ਨਵੀਂ ਦਿੱਲੀ: ਅਗਾਮੀ ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਮੌਜੂਦਾ ਮੋਦੀ ਸਰਕਾਰ ਅਤੇ ਸਾਬਕਾ ਮਨਮੋਹਨ ਸਰਕਾਰ ਦੇ ਕੰਮਾਂ ਦਾ ਤੁਲਨਾਤਮਕ ਅਧਿਐਨ ਕੀਤਾ ਜਾ ਰਿਹਾ ਹੈ। ਇਸ ਮੌਕੇ ’ਤੇ ਸਰਕਾਰ ਦੇ ਫੈਸਲਿਆਂ ਤੋਂ ਇਲਾਵਾ ਪ੍ਰਧਾਨ ਮੰਤਰੀਆਂ ਦੇ ਕੰਮਾਂ ਦੀ ਵੀ ਚਰਚਾ ਹੋ ਰਹੀ ਹੈ। ਭਾਰਤੀ ਜਨਤਾ ਪਾਰਟੀ ਸਾਬਕਾ ਪ੍ਰਧਾਨ ਮੰਤਰੀ ਮਨਮੋਹਨ ਦੇ ਕੰਮ ਕਾਜਾਂ ’ਤੇ ਸਵਾਲ ਜਵਾਬ ਕਰਦੀ ਰਹੀ ਹੈ। ਸੱਤਾ ਵਿਚ ਅਕਸਰ ਅਜਿਹੇ ਸਿਲਸਿਲੇ ਚਲਦੇ ਹੀ ਰਹਿੰਦੇ ਹਨ।
ਜਦਕਿ ਕਾਂਗਰਸ ਇਹਨਾਂ ਦਿਨਾਂ ਵਿਚ ਬੀਜੇਪੀ ’ਤੇ ਪ੍ਰੈਸ ਦੇ ਸਵਾਲਾਂ ਦਾ ਸਾਹਮਣਾ ਨਾ ਕਰਨ ਦਾ ਅਰੋਪ ਲਗਾ ਰਹੀ ਹੈ। ਕੁਮਾਰ ਵਿਸ਼ਵਾਸ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਬਾਰੇ ਸਪਸ਼ਟ ਸ਼ਬਦਾਂ ਵਿਚ ਕਿਹਾ ਕਿ ਪ੍ਰਧਾਨ ਮੰਤਰੀ ਦੀ ਨਿਜੀ ਜਾਣਕਾਰੀ ਅਸੀਂ ਹਜ਼ਾਰ ਵਾਰ ਸੁਣੀ ਹੈ। ਜੇਕਰ ਸਾਡੀ ਵੀ ਅਵਾਜ਼ ਸੁਣ ਲੈਂਦੇ ਤਾਂ ਵਧੀਆ ਹੁੰਦਾ। ਕੁਮਾਰ ਵਿਸ਼ਵਾਸ ਦੇ ਟਵੀਟ ਮੁਤਾਬਕ ਸਾਬਕਾ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਦੇ ਮੁਕਾਬਲੇ ਪੀਐਮ ਮੋਦੀ ਮੀਡੀਆ ਦੇ ਸਵਾਲਾਂ ਤੋਂ ਬਚਦੇ ਨਜ਼ਰ ਆ ਰਹੇ ਹਨ।
ਅਪਣੇ ਕਾਰਜਕਾਲ ਵਿਚ ਮਨਮੋਹਨ ਸਿੰਘ ਨੇ ਦੋ ਵਾਰ ਪ੍ਰੈਸ ਕਾਨਫਰੈਂਸ ਵਿਚ ਹਿੱਸਾ ਲਿਆ ਸੀ ਪਰ ਮੋਦੀ ਇਸ ਤੋਂ ਦੂਰ ਹੀ ਹਨ। ਐਡਿਟਰਜ਼ ਕਾਨਫਰੈਂਸ ਵਿਚ ਸਿੰਘ ਨੇ ਦੋ ਵਾਰ ਸ਼ਿਰਕਤ ਕੀਤੀ ਪਰ ਪੀਐਮ ਮੋਦੀ ਨੇ ਇਕ ਵਾਰ ਵੀ ਨਹੀਂ। ਵਿਦੇਸ਼ੀ ਦੌਰੇ ’ਤੇ ਸਵਾਲ ਜਵਾਬ ਦਾ ਸਾਹਮਣਾ ਕਰਨ ਦੇ ਮਾਮਲੇ ਵਿਚ ਸਾਬਕਾ ਪ੍ਰਧਾਨ ਮੰਤਰੀ ਸਿੰਘ ਅੱਗੇ ਹੀ ਦਿਖਾਈ ਦਿੱਤੇ ਹਨ। ਵਿਦੇਸ਼ੀ ਦੌਰੇ ’ਤੇ ਇੰਟਰਨੈਸ਼ਨਲ ਮੀਡੀਆ ਦੇ ਸਵਾਲਾਂ ਦਾ ਸਾਹਮਣਾ ਮਨਮੋਹਨ ਸਿੰਘ ਨੇ 8 ਵਾਰ ਕੀਤਾ ਹੈ ਜਦਕਿ ਪ੍ਰਧਾਨ ਮੰਤਰੀ ਨੇ ਅਜਿਹਾ ਇਕ ਵਾਰ ਵੀ ਨਹੀਂ ਕੀਤਾ।
ਜੇਕਰ ਗੱਲ ਕੀਤੀ ਜਾਵੇ ਕਿ ਹੋਰਾਂ ਮੌਕਿਆਂ ’ਤੇ ਮੀਡੀਆ ਦੇ ਸਵਾਲਾਂ ਦੇ ਜਵਾਬ ਦੇਣ ਦੀ ਤਾਂ ਪੀਐਮ ਮੋਦੀ ਨੇ ਅਪਣੇ ਸਾਢੇ ਚਾਰ ਸਾਲ ਦੇ ਕਾਰਜਕਾਲ ਵਿਚ ਇਕ ਵੀ ਮੌਕੇ ’ਤੇ ਪ੍ਰੈਸ ਕਾਨਫਰੈਂਸ ਦੇ ਸਵਾਲਾਂ ਦਾ ਜਵਾਬ ਨਹੀਂ ਦਿੱਤਾ। ਜਦਕਿ ਮਨਮੋਹਨ ਸਿੰਘ ਨੇ ਅਪਣੇ ਕਾਰਜਕਾਲ ਵਿਚ 3 ਵਾਰ ਪ੍ਰੈਸ ਕਾਨਫਰੈਂਸ ਕੀਤੀ ਸੀ। ਮਨ ਕੀ ਬਾਤ ਕਰਨ ਦੇ ਮਾਮਲੇ ਵਿਚ ਪੀਐਮ ਮੋਦੀ ਮਨਮੋਹਨ ਸਿੰਘ ਤੋਂ ਕਾਫੀ ਅੱਗੇ ਦਿਖਾਈ ਦਿੱਤੇ ਹਨ।
ਉਹਨਾਂ ਨੇ ਲਗਭਗ 50 ਵਾਰ ਅਜਿਹਾ ਕੀਤਾ ਹੈ ਜਦਕਿ ਮਨਮੋਹਨ ਸਿੰਘ ਨੇ ਇਕ ਵਾਰ ਵੀ ਨਹੀਂ ਕੀਤਾ। ਦਸ ਦਈਏ ਕਿ ਉਹਨਾਂ ਕਾਂਗਰਸ ਬੀਜੇਪੀ ਅਤੇ ਪ੍ਰਧਾਨ ਮੰਤਰੀ ’ਤੇ ਹਮਲਾਵਰ ਰਵੱਈਆ ਅਖ਼ਤਿਆਰ ਕੀਤਾ ਹੋਇਆ ਹੈ। ਇਸ ’ਤੇ ਲਗਾਤਾਰ ਕੇਂਦਰ ਸਰਕਾਰ ’ਤੇ ਮੀਡੀਆ ਦੇ ਸਵਾਲਾਂ ਤੋਂ ਬਚਣ ਦਾ ਅਰੋਪ ਲਗਾਉਂਦੀ ਰਹੀ ਹੈ। ਅਜਿਹੇ ਵਿਚ ਕੁਮਾਰ ਵਿਸ਼ਵਾਸ ਦੇ ਇਸ ਟਵੀਟ ਨੇ ਇਸ ਸਵਾਲ ਨੂੰ ਫਿਰ ਤੋਂ ਹਵਾ ਦੇ ਦਿੱਤੀ ਹੈ।