‘ਜੇ ਝੂਠ ਧਰਤੀ ‘ਤੇ ਆਉਣ ਤਾਂ ਉਹ ਵੀ ਮੋਦੀ ਜੀ ਨੂੰ ਹੱਥ ਜੋੜ ਕੇ ਬੋਲਣਗੇ-ਤੁਸੀਂ ਸਾਡੇ ਸੀਨੀਅਰ ਹੋ’
ਪੀਐਮ ਮੋਦੀ ‘ਤੇ ਬਰਸੇ ਕਾਂਗਰਸ ਆਗੂ
ਜੈਪੁਰ: ਰਾਜਸਥਾਨ ਦੇ ਜੈਪੁਰ ਵਿਚ ਮੰਗਲਵਾਰ ਨੂੰ ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਯੁਵਾ ਆਕ੍ਰੋਸ਼ ਰੈਲੀ ਨੂੰ ਸੰਬੋਧਨ ਕੀਤਾ। ਰੈਲੀ ਵਿਚ ਰਾਹੁਲ ਗਾਂਧੀ ਦੇ ਸੰਬੋਧਨ ਤੋਂ ਪਹਿਲਾਂ ਕਈ ਕਾਂਗਰਸੀ ਆਗੂਆਂ ਨੇ ਭਾਸ਼ਣ ਦਿੱਤਾ। ਇਸੇ ਦੌਰਾਨ ਇਕ ਯੁਵਾ ਆਗੂ ਨੇ ਪੀਐਮ ਨਰਿੰਦਰ ਮੋਦੀ ‘ਤੇ ਝੂਠ ਬੋਲਣ ਦਾ ਇਲਜ਼ਾਮ ਲਗਾਇਆ ਅਤੇ ਕਿਹਾ ਕਿ ਪੀਐਮ ਮੋਦੀ ਇੰਨਾ ਝੂਠ ਬੋਲਦੇ ਹਨ ਕਿ ਝੂਠ ਵੀ ਉਹਨਾਂ ਦਾ ਚੇਹਰਾ ਦੇਖ ਕੇ ਮੂੰਹ ਮੋੜ ਲਵੇ।
ਰੈਲੀ ਦੌਰਾਨ ਸਥਾਨਕ ਯੁਵਾ ਆਗੂ ਨੇ ਸਟੇਜ ਤੋਂ ਕਿਹਾ, ‘...ਝੂਠ ਤੋਂ ਯਾਦ ਆਇਆ ਕਿ ਸਾਡੇ ਪ੍ਰਧਾਨ ਮੰਤਰੀ ਇੰਨੇ ਜ਼ਿਆਦਾ ਝੂਠ ਬੋਲਦੇ ਹਨ ਕਿ ਕੱਲ ਜੇਕਰ ਝੂਠ ਧਰਤੀ ‘ਤੇ ਆ ਜਾਣ...ਅਤੇ ਮੋਦੀ ਵੀ ਉੱਥੇ ਆਉਣ ਤਾਂ ਝੂਠ ਵੀ ਰਸਤਾ ਛੱਡ ਦੇਵੇਗਾ ਅਤੇ ਮੋਦੀ ਜੀ ਦੇ ਅੱਗੇ ਹੱਥ ਜੋੜ ਕੇ ਬੋਲੇਗਾ ਕਿ ਪਹਿਲਾਂ ਤੁਸੀਂ ਜਾਓ, ਤੁਸੀਂ ਸਾਡੇ ਸੀਨੀਅਰ ਹੋ’।
ਦੱਸ ਦਈਏ ਕਿ ਰਾਹੁਲ ਗਾਂਧੀ ਨੇ ਰਾਜਸਥਾਨ ਵਿਚ ਯੁਵਾ ਆਕ੍ਰੋਸ਼ ਰੈਲੀ ਨੂੰ ਸੰਬੋਧਨ ਕੀਤਾ, ਜਿਸ ਵਿਚ ਉਹਨਾਂ ਨੇ ਬੇਰੁਜ਼ਗਾਰੀ-ਅਰਥ ਵਿਵਸਥਾ ‘ਤੇ ਸਰਕਾਰ ਨੂੰ ਘੇਰਿਆ। ਰਾਹੁਲ ਗਾਂਧੀ ਨੇ ਇਲਜ਼ਾਮ ਲਗਾਇਆ ਕਿ ਪ੍ਰਧਾਨ ਮੰਤਰੀ ਨੇ ਦੁਨੀਆ ਵਿਚ ਦੇਸ਼ ਦੇ ਅਕਸ ਨੂੰ ਨੁਕਸਾਨ ਪਹੁੰਚਾਇਆ ਹੈ। ਪਹਿਲਾਂ ਦੇਸ਼ ਵਿਚ ਭਾਈਚਾਰਾ ਸੀ।
ਦੇਸ਼ ਭਰ ਵਿਚ ਨਾਗਰਿਕਤਾ ਸੋਧ ਕਾਨੂੰਨ ਖਿਲਾਫ ਪ੍ਰਦਰਸ਼ਨ ਦੌਰਾਨ ਹੋਈ ਹਿੰਸਾ ‘ਤੇ ਰਾਹੁਲ ਗਾਂਧੀ ਨੇ ਕਿਹਾ ਕਿ ਅੱਜ ਸਰਕਾਰ ਖੁਦ ਹਿੰਸਾ ਕਰਵਾ ਰਹੀ ਹੈ ਅਤੇ ਇਕ ਧਰਮ ਨੂੰ ਦੂਜੇ ਧਰਮ ਨਾਲ ਲੜਾ ਰਹੀ ਹੈ। ਕਾਂਗਰਸ ਆਗੂ ਨੇ ਇਸ ਦੌਰਾਨ ਭਾਸ਼ਣ ਵਿਚ ਜੀਐਸਟੀ, ਨੋਟਬੰਦੀ ਅਤੇ ਆਰਥਕ ਵਿਕਾਸ ਦੇ ਘਟ ਰਹੇ ਪੱਧਰ ਦੇ ਮਸਲੇ ਨੂੰ ਲੈ ਕੇ ਕੇਂਦਰ ਸਰਕਾਰ ‘ਤੇ ਹਮਲਾ ਬੋਲਿਆ ਹੈ।