Farmer

ਨਵੀਂ ਦਿੱਲੀ (ਚਰਨਜੀਤ ਸਿੰਘ ਸੁਰਖ਼ਾਬ): ਕਿਸਾਨੀ ਸੰਘਰਸ਼ ਦੌਰਾਨ ਹੌਂਸਲੇ ਤੇ ਜਜ਼ਬੇ ਦੀਆਂ ਕਈ ਮਿਸਾਲਾਂ ਦੇਖਣ ਨੂੰ ਮਿਲ ਰਹੀਆਂ ਹਨ। 80-90 ਸਾਲ ਦੇ ਬਜ਼ੁਰਗਾਂ ਵਿਚ ਨੌਜਵਾਨਾਂ ਦੀ ਤਰ੍ਹਾਂ ਜੋਸ਼ ਦੇਖਿਆ ਜਾ ਰਿਹਾ ਹੈ ਤੇ ਇਹੀ ਜੋਸ਼ ਸੰਘਰਸ਼ ਦੀ ਤਾਕਤ ਨੂੰ ਦੁੱਗਣਾ ਕਰ ਰਿਹਾ ਹੈ। ਰੋਜ਼ਾਨਾ ਸਪੋਕਸਮੈਨ ਨਾਲ ਗੱਲ਼ ਕਰਦਿਆਂ 90 ਸਾਲਾ ਬਜ਼ੁਰਗ ਜੰਗਣ ਸਿੰਘ ਨੇ ਦੱਸਿਆ ਕਿ ਉਹਨਾਂ ਨੇ ਅਪਣੀ ਜ਼ਿੰਦਗੀ ਵਿਚ 1947 ਵੀ ਦੇਖੀ, 1984 ਵੀ ਦੇਖੀ ਤੇ ਹੁਣ 2020 ਦੇਖ ਰਹੇ ਹਨ।

ਬਜ਼ੁਰਗ ਨੇ ਕਿਹਾ ਕਿ ਹੁਣ ਤੱਕ ਕਿਸਾਨਾਂ ਤੇ ਮਜ਼ਦੂਰਾਂ ਨਾਲ ਬੜੇ ਨਾਟਕ ਖੇਡੇ ਗਏ ਤੇ ਇਹ ਸਭ ਸਰਕਾਰ ਕਰ ਰਹੀ ਹੈ। ਇਸ ਦੌਰਾਨ ਜੰਗਣ ਸਿੰਘ ਨੇ ਬੋਲੀਆਂ ਜ਼ਰੀਏ ਮੋਦੀ ਸਰਕਾਰ ਨੂੰ ਲਾਹਣਤਾਂ ਵੀ ਪਾਈਆਂ। ਉਹਨਾਂ ਨੇ ਗੀਤ ਜ਼ਰੀਏ ਕਾਮਿਆਂ ਤੇ ਮਜ਼ਦੂਰਾਂ ਦਾ ਦਰਦ ਵੀ ਬਿਆਨਿਆ।

ਬਜ਼ੁਰਗ ਨੇ ਦੱਸਿਆ ਕਿ ਉਹਨਾਂ ਨੇ ਅਪਣੀ ਜ਼ਿੰਦਗੀ ਵਿਚ ਕਾਫੀ ਸਮਾਂ ਖੇਤੀ ਕੀਤੀ। 30 ਕੁ ਸਾਲ ਪਹਿਲਾਂ ਸੜਕ ਹਾਦਸੇ ‘ਚ ਉਹਨਾਂ ਦੀਆਂ ਬਾਹਾਂ ਟੁੱਟ ਗਈਆਂ ਪਰ ਵਾਹਿਗੁਰੂ ਦੀ ਕ੍ਰਿਪਾ ਨਾਲ ਉਹ ਹੁਣ ਵੀ ਤੰਦਰੁਸਤ ਹਨ।

ਬਜ਼ੁਰਗ ਨੇ ਕਿਹਾ ਕਿ ਇਸ ਉਮਰ ਵਿਚ ਸੰਘਰਸ਼ ਕਰਨਾ ਉਸ ਨੂੰ ਕੋਈ ਔਖਾ ਨਹੀਂ ਲੱਗ ਰਿਹਾ। ਉਹ ਇੱਥੇ ਕਰੀਬ 20 ਦਿਨਾਂ ਤੋਂ ਸੰਘਰਸ਼ ਕਰ ਰਹੇ ਹਨ। ਉਹਨਾਂ ਤੋਂ ਪਹਿਲਾਂ ਉਹਨਾਂ ਦਾ ਪੋਤਾ ਵੀ ਸੰਘਰਸ਼ ਦਾ ਹਿੱਸਾ ਬਣਿਆ। ਜੰਗਣ ਸਿੰਘ ਨੇ ਪੰਜਾਬ ਦੇ ਨੌਜਵਾਨਾਂ ਨੂੰ ਜਾਗਣ- ਉੱਠਣ ਦੀ ਸਲਾਹ ਦਿੱਤੀ।