ਉਨ੍ਹਾਂ ਕਿਹਾ ਕਿ 22 ਜਨਵਰੀ ਨੂੰ ਸਾਡੀ ਸਰਕਾਰ ਨਾਲ ਗੱਲਬਾਤ ਹੋ ਰਹੀ ਸੀ, ਸਰਕਾਰ ਵੱਲੋਂ ਇਕ-ਇਕ ਦਲੀਲ ਤੋਂ ਭੱਜਿਆ ਜਾ ਰਿਹਾ ਸੀ ਤਾਂ ਸਰਕਾਰ ਨੇ ਕਿਹਾ ਕਿ ਤੁਸੀਂ 26 ਜਨਵਰੀ ਦੀ ਰੈਲੀ ਦੀ ਤਿਆਰੀ ਕਰੋ ਅਤੇ ਸਰਕਾਰ ਅਪਣੀ ਤਿਆਰੀ ਕਰੇਗੀ ਜਿਸਦਾ ਨਤੀਜਾ ਕੱਲ੍ਹ ਤੁਹਾਡੇ ਸਾਹਮਣੇ ਆ ਚੁੱਕਾ ਹੈ ਪਰ ਇਸ ਇਮਤਿਹਾਨ ਵਿਚ ਕਿਸਾਨ ਆਗੂਆਂ, ਨੌਜਵਾਨ, ਭੈਣਾਂ , ਬੀਬੀਆਂ ਨੇ ਫ਼ਤਿਹ ਹਾਸਲ ਕੀਤੀ ਹੈ।

ਪ੍ਰੇਮ ਸਿੰਘ ਨੇ ਕਿਹਾ ਕਿ ਕੇਂਦਰ ਦੀ ਜਾਬਰ ਸਰਕਾਰ ਅਤੇ ਉਸਦੀਆਂ ਪਿੱਠੂ ਜਥੇਬੰਦੀਆਂ ਦੀ ਹਾਰ ਹੋਈ ਹੈ ਅਤੇ ਤੁਹਾਡੇ ਵਿਚ ਬੈਠੇ ਲੋਕ ਵੀ ਬੇਨਕਾਬ ਹੋ ਗਏ ਹਨ। ਰੂਸ ਇਨਕਲਾਬ ਦੇ ਮੋਢੀ ਨੇ ਕਿਹਾ ਸੀ ਕਿ ਜੇਕਰ ਆਪਣੇ ਅੰਦਰ ਬੈਠੇ ਦੁਸ਼ਮਣਾਂ ਨੂੰ ਤੁਸੀਂ ਨਹੀਂ ਪਛਾਣਿਆ ਤਾਂ ਉਹ ਬਾਹਰਲੇ ਦੁਸ਼ਮਣਾਂ ਤੋਂ ਵੀ ਘਾਤਕ ਸਾਬਤ ਹੋ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਬਾਹਰਲਾ ਦੁਸ਼ਮਣ ਸਾਡਾ ਸਰਕਾਰ ਸੀ ਉਨ੍ਹਾਂ ਦਾ ਸਾਨੂੰ ਪਹਿਲਾਂ ਤੋ ਹੀ ਪਤਾ ਸੀ ਪਰ ਅੰਦਰਲੇ ਦੁਸ਼ਮਣ ਸਾਡੇ ਲਾਲ ਕਿਲੇ ਦੀ ਘਟਨਾ ਨੂੰ ਅੰਜ਼ਾਮ ਦੇ ਚੁੱਕੇ ਹਨ।

ਪ੍ਰੇਮ ਸਿੰਘ ਨੇ ਕਿਹਾ ਕਿ ਇਹ ਘਟਨਾ ਸਰਕਾਰ ਵੱਲੋਂ ਹੀ ਕਰਵਾਈ ਗਈ ਕਿਉਂਕਿ ਸਰਕਾਰ ਨੇ ਲਾਲ ਕਿਲੇ ਦੀ ਰਾਖੀ ਕਰਨ ਦੀ ਬਜਾਏ ਦੇਸ਼ ਵਿਰੋਧੀ ਤਾਕਤਾਂ ਦੇ ਹੱਥਾਂ ਵਿਚ ਦਿੱਤਾ ਸੀ, ਕਿਸਾਨ ਅੰਦੋਲਨ ਵਿਰੁੱਧ ਇਸਤੋਂ ਵੱਡੀ ਸਾਜਿਸ਼ ਹੋਰ ਕੀ ਹੋ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਇਹ ਕਿਆਸ ਲਗਾਏ ਜਾ ਰਹੇ ਸੀ ਕਿ 26 ਜਨਵਰੀ ਤੋਂ ਬਾਅਦ ਕਿਸਾਨ ਆਪਣੇ ਘਰਾਂ ਨੂੰ ਵਾਪਸ ਪਰਤ ਜਾਣਗੇ ਪਰ ਇਸ ਅੰਦੋਲਨ ਵਿਚ ਠਾਠਾਂ ਮਾਰਦੇ ਇਕੱਠ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਕਿਸਾਨ ਜਥੇਬੰਦੀਆਂ ਦੀ ਰਹਿਨੁਮਾਈ ਹੇਠ ਇਹ ਸ਼ਾਂਤਮਈ ਅੰਦੋਲਨ ਨੂੰ ਬੁਲੰਦ ਕਰ ਰਹੇ ਹਨ।