ਉਨ੍ਹਾਂ ਕਿਹਾ ਕਿ ਕਿਸਾਨੀ ਅੰਦੋਲਨ ਦੀ ਇਹ ਖਾਸੀਅਤ ਰਹੀ ਹੈ ਕਿ ਇਸ ਨੇ ਪਿਛਲੇ ਤਿੰਨ ਮਹੀਨਿਆਂ ਦੌਰਾਨ ਐਮ.ਐਸ.ਪੀ, ਦੀ ਕਾਨੂੰਨੀ ਗਾਰੰਟੀ ਅਤੇ ਖੇਤੀ ਕਾਨੂੰਨ ਵਾਪਸ ਕਰਵਾਉਣ ਵਿਚ ਸਫਲਤਾ ਪ੍ਰਾਪਤ ਨਹੀਂ ਕੀਤੀ ਪਰ ਇਸ ਨੇ ਦੇਸ਼ ਨੂੰ ਜੋੜਣ ਵਿਚ ਵੱਡੀ ਭੂਮਿਕਾ ਨਿਭਾਈ ਹੈ। ਕਾਂਗਰਸ ਵੱਲੋਂ ਸੰਸਦ ਦੇ ਅੰਦਰ ਅਤੇ ਬਾਹਰ ਨਿਭਾਈ ਜਾ ਰਹੀ ਭੂਮਿਕਾ ਵਿਚ ਵਖਰੇਵੇ ਸਬੰਧੀ ਉਨ੍ਹਾਂ ਕਿਹਾ ਕਿ ਕਿਸਾਨੀ ਅੰਦੋਲਨ ਦੀ ਇਹ ਖੂਬਸੂਰਤੀ ਹੈ ਕਿ ਇਹ ਸੱਭ 'ਤੇ ਸਵਾਲ ਖੜ੍ਹੇ ਕਰ ਰਿਹਾ ਹੈ।

ਇਹ ਕੇਵਲ ਮੋਦੀ ਨੂੰ ਕਟਹਿਰੇ ਵਿਚ ਖੜ੍ਹਾ ਨਹੀਂ ਕਰ ਰਿਹਾ, ਇਹ ਕਾਂਗਰਸੀ ਮੁੱਖ ਮੰਤਰੀ ਅਸ਼ੋਕ ਗਹਿਲੋਤ ਨੂੰ ਵੀ ਪੁੱਛੇਗਾ ਕਿ ਰਾਜਸਥਾਨ ਵਿਚ ਬਾਜਰੇ ਦੀ ਕੀਮਤ 1300 ਰੁਪਏ ਕਿਉਂ ਹੈ? ਇਹ ਅਸ਼ੋਕ ਗਹਿਲੋਤ ਤੋਂ ਪੁਛੇਗਾ ਕਿ ਤੁਸੀਂ ਕਹਿੰਦੇ ਹੋ, ਬੀਜੇਪੀ ਇਹ ਨਹੀਂ ਦਿੰਦੀ, ਉਹ ਨਹੀਂ ਦਿੰਦੀ, ਤੁਸੀਂ ਕਿਸਾਨ ਨੂੰ ਜੌਂ ਦਾ ਭਾਅ ਦਿਵਾ ਦਿਉ, ਤੁਸੀਂ ਛੋਲਿਆਂ ਦਾ ਸਹੀ ਰੇਟ ਦਿਵਾ ਦਿਉ। ਉਨ੍ਹਾਂ ਕਿਹਾ ਕਿ ਸਵਾਲ ਪੁੱਛਣ ਅਤੇ ਹੱਕ ਮੰਗਣ ਦੇ ਮਾਮਲੇ ਵਿਚ ਇਹ ਅੰਦੋਲਨ ਕਿਸੇ ਨੂੰ ਵੀ ਬਖਸ਼ੇਗਾ, ਸੱਭ ਨੂੰ ਜਵਾਬ ਦੇਣਾ ਪਵੇਗਾ।

ਅੰਦੋਲਨ ਨੂੰ ਖੁਦ ਦੀ ਦੇਣ ਬਾਰੇ ਪੁਛੇ ਸਵਾਲ ਦੇ ਜਵਾਬ ਵਿਚ ਉਨ੍ਹਾਂ ਕਿਹਾ ਕਿ ਉਹ ਅੰਦੋਲਨ ਨੂੰ ਪੰਜਾਬ ਦੀ ਦੇਣ ਦਾ ਮੁਕਾਬਲਾ ਨਹੀਂ ਕਰ ਸਕਦੇ। ਪਰ ਫਿਰ ਵੀ ਉਹ ਕਿਸਾਨਾਂ ਅਤੇ ਕਿਸਾਨ ਜਥੇਬੰਦੀਆਂ ਦੀ ਇਕਜੁਟਤਾ ਲਈ ਜਿੰਨਾ ਕਰ ਸਕਦੇ ਸੀ ਕਰ ਰਹੇ ਹਨ ਅਤੇ ਕਰਦੇ ਰਹਿਣਗੇ। ਲੱਖਾ ਸਿਧਾਣਾ ਅਤੇ ਦੀਪ ਸਿੰਧੂ ਦੀ ਨੌਜਵਾਨਾਂ ਨੂੰ ਅੰਦੋਲਨ ਨਾਲ ਜੋੜਣ ਵਿਚ ਨਿਭਾਈ ਭੂਮਿਕਾ ਬਾਰੇ ਉਨ੍ਹਾਂ ਕਿਹਾ ਕਿ ਇਸ ਅੰਦੋਲਨ ਨੇ ਪਹਿਲੇ ਦਿਨ ਤੋਂ ਹੀ ਤੈਅ ਕੀਤਾ ਸੀ ਕਿ ਅਸੀਂ ਇਧਰ-ਉਧਰ ਦੇ ਮੁੱਦਿਆਂ ਵਿਚ ਨਹੀਂ ਉਲਝਣਾ।

ਉਨ੍ਹਾਂ ਕਿਹਾ ਕਿ ਇਹੀ ਕਾਰਨ ਹੈ ਕਿ ਕਿਸਾਨ ਆਗੂ ਰਾਜੇਵਾਲ ਨੇ ਮੰਚ ਤੋਂ ਐਲਾਨ ਕੀਤਾ ਸੀ ਕਿ ਜਿਸ ਨੇ ਖਾਲਿਸਤਾਨ ਬਣਾਉਣਾ ਹੈ, ਉਹ ਅਲੱਗ ਜਾ ਕੇ ਬਣਵਾ ਸਕਦੇ ਹਨ, ਪਰ ਇਹ ਅੰਦੋਲਨ ਇਸ ਕੰਮ ਲਈ ਨਹੀਂ ਹੈ। ਇਹ ਅੰਦੋਲਨ ਸਿਰਫ ਕਿਸਾਨੀ ਨੂੰ ਉਸ ਦੇ ਹੱਕ ਦਿਵਾਉਣ ਲਈ ਹੈ, ਜੋ ਇਸ ਅੰਦੋਲਨ ਨੂੰ ਸੱਜੇ-ਖੱਬੇ ਲਿਜਾਣ ਦਾ ਕੋਸ਼ਿਸ਼ ਕਰੇਗਾ, ਉਹ ਅੰਦੋਲਨ ਦਾ ਸਾਥੀ ਨਹੀਂ ਹੋ ਸਕਦਾ।

ਇਸ ਲਈ ਜੋਸ਼ ਚੰਗੀ ਗੱਲ ਹੈ, ਪਰ ਜੇਕਰ ਜੋਸ਼ ਦੇ ਨਾਲ ਹੋਸ਼ ਨਹੀਂ ਤਾਂ ਇਹ ਅੰਦੋਲਨ ਲਈ ਹਾਨੀਕਾਰਕ ਹੋ ਸਕਦਾ ਹੈ। ਇਸ ਲਈ ਅਸੀਂ ਅੱਜ ਵੀ ਕਹਿੰਦੇ ਹਾਂ ਕਿ ਲਾਲ ਕਿਲ੍ਹੇ 'ਤੇ ਜੋ ਕੁੱਝ ਵੀ ਹੋਇਆ, ਬਹੁਤ ਗਲਤ ਹੋਇਆ ਹੈ। ਅਸੀਂ ਇਸ ਦੀ ਨੈਤਿਕ ਜ਼ਿੰਮੇਵਾਰੀ ਲਈ ਹੈ, ਪਰ ਦਿੱਲੀ ਪੁਲਿਸ ਨੂੰ ਇਸ ਦੀ ਪ੍ਰਸਾਸਕੀ ਜ਼ਿੰਮੇਵਾਰੀ ਲੈਣੀ ਚਾਹੀਦੀ ਹੈ। ਜਿੰਨਾਂ ਨੇ ਇਸ ਸੱਭ ਨੂੰ ਅੱਖੀ ਵੇਖਿਆ ਅਤੇ ਸੱਭ ਕੁੱਝ ਹੋਣ ਦਿੱਤਾ, ਉਨ੍ਹਾਂ ਦੀ ਕੋਈ ਜ਼ਿੰਮੇਵਾਰੀ ਬਣਦੀ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਦੋ ਘੋੜਿਆਂ 'ਤੇ ਸਵਾਰ ਨਾ ਹੁੰਦਿਆਂ ਇਹੀ ਕਹਿਣਾ ਚਾਹੁੰਦਾ ਹਾਂ ਕਿ ਇਸ ਅੰਦੋਲਨ ਨੂੰ ਸਿਰਫ ਕਿਸਾਨੀ ਅੰਦੋਲਨ ਹੀ ਰਹਿਣ ਦੇਣਾ ਚਾਹੀਦਾ ਹੈ। ਇਸੇ ਵਿਚ ਹੀ ਇਸ ਦੀ ਸਫਲਤਾ ਛੁਪੀ ਹੋਈ ਹੈ। ਇਸ ਨੂੰ ਹੋਰ ਪਾਸੇ ਲਿਜਾਣ ਨਾਲ ਇਸ ਦੇ ਬਿਖਰ ਜਾਣ ਦੇ ਖਤਰੇ ਵਧੇਰੇ ਹਨ ਜਿਸ ਤੋਂ ਬਚਣ ਦੀ ਲੋੜ ਹੈ।