਸ.ਐਸ ਨੇਤਾਵਾਂ ਦੀਆ ਵਿਵਾਦਤ ਬਿਆਨਬਾਜ਼ੀਆਂ ਜਾਰੀ ਹਨ, ਜੋ ਕਿਸੇ ਸਮੇਂ ਵੀ ਵੱਡੀ ਹਿੰਸਾ ਦਾ ਕਾਰਨ ਵੀ ਬਣ ਸਕਦੀਆਂ ਹਨ। ਭਾਵੇਂ ਕਿ ਪ੍ਰਧਾਨ ਮੰਤਰੀ ਮੋਦੀ ਨੇ ਅਦਾਲਤੀ ਪ੍ਰਕਿਰਿਆ ਦਾ ਇੰਤਜ਼ਾਰ ਕੀਤੇ ਜਾਣ ਦੀ ਗੱਲ ਆਖ ਕੇ ਪਰੇ ਹੋ ਗਏ ਹਨ ਪਰ ਕਥਿਤ ਤੌਰ 'ਤੇ ਉਨ੍ਹਾਂ ਭਾਜਪਾ ਦੇ ਇਨ੍ਹਾਂ ਸਹਿਯੋਗੀ ਸੰਗਠਨਾਂ ਰਾਹੀਂ ਅਪਣਾ ਨਿਸ਼ਾਨਾ ਜਾਰੀ ਰਖਿਆ ਹੋਇਐ।