ਪਾਬੰਦੀ ਦੇ ਬਾਵਜੂਦ ਚੰਡੀਗੜ੍ਹ 'ਚ ਪੈਦਾ ਹੋ ਰਿਹਾ ਰੋਜ਼ਾਨਾ ਔਸਤਨ 35 ਟਨ ਪਲਾਸਟਿਕ ਕੂੜਾ

5 ਸਾਲਾਂ ਵਿਚ ਪੈਦਾ ਹੋਇਆ ਤਕਰੀਬਨ 65860 ਟਨ ਪਲਾਸਟਿਕ ਕੂੜਾ 

ਸਾਲ            ਪਲਾਸਟਿਕ ਕੂੜਾ (ਟਨ)
2016-17      21516.75
2017-18      12775 
2018-19     11715.4 
2019-20     6746 
2020-21    13107 

ਚੰਡੀਗੜ੍ਹ : ਚੰਡੀਗੜ੍ਹ ਵਿਚ ਪਲਾਸਟਿਕ ਦੀਆਂ ਚੀਜ਼ਾਂ, ਕੈਰੀ ਬੈਗ ਅਤੇ ਸਿੰਗਲ ਯੂਜ਼ ਆਈਟਮਾਂ 'ਤੇ ਪਾਬੰਦੀ ਹੈ। ਇਸ ਦੇ ਬਾਵਜੂਦ ਇਥੇ ਹਰ ਸਾਲ ਔਸਤਨ 10,000 ਟਨ ਪਲਾਸਟਿਕ ਕੂੜਾ ਪੈਦਾ ਹੋ ਰਿਹਾ ਹੈ। ਪੋਲੀਥੀਨ ਕੈਰੀ ਬੈਗ 'ਤੇ ਪਾਬੰਦੀ ਹੈ ਪਰ ਇਸ ਦੀ ਵੰਡ ਪ੍ਰਣਾਲੀ ਇੰਨੀ ਮਜ਼ਬੂਤ ​​ਹੈ ਕਿ ਉਹ ਅਜੇ ਤਕ ਇਸ ਨੂੰ ਖ਼ਤਮ ਨਹੀਂ ਕਰ ਸਕੇ ਹਨ।

ਇਹ ਵੀ ਪੜ੍ਹੋ:  ਮਨੀਪੁਰ ਦੇ ਲੋਕਾਂ ਦਾ ਦੇਸ਼ ਦੇ ਲੋਕਤੰਤਰ ਉਤੇ ਭਰੋਸਾ ਡਗਮਗਾ ਕਿਉਂ ਰਿਹਾ ਹੈ?

ਵਾਤਾਵਰਣ, ਜੰਗਲਾਤ ਅਤੇ ਜਲਵਾਯੂ ਪਰਿਵਰਤਨ ਰਾਜ ਮੰਤਰੀ ਅਸ਼ਵਨੀ ਕੁਮਾਰ ਚੌਬੇ ਨੇ ਵੀਰਵਾਰ ਨੂੰ ਰਾਜ ਸਭਾ ਵਿਚ ਇਕ ਰਿਪੋਰਟ ਪੇਸ਼ ਕੀਤੀ ਕਿ ਦੇਸ਼ ਵਿਚ ਕਿੰਨਾ ਪਲਾਸਟਿਕ ਪੈਦਾ ਹੋ ਰਿਹਾ ਹੈ। ਰਿਪੋਰਟ ਮੁਤਾਬਕ ਚੰਡੀਗੜ੍ਹ ਵਿਚ 2016-17 ਤੋਂ 2020-21 ਤਕ ਪੰਜ ਸਾਲਾਂ ਵਿਚ ਤਕਰੀਬਨ 65860 ਟਨ ਪਲਾਸਟਿਕ ਵੇਸਟ ਪੈਦਾ ਹੋਇਆ।

ਸਾਲ 2019 'ਚ ਜਦੋਂ ਪਾਬੰਦੀ ਲਗਾਈ ਗਈ ਸੀ ਤਾਂ ਉਸ ਸਾਲ ਚੰਡੀਗੜ੍ਹ 'ਚ ਪਲਾਸਟਿਕ ਦਾ ਕੂੜਾ ਵੀ ਘੱਟ ਗਿਆ ਸੀ, ਕਿਉਂਕਿ ਉਸ ਸਮੇਂ ਪ੍ਰਸ਼ਾਸਨ ਨੇ ਪੋਲੀਥੀਨ ਕੈਰੀ ਬੈਗ ਅਤੇ ਹੋਰ ਸਿੰਗਲ-ਯੂਜ਼ ਪਲਾਸਟਿਕ ਦੀ ਵਰਤੋਂ 'ਤੇ ਸਖ਼ਤੀ ਕੀਤੀ ਸੀ ਪਰ ਲਗਾਤਾਰ ਕਾਰਵਾਈ ਨਾ ਹੋਣ ਕਾਰਨ ਅਗਲੇ ਸਾਲ ਫਿਰ ਤੋਂ ਪੈਦਾ ਹੋਣ ਵਾਲੇ ਪਲਾਸਟਿਕ ਦੇ ਕੂੜੇ ਦੀ ਔਸਤ 10 ਹਜ਼ਾਰ ਟਨ ਪ੍ਰਤੀ ਸਾਲ ਤੋਂ ਉੱਪਰ ਪਹੁੰਚ ਗਈ। ਸਾਲ 2020-2021 ਵਿਚ, ਰੋਜ਼ਾਨਾ ਔਸਤਨ 35 ਟਨ ਪਲਾਸਟਿਕ ਕੂੜਾ ਪੈਦਾ ਹੁੰਦਾ ਹੈ।

ਇਹ ਵੀ ਪੜ੍ਹੋ: ਅੱਜ ਦਾ ਹੁਕਮਨਾਮਾ (28 ਜੁਲਾਈ 2023) 

ਕਈ ਵਾਰ ਚੰਡੀਗੜ੍ਹ ਦੀ ਅਥਾਰਟੀ ਸਿੰਗਲ ਯੂਜ਼ ਪਲਾਸਟਿਕ ਨੂੰ ਲੈ ਕੇ ਸਖ਼ਤ ਹੁੰਦੀ ਹੈ ਅਤੇ ਕਈ ਵਾਰ ਪੂਰੀ ਛੋਟ ਦਿੰਦੀ ਹੈ। ਇਹੀ ਕਾਰਨ ਹੈ ਕਿ ਸਿਰਫ਼ ਪੋਲੀਥੀਨ ਕੈਰੀ ਬੈਗ ਹੀ ਨਹੀਂ ਬਲਕਿ ਹੋਰ ਸਿੰਗਲ ਯੂਜ਼ ਪਲਾਸਟਿਕ ਵੀ ਹਰ ਥਾਂ ਵਰਤਿਆ ਜਾ ਰਿਹਾ ਹੈ। ਇਸੇ ਲਈ ਹੁਣ ਪ੍ਰਸ਼ਾਸਨ ਆਨਲਾਈਨ ਚਲਾਨ ਤਿਆਰ ਕਰਨ ਵਿਚ ਜੁਟਿਆ ਹੋਇਆ ਹੈ। ਇਸ ਦੇ ਲਈ ਚੰਡੀਗੜ੍ਹ ਪ੍ਰਦੂਸ਼ਣ ਕੰਟਰੋਲ ਕਮੇਟੀ (ਸੀ.ਪੀ.ਸੀ.ਸੀ.) ਅਜਿਹਾ ਮਾਡਿਊਲ ਪੇਸ਼ ਕਰਨ ਦੀ ਤਿਆਰੀ ਕਰ ਰਹੀ ਹੈ, ਜਿਸ ਦੀ ਵਰਤੋਂ ਵਾਹਨਾਂ ਦੇ ਚਲਾਨ ਕਰਨ ਲਈ ਕੀਤੀ ਜਾਂਦੀ ਹੈ। ਇਸ ਨਾਲ, ਉਲੰਘਣਾ ਕਰਨ ਵਾਲੇ ਚਲਾਨ ਕੱਟਣ ਸਮੇਂ ਵੀ ਭੁਗਤਾਨ ਕਰ ਸਕਣਗੇ। ਦਰਅਸਲ ਚਲਾਨ ਕੱਟਣ ਤੋਂ ਬਾਅਦ ਕਈ ਲੋਕ ਚਲਾਨ ਜਮ੍ਹਾ ਨਹੀਂ ਕਰਵਾਉਂਦੇ, ਜਿਸ ਕਾਰਨ ਹੁਣ ਇਹ ਤਿਆਰੀ ਕੀਤੀ ਜਾ ਰਹੀ ਹੈ।